“Yesu ka kyerɛɛ no sɛ: ‘Mene ɔkwan no, ne nokware no, ne nkwa no. Obiara mma Agya no nkyɛn, gye sɛ ɔnam me so.’”—Yohane 14:6, Wiase Foforo Nkyerɛase.

 “Yesu see no sɛ: Mene kwan ne nokware ne nkwa; obi mma agya no nkyɛn, gye sɛ ɔnam me so.”—Yohane 14:6, Akuapem Twi Bible a The Bible Society of Ghana Yɛe.

 Sɛ obi pɛ sɛ ɔsom Agya no, anaa Yehowa a Nyankopɔn a, dwuma titiriw a Yesu di no, ɛsɛ sɛ ogye tom.

 “Mene ɔkwan no.” Yesu ne “ɔkwan” pa a yɛfa so kɔ Onyankopɔn nkyɛn. Sɛ obi rebɔ Onyankopɔn mpae sei a, ɛsɛ sɛ ɔbɔ wɔ Yesu din mu. (Yohane 16:23, 24) Yesu wu no ma nnipa tumi siesie wɔne Onyankopɔn ntam, kyerɛ sɛ, ɛma wotumi ne Onyankopɔn ntam yɛ kama. (Romafo 5:8-11) Afei nso, sɛnea Yesu bɔɔ ne bra no, ɔde twaa sa too hɔ maa wɔn a wɔpɛ sɛ wɔyɛ nea Onyankopɔn pɛ.—Yohane 13:15.

 “Mene . . . nokware no.” Nokwasɛm a efi Onyankopɔn hɔ nko ara na Yesu kae, na ɛno na ɔde bɔɔ ne bra. (1 Petro 2:22) Sɛ obi tie no a, na obetumi asua Onyankopɔn ho nokwasɛm. (Yohane 8:31, 32) Ade foforo nti a na Yesu ne “nokware no” ne sɛ, ɔmaa Bible nkɔmhyɛ baa mu. Enti Onyankopɔn bɔhyɛ ahorow no, ɛnam Yesu so na ɛbaa mu.—Yohane 1:17; 2 Korintofo 1:19, 20; Kolosefo 2:16, 17.

 “Mene . . . nkwa no.” Yesu de ne nkwa bɔɔ afɔre sɛnea ɛbɛyɛ a wɔn a wobenya ne mu gyidi no betumi anya daa nkwa. (Yohane 3:16, 36) Wɔn a wɔawuwu no nso, ɔyɛ “nkwa” ma wɔn, efisɛ obenyan wɔn aba nkwa mu bio.—Yohane 5:28, 29; 11:25.

 “Obiara mma Agya no nkyɛn, gye sɛ ɔnam me so.” Sɛ obi pɛ sɛ ɔne Onyankopɔn ntam yɛ kama a, gye sɛ ogye tom sɛ Yesu di dwuma titiriw bi. Ɔkwan a obi betumi afa so ayɛ saa ne sɛ ɔbɛbɔ Onyankopɔn mpae wɔ Yesu din mu. Ɛno bɛkyerɛ sɛ tumi a Yesu Kristo wɔ no, ogye tom. (Yohane 15:16) Afei nso ogye tom sɛ ɛnyɛ Yesu a, anka obiara rennya nkwa.—Asomafo Nnwuma 4:12; Filipifo 2:8-11.

 Ade rebɛkye ama Yesu awu no, ɔne n’asuafo anokwafo 11 no hyiaam anadwo ne wɔn dii nkra, na ɔmaa wɔn afotusɛm bi. Nsɛm a ɔkae no wɔ Yohane ti 13 kosi ti 17. Wohwɛ ti 14 no a, Yesu ka kyerɛɛ n’asuafo no sɛ wonnya ne mu gyidi, na wonnya n’Agya nso mu gyidi. Afei ɔkaa sɛ wɔnnɔ ɔne n’Agya, na wontie wɔn asɛm. (Yohane 14:1, 12, 15-17, 21, 23, 24) Ɔkaa nsɛm bi a ɛkyerɛ sɛ ɔbɛn n’Agya paa; mframa mfa wɔn ntam koraa. (Yohane 14:10, 20, 28, 31) Ɛwom, na ɛrenkyɛ na Yesu asan akɔ soro, nanso ɔmaa n’asuafo no awerɛhyem sɛ ɔrennyaw wɔn. (Yohane 14:18) Afei nso ɔhyɛɛ wɔn bɔ sɛ ɔbɛma wɔn “ɔboafo,” na ɔkyerɛɛ mu sɛ ɔboafo no ne “honhom kronkron no, nea Agya no bɛsoma no me din mu no.” (Yohane 14:25-27) Yesu nam wei ne akwan foforo so boaa n’akyidifo no ma wɔdaa wɔn ho so sɛnea ɛbɛyɛ a ɔhaw a ɛbɛba daakye no, wobetumi adi so.