Afe biara, mmerante ne mmabaawa a yɛde Yehowa Adansefo som tete wɔn no, bebree bɔ asu. Wo nso, woredwen ho sɛ wobɛbɔ asu anaa? Sɛ woredwen ho a, ɛnde, nea edi kan no, ɛsɛ sɛ wuhu nea ahosohyira ne asubɔ kyerɛ.

•  Ɛdɛn ne asubɔ?

•  Ɛdɛn ne ahosohyira?

•  Adɛn nti na asubɔ ho hia?

•  Nea w’atipɛnfo ka

•  Nea nkurɔfo ka ne nokwasɛm

 Asubɔ a Bible ka ho asɛm no, yɛmfa nsu mpetempete nipa so kɛkɛ. Mmom, yɛde no wura nsu mu ma nsu no kata ne ho nyinaa. Saa ade no kyerɛ biribi a ɛho hia paa.

•   Sɛ worebɔ asu na yɛde wo wura nsu no mu saa a, ɛma obiara hu sɛ afei deɛ woremmɔ wo bra sɛnea wo ara wopɛ bio.

•   Sɛ yeyi wo fi nsu no mu a, ɛkyerɛ sɛ woafi abrabɔ foforo ase, na afei deɛ wobɛbɔ wo bra sɛnea Onyankopɔn pɛ.

 Sɛ wobɔ asu a, woma obiara hu sɛ wugye tom sɛ Yehowa na ɔwɔ tumi sɛ ɔkyerɛ nea ɛyɛ papa ne nea ɛyɛ bɔne, na wo ara woahyɛ bɔ sɛ bere nyinaa wobɛyɛ nea Yehowa pɛ sɛ woyɛ.

 Biribi a ɛsɛ sɛ wususuw ho: Adɛn nti na ɛsɛ sɛ wohyɛ bɔ wɔ baguam de kyerɛ sɛ wubetie Yehowa wo nkwa nna nyinaa? Hwɛ 1 Yohane 4:19 ne Adiyisɛm 4:11.

 Ansa na wobɛbɔ asu no, ɛsɛ sɛ wudi kan hyira wo ho so ma Yehowa wɔ kokoam. Wobɛyɛ no sɛn?

 Nea wobɛyɛ ne sɛ, wobɛbɔ mpae aka akyerɛ Yehowa sɛ wobɛsom no daa, na nsu mu oo, awia mu oo, wobɛyɛ nea ɔpɛ. Na sɛ nkurɔfo bɛyɛ dɛn oo, wɔbɛyɛ dɛn oo, wo deɛ, wobɛyɛ nea Yehowa pɛ.

 Sɛ wobɔ asu a, ɛma nkurɔfo hu sɛ woahyira wo ho so wɔ kokoam. Ɛma nkurɔfo hu sɛ ɛnyɛ nea wopɛ na wobɛyɛ. Ɛkyerɛ sɛ wode wo ho ama Yehowa, enti nea ɔpɛ na wobɛyɛ.—Mateo 16:24.

 Biribi a ɛsɛ sɛ wususuw ho: Sɛ wode wo ho ma Yehowa a, adɛn nti na w’abrabɔ yɛ papa? Hwɛ Yesaia 48:17, 18 ne Hebrifo 11:6.

 Yesu ka too hɔ sɛ obiara a ɔbɛyɛ ne suani no, ɛsɛ sɛ ɔbɔ asu. (Mateo 28:19, 20) Enti ɛnnɛ ne nnɛ nyinaa, ɛsɛ sɛ Kristoni biara bɔ asu. Nea ɛwom ne sɛ, Bible kyerɛ sɛ ɛsɛ sɛ yɛbɔ asu ansa na yɛanya nkwa.—1 Petro 3:21.

 Nanso sɛnea adamfofa a abɛda wo ne Yehowa ntam no som bo ma wo ne ɔdɔ a wowɔ ma no no, ɛno na ɛsɛ sɛ epusuw wo ma wobɔ asu. Atenka a na odwontofo no wɔ no, ɛno bi na ɛsɛ sɛ wunya. Nea ɔkae ni: “Nneɛma pa a Yehowa ayɛ ama me nyinaa, dɛn na mede betua no ka? . . . Ɛbɔ a mahyɛ Yehowa no, metua.”—Dwom 116:12-14.

 Biribi a ɛsɛ sɛ wususuw ho: Adepa bɛn na Yehowa ayɛ ama wo, na ɛdɛn na wode betua no ka? Hwɛ Deuteronomium 10:12, 13 ne Romafo 12:1.