Amu a Wɔhyew—Dɛn Na Bible Ka Fa Ho?

BƆ

Nea Bible ka

Mmara pɔtee biara nni Bible mu a ɛka sɛ, sɛ obi wu a wonsie no anaa wɔnhyew n’amu no.

Wokan Bible a wubehu sɛ Onyankopɔn asomfo anokwafo bi siee wɔn abusuafo a wowui no. Ɛho nhwɛso ne Abraham. Ɔyɛɛ nea obetumi biara tɔɔ asase de siee ne yere Sara.—Genesis 23:2-20; 49:29-32.

Bible no san ka sɛ Onyankopɔn asomfo anokwafo bi nso hyew ebinom amu. Ɛho nhwɛso ne Ɔhene Saul ne ne mma mmiɛnsa no. Bere a wowui wɔ akono no, wɔn amu no kaa wɔn atamfo asase so, na atamfo no ansie wɔn. Bere a Israel asraafo anokwafo bi tee asɛm no, wɔkɔfaa Saul ne ne mma amu no bɛhyewee, na afei wosiee nsõ no. (1 Samuel 31:8-13) Bible ma yehu sɛ ɔkwan a wɔfaa so siee mmarima no amu no, na ɛfata.—2 Samuel 2:4-6.

Amu a wɔhyew ho atosɛm

Atosɛm: Wɔhyew obi amu a, egu n’anim ase.

Nokwasɛm: Bible ka sɛ awufo san kɔ dɔte mu. Nokwasɛm ne sɛ, sɛ amu no porɔw a ɛdan dɔte. (Genesis 3:19) Enti wɔhyew amu no a, nea ɛyɛ ara ne sɛ ɛma amu no dan nsõ anaa dɔte ntɛm.

Atosɛm: Bible mmere mu no, Onyankopɔn atamfo nko ara na na wowu a wɔhyew wɔn.

Nokwasɛm: Nnipa bi a wɔansom Onyankopɔn yiye te sɛ Akan ne n’abusua sei, wɔhyew wɔn amu. (Yosua 7:25) Nanso ɛno nkyerɛ sɛ abɔnefo nko ara na sɛ wowu a na wɔhyew wɔn. (Deuteronomium 21:22, 23) Sɛnea yɛadi kan aka no, nnipa anokwafo bi mpo wɔ hɔ a wowui no wɔhyew wɔn amu. Ɛho nhwɛso ne Ɔhene Saul ba Yonatan.

Atosɛm: Wɔhyew obi amu a Onyankopɔn rentumi nnyan no.

Nokwasɛm: Sɛ Onyankopɔn benyan obi a, sɛ wosiee no oo, wɔhyew no oo, po na ɛfaa no oo, aboa bi na ɔkyeree no wee oo, ɛho asɛm nyɛ no den. (Adiyisɛm 20:13) Ɛnyɛ den mma ade nyinaa so Tumfoɔ no sɛ ɔbɛbɔ nipadua foforo ama onii no.—1 Korintofo 15:35, 38.

Amu a Wɔhyew Ne Amu a Wosie—Emu Nea Ɛwɔ He Na Wobɛpaw?

Sɛ wopɛ sɛ wokora amu so a, susuw nea edidi so yi ho.

Dɛn na na owufo no pɛ? Wohwɛ Bible mu a wubehu sɛ bere a ebinom te ase no, wɔkyerɛɛ sɛnea wowu a wɔnkora wɔn amu so. Wowui no, wɔn abusuafo nso yɛɛ no saa pɛpɛɛpɛ.—Genesis 50:4, 5; Exodus 13:19.
Amammerɛ. Sɛ obi wu a, sɛnea wɔbɛkora n’amu so no, amammerɛ di mu akoten. (Yohane 19:40) Sɛ nhwɛso no, Bible mmere mu no, na nkurɔfo taa sie awufo. (Genesis 49:31; 1 Samuel 28:3) Ɛnnɛ nso, obi betumi agyina n’amammerɛ so akyerɛ sɛnea wɔnkora n’amu so bere dodow a entia Bible mmara.
Aban mmara. Bible tu yɛn fo sɛ yentie wiase atumfoɔ. (Romafo 13:1) Mmeae bi wɔ hɔ a, sɛnea ɛsɛ sɛ wɔkora amu so no, atumfoɔ no ahyehyɛ ho mmara. Ɛho nhwɛso ne amu a wɔhyew. Wokɔ mmeae bi a, atumfoɔ no na ɛkyerɛ baabi a ɛsɛ sɛ wɔde nsõ no kogu.
Sɛn na afoforo te nka wɔ ho? Bible hyɛ yɛn nkuran sɛ yennwen afoforo ho. (Filipifo 2:4) Sɛ yɛpɛ sɛ yɛkora amu so a, yebetumi asusuw nsɛmmisa a edidi so yi ho: Amu no a yɛbɛhyew anaa yebesie no, abusuafo a aka no dwene ho sɛn? Kurom hɔfo nso hu no sɛn?