Dɛn Ne Asubɔ?

BƆ

Dɛn Ne Asubɔ?

Nea Bible ka

Asubɔ kyerɛ sɛ wɔde obi bɛhyɛ nsu mu ma nsu no akata no so na wɔama no so afi mu. a Wei ma yehu nea enti a wɔbɔɔ Yesu asu wɔ asubɔnten kɛse bi mu no. (Mateo 3:13, 16) Saa ara na bere a Etiopiani barima bi hui sɛ wabɛn “nsu bi ho” no ɔkaa sɛ wɔmmɔ no asu.—Asomafo Nnwuma 8:36-40.

Nea asubɔ kyerɛ

Bible de asubɔ toto amusie ho. (Romafo 6:4; Kolosefo 2:12) Nsu mu asubɔ yɛ sɛnkyerɛnne a ɛkyerɛ sɛ obi awu ama abrabɔ a na ɔwom, na wafi asetena foforo ase sɛ Kristoni a wahyira ne ho so ama Onyankopɔn. Asubɔ ne nea obi yɛ ansa na wafata sɛ wɔbɔ no asu no, ɛyɛ Onyankopɔn nhyehyɛe a ɛma obi nam Yesu Kristo afɔrebɔ no mu gyidi so nya ahonim pa. (1 Petro 3:21) Enti, Yesu kaa sɛ ɛsɛ sɛ n’asuafo bɔ asu.—Mateo 28:19, 20.

Nsu mu asubɔ hohoro bɔne anaa?

Daabi. Bible ma yehu sɛ Yesu mogya a wohwie gui no nko ara na etumi hohoro bɔne. (Romafo 5:8, 9; 1 Yohane 1:7) Nanso, sɛ obi benya Yesu afɔrebɔ no so mfaso a, ɛsɛ sɛ onya Yesu mu gyidi, ɔsesa n’abrabɔ, ɔde Yesu nkyerɛkyerɛ bɔ ne bra, na ɔma wɔbɔ no asu.—Asomafo Nnwuma 2:38; 3:19.

Bible ka sɛ yɛmmɔ nkokoaa asu anaa?

Daabi, ɛnka saa. Bible nka nkokoaa asubɔ ho asɛm. Asɔre ahorow bi na wohyia bɔ akokoaa “asu” (wohwie nsu gu akokoaa no ti so anaa wɔde petepete no so) na afei wɔto no din. Nnipa a wɔanyin a wotumi te “Onyankopɔn Ahenni . . . ho asɛmpa no” ase na wogye di ɛnna wɔbɔ wɔn asu ma wɔbɛyɛ Kristofo. (Asomafo Nnwuma 8:12) Sɛ obi te Onyankopɔn asɛm, ogye tom, na ɔsakra a ɛnna wɔbɔ no asu. Akokoaa rentumi nyɛ saa nneɛma yi mu biara.—Asomafo Nnwuma 2:22, 38, 41.

Afei nso, Bible ma yehu sɛ Onyankopɔn bu Kristofo mma nkumaa sɛ wɔyɛ kronkron anaa wɔn ho tew wɔ Onyankopɔn ani so, esiane sɛ wɔn awofo som Onyankopɔn nti. (1 Korintofo 7:14) Sɛ nkokoaa a wɔbɔ wɔn asu ye a, anka ɛnyɛ wɔn awofo som so na Onyankopɔn begyina abu wɔn sɛ wɔn ho tew. b

Kristofo asubɔ ho atosɛm

Atosɛm: Sɛ wɔde nsu gu obi so anaa wɔde petepete no so a, ɛte sɛ nea wɔde no ahyɛ nsu mu abɔ no asu ara pɛ.

Nokwasɛm: Nkurɔfo a wɔbɔɔ wɔn asu a ɛho asɛm wɔ Bible mu nyinaa no, wɔde wɔn hyɛɛ nsu mu. Ɛho nhwɛso ni. Bere a osuani Filipo bɔɔ Etiopiani barima no asu no, ‘wosian kɔɔ nsu no mu’ na wɔbɔɔ no asu. Wowiei no, “wofii nsu no mu puei.”—Asomafo Nnwuma 8:36-39. c

Atosɛm: Bible ma yehu sɛ, sɛ wɔbɔ abusua bi mufo nyinaa asu a, na wɔbɔ nkokoaa a wɔwɔ abusua no mu nso asu. Sɛ nhwɛso no, Bible ka afiasehwɛfo bi a na ɔwɔ Filipi ho asɛm sɛ: “Wɔbɔɔ ɔne ne fifo nyinaa asu.”—Asomafo Nnwuma 16:31-34.

Nokwasɛm: Kyerɛwtohɔ a ɛkyerɛ sɛ afiasehwɛfo no sakrae no ma yehu sɛ wɔn a wɔbɔɔ wɔn asu nyinaa no, na wɔte “Yehowa asɛm” ase na ‘wodii ahurusi kɛse.’ (Asomafo Nnwuma 16:32, 34) Saa asɛm yi ma yehu sɛ, wɔammɔ nkokoaa biara a na wɔwɔ afiasehwɛfo no abusua mu asu, efisɛ na nkokoaa no rentumi nte Yehowa asɛm ase.

Atosɛm: Yesu kyerɛkyerɛe sɛ ɛsɛ sɛ wɔbɔ nkokoaa asu, efisɛ ɔkaa sɛ mmofra nkumaa na Ahenni no yɛ wɔn dea.—Mateo 19:13-15; Marko 10:13-16.

Nokwasɛm: Bere a Yesu kaa saa asɛm no, na ɛnyɛ asubɔ ho asɛm na ɔreka. Mmom nea na ɔreka ne sɛ, wɔn a wobenya Onyankopɔn Ahenni no, ɛsɛ sɛ wɔyɛ wɔn ade sɛ mmofra. Kyerɛ sɛ, ɛsɛ sɛ wɔyɛ nkurɔfo a wodwo na wɔma kwan ma wɔkyerɛkyerɛ wɔn.—Mateo 18:4; Luka 18:16, 17.

a Greek asɛmfua a wɔkyerɛɛ ase “asubɔ” no, efi asɛmfua bi a ne nkyerɛase ne “fa hyɛ mu” mu. Hwɛ Theological Dictionary of the New Testament, Ɔfã I, kratafa 529.

b The International Standard Bible Encyclopedia kyerɛ sɛ, “nkokoaa asubɔ ho asɛm biara nni Apam Foforo no mu.” Ɛsan ka sɛ, nea ɛkɔfaa nkokoaa asubɔ bae ne sɛ, nkurɔfo “dii mfomso kaa nea asubɔ tumi yɛ ho asɛm guguu mu dodo.” Wɔkae sɛ asubɔ hohoro bɔne.—Ɔfã 1, kratafa 416-417.

c New Catholic Encyclopedia ka wɔ asɛmti “Asubɔ (ho asɛm a ɛwɔ Bible mu)” ase sɛ: “Nokwasɛm ne sɛ tete no, sɛ Asɔre no rebɔ obi asu a, na wɔde onipa no hyɛ nsu mu.”—Ɔfã 2, kratafa 59.