Wohwɛ abɔde a ɛwɔ asase so nyinaa a, nnipa kakraa bi na Bible kyerɛ sɛ wɔbɛkɔ soro. (Adiyisɛm 14:1, 3) Nea enti a wɔbɛkɔ soro ne sɛ, wɔrekɔyɛ ahemfo ne asɔfo na wɔne Yesu adi ade. (Luka 22:28-30; Adiyisɛm 5:9, 10) Asase so nnipa a aka no, wobenyan wɔn mu dodow no ara ama wɔabɛtena paradise asase so.—Dwom 37:11, 29.

 Bible nkaa wɔ baabiara sɛ nkraman anaa mmoa foforo wɔ baabi a wɔte wɔ soro. Ntease wom, efisɛ nneɛma a ɛma obi fata ma “ɔsoro frɛ” no, mmoa ntumi nyɛ. (Hebrifo 3:1) Saa nneɛma no bi ne sɛ, ɛsɛ sɛ onii no nya nimdeɛ ne gyidi, na ɛsɛ sɛ odi Onyankopɔn mmara so. (Mateo 19:17; Yohane 3:16; 17:3) Nnipa nko ara na wɔwɔ anidaso sɛ wɔbɛtena ase daa.—Genesis 2:16, 17; 3:22, 23.

 Sɛ obi betumi akɔ soro a, gye sɛ wonyan no fi awufo mu. (1 Korintofo 15:42) Bible ka owusɔre ahorow bi a ɛkɔɔ so ho asɛm. (1 Ahene 17:17-24; 2 Ahene 4:32-37; 13:20, 21; Luka 7:11-15; 8:41, 42, 49-56; Yohane 11:38-44; Asomafo Nnwuma 9:36-42; 20:7-12) Nanso emu baako mpo nni hɔ a wonyan aboa; nnipa nko ara na wonyan wɔn.

•  Mmoa wɔ akra anaa?

•  Ɔkra tumi wu anaa?

•  Mmoa tumi yɛ bɔne anaa?

•  Ɛfata sɛ yɛyɛ mmoa ayayade anaa?

 Dabi. Bible ka sɛ mmoa ne nnipa nyinaa yɛ akra. (Numeri 31:28) Bere a Onyankopɔn bɔɔ onipa a odi kan Adam no, wamfa ɔkra anhyɛ ne mu, mmom ‘ɔbɛyɛɛ ɔkra teasefo.’ (Genesis 2:7) Nneɛma mmienu na ɛka bom yɛ ɔkra: “fam dɔte” ne “nkwa home.”

 Yiw, Bible kyerɛkyerɛ sɛ ɔkra tumi wu. (Leviticus 21:11; Hesekiel 18:20) Sɛ onipa anaa aboa wu a, ɔsan kɔ dɔte mu. (Ɔsɛnkafo 3:19, 20) Wei kyerɛ sɛ ɔntena nkwa mu bio. a

 Dabi. Sɛ yɛka sɛ obi ayɛ bɔne a, nea ɛkyerɛ ne sɛ biribi a onii no dwen ho, sɛnea ɔte nka, anaa biribi a wayɛ tia Onyankopɔn mmara. Sɛ obi bɛyɛ bɔne a egyina ɔno ara ne so, kyerɛ sɛ, ɔno ara na osi gyinae sɛ ɔbɛyɛ biribi a eye anaa enye. Wei nyɛ biribi a mmoa betumi ayɛ. Mmoa ntumi nnwen; wɔn nkwa nna nyinaa wofi nkate mu na ɛyɛ ade. (2 Petro 2:12) Enti ɛmfa ho sɛ wɔnyɛ bɔne no, sɛ bere tenten a wotumi de tena nkwa mu no so a, wowu.

 Dabi. Onyankopɔn de mmoa hyɛɛ nnipa nsa sɛ wonni wɔn so, na ɛnyɛ sɛ wɔnyɛ wɔn ayayade anaa wɔnteetee wɔn. (Genesis 1:28; Dwom 8:6-8) Onyankopɔn dwen aboa biara yiyedi ho; nnomaa nketewa mpo, odwen wɔn ho. (Yona 4:11; Mateo 10:29) Tete no, ɔka kyerɛɛ n’asomfo sɛ ɛnsɛ sɛ wɔyɛ mmoa ayayade.—Exodus 23:12; Deuteronomium 25:4; Mmebusɛm 12:10.