1 Korintofo 15:1-58
15 Afei anuanom merema moahu asɛmpa+ a meka kyerɛɛ mo,+ na mo nso mugyei, na mugyina mu+ no.
2 Bio nso wɔnam asɛm a mede kaa asɛmpa no kyerɛɛ mo no so regye mo nkwa,+ sɛ muso mu denneennen a, gye sɛ ebia mobɛyɛɛ gyidifo kwa.+
3 Na nsɛm a edi kan a me nso minyae+ a mede maa mo ne sɛ yɛn bɔne nti na Kristo wui sɛnea Kyerɛwnsɛm no ka no;+
4 na wosiee no,+ na da a ɛto so abiɛsa+ no, wonyan no,+ sɛnea Kyerɛwnsɛm no ka no;+
5 na oyii ne ho adi kyerɛɛ Kefa+ ne afei dumien no.+
6 Ɛno akyi no, oyii ne ho adi kyerɛɛ anuanom bɛboro ahanum bere koro mu, na wɔn mu dodow no ara da so te ase,+ nanso wɔn mu binom adeda wɔ owu mu.
7 Ɛno akyi no oyii ne ho adi kyerɛɛ Yakobo,+ ne afei asomafo no nyinaa;+
8 na nea etwa to koraa no, oyii ne ho adi kyerɛɛ me+ a mete sɛ nea ne bere anso a wɔwoo no yi.
9 Na mene nea osua koraa+ wɔ asomafo no mu a mensɛ sɛ wɔfrɛ me ɔsomafo, efisɛ metaa+ Onyankopɔn asafo.
10 Nanso Onyankopɔn adom+ nti na mete sɛnea mete yi. Na dom a ɔdom me no anyɛ kwa,+ na mmom mebɔɔ me ho mmɔden sen wɔn nyinaa,+ nanso ɛnyɛ me, na ɛyɛ Onyankopɔn adom a ɛka me ho no.+
11 Nanso sɛ́ ɛyɛ me anaa ɛyɛ wɔn no, saa na yɛka asɛm no, na saa na moagye adi.+
12 Afei sɛ wɔreka Kristo ho asɛm sɛ wɔanyan no afi awufo mu+ a, adɛn nti na mo mu binom ka sɛ awufo sɔre biara nni hɔ?+
13 Na sɛ awufo sɔre nni hɔ de a, na ɛkyerɛ sɛ wɔannyan Kristo nso.+
14 Na sɛ wɔannyan Kristo nso a, yɛn asɛnka yɛ kwa, na yɛn gyidi nso yɛ kwa.+
15 Afei nso wobebu yɛn sɛ yɛadi Onyankopɔn ho adansekurum,+ efisɛ yɛadi adanse+ atia Onyankopɔn sɛ wanyan Kristo,+ a sɛ awufo sɔre biara nni hɔ a, anka wannyan no.+
16 Na sɛ wɔrennyan awufo a, na ɛkyerɛ sɛ wɔannyan Kristo nso.
17 Bio nso, sɛ wɔannyan Kristo a, na mo gyidi so nni mfaso, na moda so wɔ mo bɔne mu.+
18 Nokwarem no, ɛbɛkyerɛ nso sɛ wɔn a Kristo mu wɔdedae wɔ owu mu+ no asɛe kwa.+
19 Sɛ nkwa yi mu nko na yɛanya Kristo mu anidaso+ a, ɛnde na yɛn na yɛyɛ mmɔbɔ paa wɔ nnipa nyinaa mu.
20 Nanso afei wɔanyan Kristo afi awufo mu+ sɛ wɔn a wɔadeda wɔ owu mu no aba a edi kan.+
21 Na sɛnea ɛnam onipa so na owu+ bae no, saa ara na ɛnam onipa so na owusɔre nso bae.+
22 Na sɛnea obiara rewu wɔ Adam mu+ no, saa ara na wɔbɛma obiara anya nkwa wɔ Kristo mu.+
23 Nanso obiara ne ne gyinabea: Kristo ne aba a edi kan+ no, ansa na wɔn a wɔyɛ Kristo dea no adi hɔ wɔ ne mmae mu.+
24 Ɛno akyi na awiei no bɛba ma ɔde ahenni no ahyɛ ne Nyankopɔn ne n’Agya nsa, bere a watu aban ne tumi ne ahoɔden nyinaa agu+ no.
25 Na etwa sɛ odi hene kosi sɛ Onyankopɔn de atamfo nyinaa begu ne nan ase.+
26 Ɔtamfo a otwa to a obetu no agu ne owu.+
27 Na Onyankopɔn “de nneɛma nyinaa guu ne nan ase.”+ Na sɛ ɔka sɛ ‘wɔde nneɛma nyinaa agu ne nan ase’+ a, emu da hɔ pefee sɛ nea ɔde nneɛma nyinaa guu ne nan ase no nka ho bi.+
28 Na sɛ onya de nneɛma nyinaa gu ne nan ase+ a, afei Ɔba no ankasa nso de ne ho bɛhyɛ Nea+ ɔde nneɛma nyinaa hyɛɛ n’ase no ase, na Onyankopɔn ayɛ ade nyinaa ama obiara.+
29 Anyɛ saa a anka wɔn a wɔbɔ wɔn asu kɔ owu mu no bɛyɛ dɛn?+ Sɛ awufo nsɔre koraa+ a, dɛn nti na wɔbɔ wɔn asu+ kɔ owu mu?
30 Adɛn nti nso na yɛwɔ asiane mu dɔn biara?+
31 Da biara me ne owu bɔ mpunimpu.+ Anuanom, mede ahurusi+ a midi wɔ mo ho wɔ yɛn Awurade Yesu Kristo mu si so dua.
32 Sɛ me ne mmoa koe sɛnea nnipa yɛ wɔ Efeso+ no a, mfaso bɛn na ɛwɔ so ma me? Sɛ awufo nsɔre a, ɛnde “momma yennidi na yɛnnom, na ɔkyena na yɛawu.”+
33 Mommma wɔnnnaadaa mo. Fekubɔne sɛe ɔbra pa.+
34 Momma mo ani nna hɔ+ wɔ trenee mu, na monntena bɔne mu, efisɛ ebinom nni Onyankopɔn ho nimdeɛ.+ Merekasa de ahyɛ mo aniwu.+
35 Nanso obi bɛka sɛ: “Ɔkwan bɛn na wɔbɛfa so anyan awufo? Nipadua bɛn mpo na wɔde reba?”+
36 Onipa a wunni adwene! Nea wudua no nnya nkwa, gye sɛ awu ansa;+
37 na nea wudua no, ɛnyɛ dua a ɛbɛba no na wudua, na mmom aba kɛkɛ,+ awi anaa foforo biara;
38 nanso Onyankopɔn ma ɛyɛ dua+ a ɔpɛ,+ na aba no mu biara nya n’ankasa dua.
39 Ɔhonam nyinaa nyɛ honam koro, na mmom ɛsono adesamma de na ɛsono ntɔteboa de, ɛsono nnomaa de na ɛsono mpataa+ de.
40 Na ɔsoro+ abɔde wɔ hɔ na asase so abɔde+ wɔ hɔ; na ɔsoro abɔde anuonyam+ nko na asase so abɔde de nko.
41 Owia+ anuonyam nko na ɔsram+ anuonyam nko, na nsoromma+ nso anuonyam nko; na nsoromma mpo, emu biara ne n’anuonyam.
42 Saa ara nso na awufo sɔre te.+ Wodua no nea ɛporɔw mu, wonyan no nea ɛmporɔw+ mu.
43 Wodua no animguase mu,+ wonyan no anuonyam mu.+ Wodua no mmerɛwyɛ mu,+ wonyan no tumi mu.+
44 Wodua no honam nipadua+ mu, wonyan no honhom nipadua+ mu. Sɛ honam nipadua wɔ hɔ a, honhom nipadua nso wɔ hɔ.
45 Saa ara na wɔakyerɛw mpo sɛ: “Onipa a odi kan Adam bɛyɛɛ ɔkra teasefo.”+ Adam a odi akyiri no bɛyɛɛ honhom+ a ɔma nkwa.+
46 Nanso, ɛnyɛ honhom mu de no na edi kan, na mmom honam mu de no, ɛno akyi ansa na honhom mu de no reba.+
47 Onipa a odi kan no fi fam na wɔde dɔte na ɛyɛɛ no;+ onipa a ɔto so abien no fi soro.+
48 Sɛnea nea wɔde dɔte yɛɛ no no+ te no, saa ara na wɔn a wɔde dɔte yɛɛ wɔn no nso te; na sɛnea nea ofi soro+ no te no, saa ara na wɔn a wofi soro no nso te.+
49 Na sɛnea yɛhyɛɛ nea wɔde dɔte yɛɛ no no suban+ no, saa ara na yɛbɛhyɛ nea ofi soro no nso suban.+
50 Nanso anuanom, eyi na meka, sɛ honam ne mogya ntumi nnya Onyankopɔn ahenni,+ na saa ara na nea ɛporɔw ntumi nnya nea ɛmporɔw.+
51 Hwɛ! Meka mo ahintasɛm kronkron bi sɛ: Ɛnyɛ yɛn nyinaa na yɛbɛdeda owu mu, na mmom yɛn nyinaa bɛsesã+
52 ntɛm so, anibu mu, torobɛnto a edi akyiri no mu. Na torobɛnto+ no bɛhyɛn, na wɔanyan awufo sɛ wɔn a wɔmporɔw, na yɛbɛsesã.
53 Na ɛsɛ sɛ nea ɛporɔw yi hyɛ nea ɛmporɔw,+ na nea ewu+ yi hyɛ nea enwu.
54 Na sɛ nea ɛporɔw yi hyɛ nea ɛmporɔw, na nea ewu yi hyɛ nea enwu a, ɛno na asɛm a wɔakyerɛw no bɛba mu sɛ: “Wɔamene owu+ akosi daa.”+
55 “Owu, wo nkonimdi wɔ he? Owu, wo nwowɔe wɔ he?”+
56 Nwowɔe+ a ɛde owu ba ne bɔne, na bɔne tumi ne Mmara+ no.
57 Nanso aseda nka Onyankopɔn, efisɛ ɔnam yɛn Awurade Yesu Kristo so ma yedi nkonim!+
58 Enti me nuanom adɔfo, muntintim,+ munnhinhim, monyɛ pii wɔ Awurade adwuma no mu+ daa, na munim sɛ mo brɛ renyɛ kwa+ Awurade mu.
