1 Korintofo 16:1-24
16 Na ɛdefa ntoboa+ a wogyigye ma akronkronfo+ ho no, sɛnea mede ahyɛde maa Galatia+ asafo ahorow no, mo nso monyɛ no saa ara.
2 Nnawɔtwe biara mu da a edi kan no, mo mu biara nhwɛ nea wanya na onyi biribi nsie wɔ ne fie, na amma sɛ bere a mabedu hɔ no ansa na ntoboa gyigye akɔ so.
3 Na sɛ meba a, mmarima a monam nkrataa+ so bɛpene wɔn so no, wɔn na mɛsoma wɔn ma wɔde mo akyɛde no akɔ Yerusalem.
4 Nanso sɛ ɛfata sɛ me nso mekɔ hɔ a, me ne wɔn bɛkɔ hɔ.
5 Na mɛba mo nkyɛn bere a makɔfa Makedonia, efisɛ mɛfa Makedonia;+
6 na ebia mɛtena mo nkyɛn anaa medi awɔw bere no mpo wɔ mo nkyɛn, na moagya me kwan+ kakra akɔ baabi a mɛkɔ.
7 Na mempɛ sɛ mihu mo bere a meretwam yi nko, na mmom sɛ Yehowa+ ma kwan+ a, m’ani da so sɛ me ne mo bɛtena kakra.+
8 Nanso mɛtena Efeso+ akosi sɛ Pentekoste afahyɛ no bedu,
9 efisɛ wɔabue dwumadi kɛse bi pon ama me,+ nanso asɔretiafo pii wɔ hɔ.
10 Na sɛ Timoteo+ ba a, monhwɛ na wammɔ hu bere a ɔwɔ mo nkyɛn no, efisɛ ɔreyɛ Yehowa adwuma+ sɛnea me nso mereyɛ no.
11 Enti obiara mmmu no animtiaa.+ Munnya no kwan asomdwoe mu sɛnea ɛbɛyɛ a ɔbɛba me nkyɛn wɔ ha, efisɛ me ne anuanom retwɛn no.
12 Afei ɛdefa yɛn nua Apolo+ ho no, mesrɛɛ no ara sɛ anka ɔne anuanom mmra mo nkyɛn, na na ɔmpɛ koraa sɛ ɔbɛba; nanso sɛ onya kwan a ɔbɛba.
13 Monwɛn,+ munnyina pintinn wɔ gyidi no mu,+ monkɔ so sɛ mmarima,+ monyɛ den.+
14 Monyɛ biribiara ɔdɔ mu.+
15 Afei anuanom mitu mo fo: Munim sɛ Stefana fiefo ne aba a edi kan+ wɔ Akaia, na wɔatu wɔn ho asi hɔ sɛ wɔresom akronkronfo.+
16 Mo nso ɛmmra sɛ mobɛkɔ so abrɛ mo ho ase ama nnipa a wɔte saa ne obiara a ɔde ne ho hyɛ adwuma no mu na ɔbrɛ wɔ mu no.+
17 Nanso m’ani agye sɛ Stefana+ ne Fortunato ne Akaiko wɔ ha, efisɛ munni ha no, wɔasi mo ananmu.
18 Na wɔadwudwo me honhom+ ne mo de. Enti munnye nnipa a wɔte saa ntom.+
19 Asafo a ɛwowɔ Asia no kyia mo.+ Akwila ne Priska ne asafo a ɛwɔ wɔn fie+ no de anigye kyia mo Awurade mu.
20 Anuanom nyinaa kyia mo. Momfa mfewano kronkron nkyiakyia mo ho.+
21 Me, Paulo, m’ankasa me nsa ano nkyia ni.+
22 Sɛ obi mpɛ Awurade asɛm a onnue.+ O yɛn Awurade, bra!+
23 Awurade Yesu adom nka mo.
24 Me dɔ nka mo nyinaa wɔ Kristo Yesu mu.
