1 Korintofo 7:1-40
7 Na nea mokyerɛwee no ho de, eye ma ɔbarima sɛ ɔmfa ne ho nka+ ɔbea;
2 nanso esiane sɛ aguamammɔ+ abu so nti, ɔbarima biara nnya n’ankasa ne yere,+ na ɔbea biara nnya n’ankasa ne kunu.
3 Okunu mma ne yere nea ɛsɛ no,+ na ɔyere nso nyɛ saa ara mma ne kunu.+
4 Ɔyere nni n’ankasa nipadua so tumi, na mmom ne kunu;+ saa ara nso na okunu nni n’ankasa nipadua so tumi, na mmom ne yere.+
5 Mommfa mo ho nnkame mo ho,+ gye sɛ mo baanu nyinaa pene so saa kosi bere bi,+ na moanya bere ama mpaebɔ na moasan abehyiam bio, na amma sɛ ahosodi a moannya nti,+ Satan bɛsɔ mo ahwɛ.+
6 Nanso nea mereka yi yɛ hokwan bi kɛkɛ,+ na ɛnyɛ ɔhyɛ.+
7 Minyae a, anka nnipa nyinaa te sɛ nea mete yi.+ Nanso, obiara wɔ n’ankasa akyɛde+ a efi Onyankopɔn hɔ; obi wɔ no sɛɛ, na ɔfoforo nso wɔ no sɛɛ.
8 Afei meka kyerɛ wɔn a wɔnwaree+ ne akunafo sɛ eye ma wɔn sɛ wɔbɛtena hɔ sɛnea mete yi.+
9 Nanso sɛ wontumi nhyɛ wɔn ho so a,+ wɔnware, na eye sɛ wɔbɛware+ sen sɛ akɔnnɔ bɛhyɛ wɔn so.+
10 Awarefo no de, mema wɔn ahyɛde, nanso ɛnyɛ me, na mmom Awurade,+ sɛ ɔyere ne ne kunu nntetew mu;+
11 nanso ɛba sɛ ɔne no tetew mu a, ɔnnware, anyɛ saa a ɛsɛ sɛ ɔne ne kunu no kɔbom bio; na okunu nso mmfi ne yere ho.
12 Na wɔn a aka no de, me na meka kyerɛ wɔn, na ɛnyɛ Awurade,+ sɛ: Sɛ onua bi wɔ yere a onnye nni, na sɛ ɔbea no pene so sɛ ɔne no bɛtena a, ɛnsɛ sɛ ogyaa no;
13 na sɛ ɔbea bi nso wɔ kunu a onnye nni, na sɛ ɔbarima no pene so sɛ ɔne no bɛtena a, ɛnsɛ sɛ ogyaa ne kunu no.
14 Na okunu a onnye nni no ho atew ɔyere no mu, na ɔyere a onnye nni no ho atew onuabarima no mu; anyɛ saa a mo mma ho begu fĩ+ ankasa, na seesei de, wɔyɛ kronn.+
15 Na sɛ nea onnye nni no ka sɛ ɔrekɔ+ a, ma ɔnkɔ; obi ntumi nhyɛ onuabarima anaa onuabea sɛ akoa wɔ tebea a ɛte saa mu, na asomdwoe mu na Onyankopɔn afrɛ mo aba.+
16 Na ɔbea, wobɛyɛ dɛn ahu sɛ ɛnyɛ wo na wubegye wo kunu nkwa?+ Anaasɛ ɔbarima, wobɛyɛ dɛn ahu sɛ ɛnyɛ wo na wubegye wo yere nkwa?+
17 Mmom no, sɛnea Yehowa ama obiara ne kyɛfa+ no, saa ara na obiara mmɔ ne bra sɛnea Onyankopɔn afrɛ no.+ Na saa na mahyɛ+ wɔ asafo ahorow nyinaa mu.
18 Wɔfrɛɛ obi wɔ twetiatwa mu anaa?+ Ɛnsɛ sɛ ɔdan momonotoni. Wɔfrɛɛ obi wɔ momonoto mu anaa?+ Ɛnsɛ sɛ wotwa no twetia.+
19 Twetiatwa+ nka hwee, na momonoto+ nso nka hwee, na nea ehia ne Onyankopɔn ahyɛde sodi.+
20 Tebea biara a wɔfrɛɛ obiara wɔ mu no,+ ɔntena mu.+
21 Wɔfrɛɛ wo no na woyɛ akoa anaa? Mma ɛnnhaw wo;+ nanso sɛ wubetumi ade wo ho nso a, de wo ho.
22 Na obiara a ɔwɔ Awurade mu a wɔfrɛɛ no bere a ɔyɛ akoa no ade ne ho na wayɛ Awurade dea;+ na saa ara na nea wɔfrɛɛ no bere a ɔyɛ ɔdehye+ no nso yɛ Kristo akoa.+
23 Wɔtɔɔ mo aboɔden;+ monnyɛ nkoa+ mmma nnipa.
24 Anuanom, tebea+ biara a wɔfrɛɛ obiara wɔ mu no, ɔne Onyankopɔn ntena saa ara.
25 Afei ɛdefa mmaabun ho de, minni ahyɛde biara a efi Awurade hɔ, na mmom mereka m’adwene+ sɛ obi a Awurade huu no mmɔbɔ+ sɛ ɔmmɛyɛ ɔnokwafo.+
26 Enti misusuw sɛ ahohia a yɛwɔ mu nti, eye ma onipa sɛ ɔtena hɔ sɛnea ɔte ara.+
27 Wofam ɔyere ho anaa?+ Ɛnsɛ sɛ wotetew wo ho.+ Woade wo ho afi ɔyere ho anaa? Nhwehwɛ ɔyere.
28 Na sɛ woware nso a, wonyɛɛ bɔne.+ Sɛ ɔbaabun ware a, ɔnyɛɛ bɔne. Nanso wɔn a wɔyɛ saa no ho behiahia wɔn ɔhonam mu.+ Me de, mepɛ sɛ mo ho tɔ mo.
29 Bio nso anuanom, nea meka ne sɛ, bere a aka no sua.+ Efi saa bere yi rekɔ no, wɔn a wɔwɔ yere no nyɛ sɛnea wonni bi,+
30 na wɔn a wosu nso nyɛ sɛ wɔn a wonsu, na wɔn a wodi ahurusi ayɛ sɛ wɔn a wonni ahurusi, na wɔn a wɔtɔ ayɛ sɛ wɔn a wonni bi,
31 na wɔn a wɔde wiase di dwuma+ no mmma wiase nnnye wɔn adwene; efisɛ wiase su resesa.+
32 Me de, mempɛ sɛ dadwen hyɛ mo so.+ Ɔbarima a ɔnwaree no da dwen Awurade nneɛma ho, sɛnea ɔbɛsɔ Awurade ani.
33 Na ɔbarima warefo de, ɔda dwen+ wiase nneɛma ho, sɛnea ɔbɛsɔ ne yere ani,+
34 ne mu akyɛ. Bio nso, ɔbea a ɔnwaree anaa ɔbaabun da dwen Awurade nneɛma ho,+ sɛnea ɔbɛyɛ kronn ne nipadua ne ne honhom mu. Na ɔbea warefo de, ɔda dwen wiase nneɛma ho, sɛnea ɔbɛsɔ ne kunu ani.+
35 Mo ankasa yiyedi nti na mereka eyi, ɛnyɛ sɛ mede biribi rekyekyere mo, na mmom sɛnea ɛbɛma moayɛ nea ɛfata+ na moatumi asom Awurade daa a biribiara nnye mo adwene.+
36 Nanso sɛ obi dwen sɛ nea ɔreyɛ wɔ ne baabunyɛ ho mfata,+ na sɛ onii no nyɛ abofra bio a, ma ɔnyɛ nea ɔpɛ, sɛ saa na ɛsɛ sɛ ɛba a; ɔnyɛɛ bɔne. Ɔnware.+
37 Na sɛ obi asi gyinae ne koma mu, na hwee nhyɛ no so, na mmom ɔwɔ n’ankasa pɛ so tumi, na wasi gyinae yi wɔ n’ankasa koma mu sɛ ɔbɛtena ne baabunyɛ mu a, wayɛ no yiye.+
38 Na nea ɔde ne baabunyɛ ma aware nso ayɛ no yiye,+ nanso nea ɔmfa mma aware no ayɛ no yiye sen no.+
39 Bere a ɔbea kunu te ase no, wɔakyekyere no.+ Nanso sɛ ne kunu da na wansɔre a, ɔwɔ hokwan sɛ ɔware obiara a ɔpɛ, nanso Awurade mu nkutoo na ɔnyɛ saa.+
40 Nanso m’adwene ne sɛ, sɛ ɔtena hɔ sɛnea ɔte a, n’ani begye+ mmom. Misusuw sɛ mewɔ Onyankopɔn honhom+ nso.
