1 Samuel 2:1-36
2 Ɛnna Hanah bɔɔ mpae+ sɛ:“Me koma di Yehowa mu ahurusi,+Yehowa mu na wɔama m’abɛn so.+M’anom atrɛw m’atamfo so,Na wo nkwagye mu na midi ahurusi.+
2 Obiara nni hɔ a ɔyɛ kronkron sɛ Yehowa, obiara nni hɔ sɛ wo;+Ɔbotan bi nni hɔ sɛ yɛn Nyankopɔn.+
3 Mommfa ahomaso nnkasa bebree,Mommma nsɛnhunu biara mmfi mo anom,+Efisɛ Yehowa yɛ Onyankopɔn nimdefo,+Na ɔno na ɔkari+ nneyɛe nyinaa pɛpɛɛpɛ.
4 Ehu hyɛ ahoɔdenfo a wonim agyan tow mã,+Nanso wɔn a wɔyɛ mmerɛw ahoɔden dɔɔso.+
5 Wɔn a wɔmee no, wobedi paa ansa na wɔanya aduan,+Nanso ɔkɔm renne wɔn a wodi kɔm bio.+Obonin mpo awo mma baason,+Nanso ɔbea a ɔwɔ mma bebree no ho bɛkam.+
6 Yehowa na okum na ɔkora nkwa so,+Nea ɔma nnipa sian kɔ Adamoa*+ mu, na ɔma wofi hɔ ba.+
7 Yehowa ma onipa di hia,+ na ɔno na ɔma onipa di yiye,+Ɔno na ɔbrɛ onipa ase, na ɔno na ɔma onipa so.+
8 Ɔno na ɔma ɔbrɛfo so fi mfutuma mu,+Na ɔma ohiani so fi sumina so+Sɛ́ ɔde wɔn bɛtena adehye mu; ɔde anuonyam ahengua+ yɛ agyapade ma wɔn.+Yehowa na asase nnyinaso wɔ no,+Na ɔde asase asi so.
9 Ɔbɔ n’anokwafo nan ho ban,+Na nnebɔneyɛfo de, esum mu na wɔbɛma wɔaka wɔn ano atom,+Efisɛ ɛnyɛ ahoɔden so na onipa nam bedi nkonim.+
10 Wɔn a wɔne Yehowa di asi no, ehu bɛka wɔn;+Wɔn na ɔbɛma aprannaa abobom wɔ soro agu wɔn so.+Yehowa na obebu asase ano nyinaa atɛn,+Na wama ne hene ahoɔden,+Na wama nea wasra no no abɛn so.”+
11 Afei Elkana kɔɔ ne fie wɔ Rama. Abofra no de, ɔbɛyɛɛ Yehowa somfo+ wɔ ɔsɔfo Eli anim.
12 Ná Eli mma no yɛ mmarima ahuhufo;+ ná wommu Yehowa.+
13 Asɔfo ade a ɛsɛ sɛ ɔman no de ma wɔn no,+ nea na wɔyɛ no ni: Obiara a ɔbɛbɔ afɔre no, sɛ wɔrenoa+ nam no a, ɔsɔfo no somfo de adinam a ano yɛ abiɛsa ba,
14 na ɔde bɛbɔ ɔsɛn anaa kwansɛn anaa dadesɛn anaa kuku no mu. Nea adinam no beyi aba biara, ɔsɔfo no fa. Saa na wɔde yɛɛ Israelfo a wɔbaa Silo nyinaa.+
15 Bio nso, wonnya nhyew+ srade no, ɔsɔfo no somfo ba, na ɔbɛka kyerɛ nea ɔrebɔ afɔre no sɛ: “Ma me nam ma wɔntoto mma ɔsɔfo, na nammono mmom na obegye wo nkyɛn, na ɛnyɛ nam a wɔanoa.”+
16 Nanso sɛ onii no ka kyerɛ no sɛ: “Ma wonni kan nhyew srade no ansa,+ na ɛno akyi no wubetumi afa nea wo kra kɔn dɔ+ biara” a, ɔka sɛ: “Dabi, fa ma me seesei ara; anyɛ saa a, mɛfa no ahoɔden so!”+
17 Na asomfo no bɔne dɔɔso pii Yehowa anim,+ efisɛ mmarima no buu Yehowa afɔrebɔde animtiaa.+
18 Samuel somee+ wɔ Yehowa anim; ná ɔyɛ abofra a ɔhyɛ nwera asɔfotade.+
19 Afei nso na ne maame pam nwera atade nsasin ma no, na ɔde brɛ no daa afirihyia, bere a ɔne ne kunu ba bɛbɔ afirihyia afɔre no.+
20 Na Eli hyiraa+ Elkana ne ne yere sɛ: “Nea wode afɛm Yehowa no, Yehowa mma wunnya asefo mfi ɔbea yi mu mfa nhyɛ nea wode afɛm no no ananmu.”+ Afei wosiim kɔɔ wɔn kurom.
21 Ɛnna Yehowa twaa n’ani bɛhwɛɛ Hanah,+ na onyinsɛnee, na ɔwoo mmabarima baasa ne mmabea baanu.+ Na abofra Samuel nyinii Yehowa anim.+
22 Ná Eli abɔ akwakoraa posoposo, na ɔtee+ nea ne mmabarima no de reyɛ+ Israelfo no nyinaa ne sɛnea wɔne mmea a wɔsom ahyiae ntamadan no ano da+ no nyinaa.+
23 Nea na daa ɔka kyerɛ wɔn ne sɛ:+ “Dɛn nti na moyɛ nneɛma a ɛtete saa?+ Nea mete fa mo ho fi ɔmanfo no nyinaa nkyɛn yɛ bɔne nko.+
24 Dabi,+ me mma, nsɛm a wɔrekeka wɔ Yehowa man mu a meretete no nye.+
25 Sɛ onipa yɛ onipa bɔne+ a, Onyankopɔn besiesie ama no,+ na sɛ onipa yɛ Yehowa bɔne+ de a, hena na obesiesie ama no?”+ Nanso wɔantie wɔn papa nne,+ efisɛ afei de na Yehowa pɛ sɛ okunkum wɔn.+
26 Saa bere no nyinaa na abofra Samuel gu so renyin, na Yehowa ne nnipa nyinaa pɛɛ n’asɛm.+
27 Onyankopɔn nipa+ bi baa Eli nkyɛn bɛka kyerɛɛ no sɛ: “Nea Yehowa aka ni, ‘Ɛnyɛ me na miyii me ho adi kyerɛɛ wo nana fiefo bere a na wɔwɔ Egypt na wɔyɛ nkoa wɔ Farao fie no?+
28 Mepaw no fii Israel mmusuakuw nyinaa mu+ sɛ onni me sɔfo na ɔmforo m’afɔremuka+ na ɔmma ɔhyew afɔre wusiw ne ne hua mforo nkɔ soro, na ɔnhyɛ asɔfotade m’anim, na me nso mede nea Israelfo de bɔ afɔre ogya so nyinaa bɛma wo nana fiefo.+
29 Dɛn nti na mutiatia m’afɔrebɔ+ ne m’ayɛyɛde a mahyɛ wɔ me tenabea+ hɔ no so, na wudi wo mma ni sen me, sɛ mubedi me man Israel afɔrebɔde+ mu nea eye nyinaa de adɔ srade?+
30 “‘Ɛno nti, Yehowa, Israel Nyankopɔn asɛm ni: “Me ara na mekae sɛ, wo fie ne wo nana fie de, wɔbɛnantew m’anim akosi daa.”+ Nanso seesei de, nea Yehowa aka ni: “Ɛmpare me koraa, efisɛ wɔn a wodi me ni+ no, me nso medi wɔn ni,+ na wɔn a wobu me animtiaa no, meremfa wɔn nyɛ hwee.”+
31 Hwɛ! Nna bi reba a metwa wo basa ne wo nana fie basa akyene, na akwakoraa renka wo fie.+
32 Nneɛma pa a wɔbɛyɛ ama Israel nyinaa mu no, wo de, ɔtamfo na wubehu no wɔ me tenabea hɔ;+ akwakoraa de, ebi renka wo fie da.
33 Nanso wo ho nipa bi wɔ hɔ a merentwa no nkyene mfi m’afɔremuka no ho sɛnea ɛbɛyɛ a ɔbɛma w’aniwa asɛe na wo kra abotow; na wo fiefo dodow no ara bewuwu nnipa nkrante ano.+
34 Eyi ne sɛnkyerɛnne a ɛbɛba wo mmabarima baanu, Hofni ne Finehas+ so ma woahu: Wɔn baanu nyinaa bewuwu da koro.+
35 Na mɛma ɔsɔfo nokwafo+ bi so afa. Nea ɛwɔ me komam ne nea ɛwɔ me kra mu na ɔbɛyɛ; na mɛkyekye daa fie ama no, na ɔbɛnantew nea masra no+ no anim daa.
36 Na ɛbɛba sɛ obiara a ɔbɛka+ wo fie no bɛba abɛkotow no agye akatua ne paanoo kurukuruwa na waka sɛ: “Mesrɛ wo fa me hyɛ asɔfodwuma no biako mu na manya paanoo sin bi adi.”’”+
Ase Hɔ Nsɛm
^ Anaa “Sheol.” Nea ɛkyerɛ ne adesamma adamoa. Hwɛ Nkekaho 4.
