1 Samuel 20:1-42
20 Na Dawid guan+ fii Naiot wɔ Rama, na ɔbaa Yonatan anim bɛkae sɛ: “Dɛn na mayɛ?+ M’amumɔyɛ ne dɛn, na bɔne bɛn koraa na mayɛ wo papa a enti ɔrehwehwɛ me kra yi?”
2 Ɛnna ɔno nso ka kyerɛɛ no sɛ: “Ɛmpare wo!+ Worenwu. Hwɛ! Me papa renyɛ ade kɛse anaa ade ketewa bi, gye sɛ wayi me asotiw.+ Dɛn nti na me papa de asɛm yi behintaw me?+ Ɛremma saa da.”
3 Nanso Dawid kaa ntam kaa ho,+ na ɔkae sɛ: “Wo papa nim sɛ manya w’anim dom,+ enti ɔbɛka sɛ, ‘Mommma Yonatan nnhu eyi, anyɛ saa a, ɛbɛyɛ no yaw.’ Nanso, sɛ́ Yehowa te ase+ na wo kra nso te ase yi,+ ɔnammɔn pɛ na ɛda me ne owu ntam!”+
4 Na Yonatan ka kyerɛɛ Dawid sɛ: “Nea wo kra bɛka biara, mɛyɛ ama wo.”
5 Ɛnna Dawid ka kyerɛɛ Yonatan sɛ: “Hwɛ! Ɔkyena yɛ ɔsram foforo,+ na ɛsɛ sɛ me ne ɔhene tena ase didi, nanso gya me kwan ma menkɔ na memfa me ho nkohintaw+ wuram nkosi da a ɛto so abiɛsa no anwummere.
6 Sɛ wo papa hu sɛ minni hɔ a, ka sɛ, ‘Dawid srɛɛ me kwan sɛ ɔretu mmirika akɔ ne kurom Betlehem,+ efisɛ abusua no nyinaa afirihyia afɔrebɔ bi wɔ hɔ.’+
7 Sɛ ɔka sɛ, ‘Ɛnyɛ hwee!’ a, ɛnde na ɛyɛ asomdwoe ma w’akoa. Na sɛ ne bo fuw a, ɛnde hu sɛ wadwen me ho bɔne.+
8 Na yɛ w’akoa adɔe,+ efisɛ Yehowa apam+ na wo ne w’akoa ayɛ. Nanso sɛ amumɔyɛ bi wɔ me mu+ a, wo ara kum me, na dɛn nti na ɛsɛ sɛ wode me hyɛ wo papa nsa?”
9 Ɛnna Yonatan kae sɛ: “Ɛmpare wo! Sɛ mihu sɛ me papa anya adwene sɛ ɔbɛyɛ wo bɔne a, merenka nkyerɛ wo anaa?”+
10 Na Dawid ka kyerɛɛ Yonatan sɛ: “Sɛ wo papa ka asɛmmɔne bi kyerɛ wo a, hena na ɔbɛka akyerɛ me?”
11 Ɛnna Yonatan ka kyerɛɛ Dawid sɛ: “Wo de, bra ma yemfi adi nkɔ wuram.” Enti wɔn baanu fii adi kɔɔ wuram.
12 Na Yonatan ka kyerɛɛ Dawid sɛ: “Yehowa, Israel Nyankopɔn+ nyɛ ɔdansefo+ sɛ, ɔkyena anaa ɔkyena akyi saa bere yi, mɛhwɛ me papa adwene, na sɛ ɔwɔ Dawid ho adwempa a, mɛsoma aba wo nkyɛn abeyi wo asotiw.
13 Na sɛ ɛsɔ me papa ani sɛ ɔbɛyɛ wo bɔne, na manyi wo asotiw, na mannya wo kwan amma woankɔ asomdwoe mu a, Yehowa ntua Yonatan ka na ɔmfa bi nka ho.+ Yehowa nni w’akyi+ sɛnea odii me papa akyi no.+
14 Na wo, sɛ mete ase+ a, ɛnyɛ Yehowa adɔe na wobɛyɛ me, na manwu?+
15 Nyi w’adɔe mfi me fie da biara da.+ Na sɛ Yehowa twa Dawid atamfo a wɔwɔ asase so nyinaa gu a,
16 Yonatan din de, mma wonntwa mmfi Dawid fie.+ Ma Yehowa mmisa mfi Dawid atamfo nsam.”
17 Enti Yonatan san kaa Dawid ntam, ɔdɔ a ɔdɔ no nti; sɛnea ɔdɔ n’ankasa ne kra no, saa na ɔdɔɔ no.+
18 Na Yonatan ka kyerɛɛ no sɛ: “Ɔkyena yɛ ɔsram foforo,+ na wɔrenhu wo, efisɛ w’agua bɛda hɔ.
19 Ɛda a ɛto so abiɛsa no, obiara behu sɛ wunni hɔ; na bra faako a adwuma da no wukohintawee+ no, na tena ɔbo yi ho.
20 Na mɛtow agyan abiɛsa afa ho akɔ baabi a mede bɛkyerɛ no.
21 Na hwɛ! mɛsoma ɔsomfo no sɛ, ‘Kɔhwehwɛ agyan no.’ Sɛ meka kyerɛ ɔsomfo no sɛ, ‘Hwɛ! Agyan no wɔ wo nkyɛn hɔ na sesaw bra’ a, ɛnde bra, efisɛ sɛ́ Yehowa te ase yi,+ ɛkyerɛ sɛ asomdwoe wɔ hɔ ma wo, na asɛm biara nni hɔ.
22 Nanso sɛ meka kyerɛ abofra no sɛ, ‘Hwɛ! Agyan no wɔ nohoa’ a, ɛnde kɔ, efisɛ Yehowa agya wo kwan.
23 Na asɛm a yɛaka+ yi, nea me ne wo baanu nyinaa aka yi, ma Yehowa ntena me ne wo ntam nkosi daa.”+
24 Ɛnna Dawid de ne ho kohintaw wuram+ hɔ. Na ɔsram foforo dui no, ɔhene tenaa n’agua so sɛ ɔrebedidi.+
25 Ɔhene tenaa n’agua so sɛnea ɔyɛ daa no, agua a esi ɔdan ho no, na Yonatan ne no tena dii nhwɛanim, na Abner+ nso tenaa Saul nkyɛn. Dawid agua no de, na ɛda hɔ.
26 Na Saul anka hwee ɛda no, na ɔkae ne tirim sɛ: “Ɛbɛyɛ sɛ biribi nti ne ho ntew,+ efisɛ onnwiraa ne ho.”
27 Na ɛda a edi ɔsram foforo no akyi, da a ɛto so abien no, ná Dawid agua no da hɔ ara. Enti Saul bisaa ne ba Yonatan sɛ: “Dɛn nti na nnɛra ne nnɛ nyinaa Yese+ ba no ammedidi?”
28 Ɛnna Yonatan buaa Saul sɛ: “Dawid srɛɛ me kwan sɛ ɔrekɔ Betlehem.+
29 Ɔka kyerɛɛ me sɛ, ‘Mesrɛ wo, gya me kwan, efisɛ yɛwɔ abusua afɔrebɔ wɔ kurow no mu, na me nua ahyɛ me sɛ memmra. Enti sɛ manya w’anim dom a, mesrɛ wo, ma memmɔ hwii nkɔ nkɔhwɛ me nuanom no.’ Ɛno nti na wamma ɔhene pon ho yi.”
30 Ɛnna Saul bo fuw+ Yonatan pii, na ɔka kyerɛɛ no sɛ: “Wo, abaawa tuatewfo ba.+ Minim sɛ woapaw Yese ba no de rehyɛ wo ara wo ho ne wo maame+ adagyaw aniwu.
31 Nna dodow a Yese ba no da so te ase asase so yi, wo ne w’ahenni rentim da.+ Enti soma ma wɔnkɔfa no mmrɛ me, efisɛ ɔfata owu.”+
32 Ɛnna Yonatan bisaa ne papa Saul sɛ: “Dɛn nti na ɛsɛ sɛ wokum no?+ Dɛn na wayɛ?”+
33 Ɛnna Saul tow peaw sɛ ɔde rewɔ no,+ na Yonatan hui sɛ ne papa asi ne bo sɛ obekum Dawid.+
34 Ɛhɔ ara na Yonatan de abufuw+ sɔre fii ɔpon no ho, na wannidi ɔsram foforo no da a ɛto so abien no, efisɛ Dawid asɛm no yɛɛ no yaw,+ na ne papa guu n’anim ase.+
35 Na anɔpa no, Yonatan pue kɔɔ wuram faako a Dawid ne no hyehyɛe no,+ na ɔsomfo kumaa bi kaa ne ho.
36 Ɛnna ɔka kyerɛɛ ne somfo no sɛ: “Mesrɛ wo, tu mmirika na kɔhwehwɛ agyan a merebɛtow+ no.” Na ɔsomfo no tuu mmirika, na ɔno nso tow agyan no traa no.
37 Bere a ɔsomfo no kɔe ara koduu faako a Yonatan tow agyan no kogui no, Yonatan teɛɛm wɔ ɔsomfo no akyi sɛ: “Ɛnyɛ w’anim nohoa na agyan no wɔ?”+
38 Na Yonatan teɛɛm wɔ ɔsomfo no akyi sɛ: “Ma wo ho nyɛ hare! Yɛ ntɛm! Nnyina faako!” Na Yonatan somfo no tasee agyan no, na ɔbaa ne wura nkyɛn.
39 Ɔsomfo no de, na onnim nea ɛrekɔ so; Yonatan ne Dawid nkutoo na na wonim asɛm no.
40 Ɛno akyi no, Yonatan de n’akode no maa ne somfo no, na ɔka kyerɛɛ no sɛ: “Kɔ, fa kɔ kurow no mu.”
41 Na ɔsomfo no kɔe. Dawid de, ɔsɔre fii nkyɛn hɔ baabi wɔ anafo fam bae. Ɛnna ɔde n’anim butuw fam,+ na ɔbɔɔ ne mu ase mprɛnsa, na obiara few ne yɔnko ano,+ na obiara sũũ ne yɔnko maa Dawid de boroo so.+
42 Na Yonatan ka kyerɛɛ Dawid sɛ: “Fa asomdwoe kɔ,+ efisɛ yɛn baanu nyinaa aka ntam+ Yehowa din mu sɛ, ‘Yehowa ntena me ne wo ne m’asefo ne w’asefo ntam nkosi daa.’”+
Ɛnna Dawid sɔre siim kɔɔ ne kwan, na Yonatan nso kɔɔ kurow no mu.
