1 Timoteo 5:1-25
5 Ntwiw ɔpanyin anim.+ Mmom no, wo ne no nni sɛ agya, mmerante sɛ nuabarimanom,
2 mmea mpanyimfo+ sɛ ɛnanom, mmabaa sɛ nuabeanom,+ ahotew nyinaa mu.
3 Di akunafo a wɔyɛ akunafo ankasa no ni.+
4 Na sɛ okunafo bi wɔ mma anaa mmanana a, ma wonsua sɛ wobedi kan ada onyamesom pa adi wɔ wɔn ankasa afie+ na wɔatua wɔn awofo+ ne wɔn nananom ka sɛnea ɛsɛ, efisɛ eyi na ɛsɔ Onyankopɔn ani.+
5 Na ɔbea a ɔyɛ okunafo ankasa a ahia no+ de n’ani to Onyankopɔn so,+ na okura nkotɔsrɛ ne mpaebɔ mu adesae ne adekyee.+
6 Nanso nea ɔde ne ho ma ɔhonam akɔnnɔ+ no te ase de, nanso wawu.+
7 Enti kɔ so fa ahyɛde+ ahorow yi ma, na obi annya wɔn ho asɛm anka.+
8 Nokwasɛm ni, sɛ obi nhwɛ n’ankasa ne nnipa,+ ne ne titiriw no, ne fiefo+ a, wapa+ gyidi+ no, na ɔyɛ onipa bɔne sen nea onnye nni mpo.
9 Ansa na wɔde okunafo bi din bɛka ho no, na wadi mfe aduosia, na ɛsɛ sɛ ɔyɛ okunu biako yere,+
10 nea wodi ne ho adanse sɛ ɔyɛɛ nnwuma pa,+ ɔtetee mma,+ ogyee ahɔho,+ ɔhohoroo akronkronfo nan ho,+ ɔboaa wɔn a wɔwɔ ahohia mu,+ ɔde nsiyɛ dii adwuma pa biara akyi.+
11 Nanso mfa akunafo a wonnyinii nka ho, efisɛ sɛ ɛba sɛ wɔn nna ho nkate yi wɔn adwene fi Kristo so a,+ wɔpɛ sɛ wɔware,
12 na wonya atemmu efisɛ wɔapo wɔn kan gyidi no.+
13 Bere koro no ara nso wosua anihaw, nenam afie afie mu kwa; na ɛnyɛ sɛ wɔnyɛ hwee nko, na mmom wodi nseku de wɔn ho gyigye nkurɔfo nsɛm mu+ nso, na wɔkeka nsɛm a ɛnsɛ sɛ wɔka.
14 Enti mepɛ sɛ akunafo a wonnyinii no ware,+ wo mma+ hwɛ fie, na wɔamma ɔtamfo annya hokwan ansopa yɛn.+
15 Nokwarem no, ebinom aman akodi Satan akyi dedaw.
16 Sɛ ɔbea gyidini bi wɔ akunafo a, ma ɔmmoa wɔn+ na ammɛyɛ adesoa anto asafo no so. Ɛno bɛma wɔatumi aboa wɔn a wɔyɛ akunafo ankasa no.+
17 Wɔmfa nidi+ mmɔho mma mpanyimfo a wodi nneɛma anim+ yiye no, ne titiriw no wɔn a wɔbɔ wɔn ho mmɔden wɔ ɔkasa ne ɔkyerɛkyerɛ mu no.+
18 Na kyerɛwsɛm no ka sɛ: “Nkyekyere nantwi ano bere a ɔreporow awi+”; afei: “Odwumayɛni akatua sɛ no.”+
19 Nnye sobo a wɔbɔ ɔpanyin ntom, gye sɛ egyina adansefo baanu anaa baasa anom asɛm so.+
20 Wɔn a wɔte bɔne+ mu no, yi wɔn ntɛn+ wɔ wɔn a wɔwɔ hɔ nyinaa anim, na ama wɔn a aka no nso asuro.+
21 Mehyɛ wo Onyankopɔn ne Kristo Yesu+ ne abɔfo a wɔapaw wɔn no anim sɛ di eyinom ho dwuma a womfa ahopere mmu atɛn, na womfa animhwɛ+ nyɛ biribiara.
22 Mpere wo ho mfa wo nsa+ ngu obi so+ da; mma afoforo bɔne nso mmmɛka wo;+ kɔ so yɛ kronn.+
23 Nnom nsu bio, na mmom wo yafunu ne yare a wotaa yare nti, nom bobesa+ kakra.
24 Nnipa binom bɔne da adi ma obiara hu,+ na ekowie atemmu mu, nanso afoforo bɔne da adi akyiri yi.+
25 Saa ara na nnwuma pa nso da adi ma obiara hu,+ na nea ɛnna adi mpo no, ɛso ntumi nkata daa.+
