1 Yohane 3:1-24
3 Monhwɛ ɔdɔ ko+ a Agya no de adom yɛn, sɛ wɔmfrɛ yɛn Onyankopɔn mma;+ saa na ɛte nso. Eyi nti na wiase+ no nnim yɛn, efisɛ ennim no.+
2 Adɔfo, seesei yɛyɛ Onyankopɔn mma,+ nanso nea yɛbɛyɛ nnya nnaa adi.+ Yenim sɛ bere biara a wobeyi no adi no,+ yɛbɛyɛ sɛ ɔno,+ efisɛ yebehu no sɛnea ɔte ankasa.+
3 Na obiara a ɔwɔ saa anidaso yi tew ne ho+ sɛnea ɔno nso ho tew no.+
4 Obiara a ɔte bɔne+ mu no te mmarato+ mu nso, enti bɔne+ yɛ mmarato.
5 Munim nso sɛ ɔno de, woyii no adi sɛ ommeyi yɛn bɔne mfi hɔ,+ na bɔne+ nni ne mu.
6 Obiara a ɔne no ayɛ biako+ no ntena bɔne+ mu; obiara a ɔte bɔne mu no nhuu no, na onnim no nso.+
7 Mma nkumaa, mommma obiara nnnaadaa mo; nea ɔyɛ adetrenee no yɛ ɔtreneeni, sɛnea ɔno nso yɛ ɔtreneeni no.+
8 Nea ɔte bɔne mu no fi Ɔbonsam, efisɛ Ɔbonsam na wayɛ bɔne fi mfiase.+ Eyi nti na woyii Onyankopɔn Ba no adi,+ sɛnea ɔbɛsɛe Ɔbonsam nnwuma.+
9 Obiara a Onyankopɔn awo no no ntena bɔne mu,+ efisɛ N’aba te onii no mu, na ontumi ntena bɔne mu, efisɛ Onyankopɔn na wawo no.+
10 Nokwasɛm a ɛma Onyankopɔn mma ne Ɔbonsam mma da adi pefee ni: Obiara a ɔnyɛ adetrenee+ no mfi Onyankopɔn mu, na saa ara na nea ɔnnɔ ne nua no nso mfi ne mu.+
11 Eyi ne asɛm a moate fi mfiase+ no, sɛ yɛnnodɔ yɛn ho;+
12 ɛnyɛ sɛ Kain a ofi ɔbɔnefo no mu na okum+ ne nua no. Na adɛn nti na okum no? Efisɛ na n’ankasa nnwuma yɛ bɔne,+ na ne nua no de teɛ.+
13 Anuanom, mommma ɛnnyɛ mo nwonwa sɛ wiase tan mo.+
14 Yenim sɛ yefi owu mu atwam aba nkwa mu,+ efisɛ yɛdɔ anuanom.+ Nea onni dɔ no te owu mu.+
15 Obiara a ɔtan+ ne nua no yɛ owudifo,+ na munim sɛ owudifo+ biara nni hɔ a daa nkwa te ne mu.+
16 Eyi na ama yɛahu ɔdɔ,+ efisɛ ɔno na ɔde ne kra too hɔ maa yɛn;+ na ɛyɛ yɛn asɛde sɛ yɛde yɛn kra to hɔ ma yɛn nuanom.+
17 Na obiara a ɔwɔ wiase asetenade+ na ohu sɛ ahia ne nua+ na onhu no mmɔbɔ no,+ Onyankopɔn dɔ te ne mu dɛn?+
18 Mma nkumaa, mommma yɛmmfa ano anaa tɛkrɛma+ nnnɔ,+ na mmom yɛnyɛ no nneyɛe+ ne nokware mu.+
19 Eyi na ɛbɛma yɛahu sɛ yefi nokware no mu,+ na yɛbɛma yɛn koma awerɛhyem n’anim
20 wɔ biribiara a yɛn koma bebu yɛn fɔ mu,+ efisɛ Onyankopɔn sõ sen yɛn koma na onim nneɛma nyinaa.+
21 Adɔfo, sɛ yɛn koma mmu yɛn fɔ a, ɛnde yetumi de ahotoso kasa wɔ Onyankopɔn anim;+
22 na biribiara a yebisa no,+ yenya fi ne hɔ, efisɛ yedi n’ahyɛde so na yɛyɛ nea ɛsɔ n’ani.+
23 N’ahyɛde no ara ni, sɛ yennya gyidi wɔ ne Ba Yesu Kristo din mu+ na yɛnnodɔ yɛn ho,+ sɛnea ahyɛde a ɔde maa yɛn no kyerɛ.
24 Bio nso nea odi n’ahyɛde so no ne no yɛ biako, na ɔno nso ne onii no yɛ biako;+ na nea ɛma yehu sɛ ɔne yɛn yɛ biako+ ne honhom+ a ɔde maa yɛn no.
