2 Beresosɛm 26:1-23
26 Ɛnna Yuda man+ no nyinaa faa Usia*+ a na wadi mfe dunsia no, na wosii+ no hene ma odii ne papa Amasia+ ade.
2 Ɔno na ɔkyekyee Elot+ na ɔsan de maa Yuda bere a ɔhene no ne n’agyanom kɔdae no.+
3 Usia+ bedii ade no, na wadi mfe dunsia, na odii hene mfe aduonum abien wɔ Yerusalem. Ne maame din de Yekolia,+ na ofi Yerusalem.
4 Ɔyɛɛ nea ɛteɛ Yehowa ani so+ sɛnea ne papa Amasia yɛe no ara.+
5 Na ɔkɔɔ so hwehwɛɛ+ Onyankopɔn bere a Sakaria a ɔkyerɛɛ no nokware Nyankopɔn suro te ase no;+ nna a ɔhwehwɛɛ Yehowa no nyinaa, nokware Nyankopɔn ma esii no yiye.+
6 Na ofii adi ne Filistifo+ kɔkoe, na obuu Gat+ fasu ne Yabne+ fasu ne Asdod+ fasu guu mu. Ɛno akyi no, ɔkyekyee nkurow wɔ Asdod+ asase so ne Filistifo mu.
7 Nokware Nyankopɔn boaa+ no tiaa Filistifo ne Arabiafo+ a wɔtete Gurbaal ne Meunimfo+ no.
8 Na Ammonfo+ fii ase tuaa tow+ maa Usia. Ne din+ kɔɔ akyirikyiri koduu Egypt mpo, efisɛ onyaa ahoɔden boroo so.
9 Bio nso, Usia totoo abantenten+ wɔ Twea Pon+ ne Obon Pon+ no ho ne Ahyiaeso hɔ wɔ Yerusalem, na ɔhyehyɛɛ no den.
10 Afei nso ɔtotoo abantenten+ sare so, na otutuu mmura pii (efisɛ na ɔwɔ nyɛmmoa bebree pa), na ɔyeyɛɛ bi nso wɔ Sefela+ ne asase tratraa so. Ná ɔwɔ akuafo ne bobeturo so ahwɛfo wɔ mmepɔw so ne Karmel, efisɛ na ɔpɛ kuadwuma.
11 Usia nyaa asraafo akuwakuw a wɔkɔ ɔsa,+ na wɔn a wɔkan asraafo no kyerɛkyerɛw wɔn din+ ne ɔkyerɛwfo+ Yeiel ne ɔpanyin Maaseia a ɔhyɛ+ Hanania, ɔhene mpanyimfo+ so otitiriw ase no.
12 Agyanom abusuafie+ mpanyimfo a wɔwɔ mmarima akokodurufo+ a wɔn ho yɛ den+ no nyinaa dodow yɛ mpem abien ahansia.
13 Dɔm a wɔhyɛ wɔn ase yɛ mpem ahasa ne mpemnson ahanum, wɔyɛ nnɔmmarima a wɔboa ɔhene ko tia n’atamfo.+
14 Na Usia yɛɛ akyɛm+ ne mpeaw+ ne nnade kyɛw+ ne akotade+ ne agyan+ ne akorabo+ maa asraafo no nyinaa.
15 Afei ɔmaa mfiriyɛfo yeyɛɛ mfiri a wɔde tow akode wɔ Yerusalem, na wɔde sisii abantenten+ so ne ntwea so, sɛ wɔmfa ntow agyan ne abo akɛse. Ɛno nti ne din+ kɔɔ akyirikyiri, na wɔboaa no pii kosii sɛ ɔyɛɛ den.
16 Nanso ɔyɛɛ den ara pɛ, ne koma maa ne ho so+ de no kɔɔ ɔsɛe mu;+ wanni Yehowa ne Nyankopɔn nokware, na ɔkɔɔ Yehowa asɔrefie hɔ sɛ ɔrekɔhyew aduhuam wɔ aduhuam afɔremuka no so.+
17 Ɛhɔ ara na ɔsɔfo Asaria ne Yehowa asɔfo a wɔka ne ho, mmarima akokodurufo aduɔwɔtwe, baa no so.
18 Ɛnna wɔsɔre gyinae, na wɔka kyerɛɛ Ɔhene Usia+ sɛ: “Usia, ɛnyɛ w’adwuma+ sɛ wobɛhyew aduhuam ama Yehowa; Aaron+ mma asɔfo a wɔayɛ wɔn kronkron no na ɛyɛ wɔn adwuma sɛ wɔhyew aduhuam. Fi kronkronbea ha kɔ, na woafom; eyi nyɛ anuonyam+ bi mma wo wɔ Yehowa Nyankopɔn anim.”
19 Nanso Usia bo fuwii.+ Saa bere no na okura aduhuamhyew ade+ no, na bere a ɔfaa asɔfo no ho abufuw no, kwata+ fifii ne moma so prɛko pɛ,+ asɔfo no anim wɔ aduhuam afɔremuka no nkyɛn, Yehowa fie hɔ.
20 Bere a ɔsɔfo panyin Asaria ne asɔfo no nyinaa twaa wɔn ani hwɛɛ no no, hwɛ, kwata na afifi ne moma so yi!+ Enti wɔyɛɛ ntɛm piapiaa no fii hɔ, na ɔno nso de ahoɔhare fii adi, efisɛ na Yehowa abɔ no.+
21 Na Ɔhene Usia+ yaree kwata kosii ne wuda; ɔkɔtenaa ofie bi mu, na wanyɛ adwuma bio, ne kwata+ no nti; wosiw no Yehowa fie kɔ kwan, na ne ba Yotam na ɔhwɛɛ ahemfie no so, na ɔno na obuu ɔman no mu nnipa atɛn.
22 Usia ho nsɛm a aka,+ ne mfiase kosi n’awiei no, Amus+ ba odiyifo Yesaia+ akyerɛw ato hɔ.
23 Na Usia ne n’agyanom kɔdae, na wosiee no kaa n’agyanom ho, nanso ahene amusiei asase no so baabi na wosiee no,+ efisɛ wɔkae sɛ: “Ɔyɛ ɔkwatani.” Na ne ba Yotam+ bedii n’ade.
Ase Hɔ Nsɛm
^ Wɔsan frɛ no Asaria wɔ 2Ahe 14:21; 15:1.
