2 Ahene 18:1-37
18 Ɛbae sɛ Ela ba, Israel hene Hosea+ afe a ɛto so abiɛsa mu no, Yuda hene Ahas+ ba Hesekia+ bedii hene.
2 Obedii ade no na wadi mfe aduonu anum, na odii hene mfe aduonu akron wɔ Yerusalem. Ne maame din de Abi a ɔyɛ Sakaria ba.+
3 Na ɔyɛɛ nea ɛteɛ Yehowa ani so+ sɛnea ne nana Dawid yɛe no ara.+
4 Ɔno na oyiyii sorɔnsorɔmmea no,+ na obubuu abosom adum+ no pasaa, otwitwaa ɔbosom+ dua no, na obubuu kɔbere ɔwɔ+ a Mose yɛe+ no nso pasaa, efisɛ ɛde besi saa bere no, na Israelfo hyew afɔrebɔde+ ma no, na wɔfrɛɛ no kɔbere ɔwɔ honi.+
5 Yehowa, Israel Nyankopɔn so na ɔde ne ho toe;+ n’akyi no, obiara amma sɛ ɔno, Yuda ahene mu,+ na obiara anni n’anim saa.+
6 Ɔbataa Yehowa ho.+ Wannan amfi n’akyi, na mmom odii Yehowa mmara nsɛm a ɔhyɛɛ Mose no so.+
7 Yehowa dii n’akyi.+ Ɔyɛɛ n’ade nyansam wɔ biribiara mu;+ ɔtew Asiria hene so atua, na wansom no.+
8 Ɔno na okunkum Filistifo+ koduu Gasa+ ne n’ahye so, efi awɛmfo aban+ so kosi kurow a wɔabɔ ho ban so.
9 Na Ɔhene Hesekia afe a ɛto so anan a ɛyɛ Ela ba, Israel hene Hosea+ afe a ɛto so ason mu no, Asiria hene Salmaneser+ baa Samaria so betwaa ho hyiae.+
10 Mfe abiɛsa rekɔ awiei no, odii so nkonim;+ Hesekia afe a ɛto so asia a ɛyɛ Israel hene Hosea afe a ɛto so akron mu na wodii Samaria so nkonim.+
11 Ɛno akyi no, Asiria hene+ de Israelfo kɔɔ nkoasom mu+ wɔ Asiria, na ɔde wɔn kɔtenatenaa Hala+ ne Habor+ wɔ asubɔnten Gosan ho ne Mediafo nkurow mu,+
12 efisɛ wɔantie+ Yehowa wɔn Nyankopɔn nne, na mmom wobuu n’apam+ so, kyerɛ sɛ, nea Yehowa akoa Mose+ hyɛɛ wɔn+ no nyinaa; wɔantie na wɔanyɛ.
13 Ɔhene Hesekia afe a ɛto so dunan mu no, Asiria hene+ Senaherib+ baa Yuda nkurow a wɔabɔ ho ban no nyinaa so bɛfae.
14 Ɛnna Yuda hene Hesekia soma kɔɔ Asiria hene nkyɛn wɔ Lakis sɛ: “Mayɛ bɔne. San fi me so, na nea wode bɛto me so biara, metua.”+ Enti Asiria hene kae sɛ Yuda hene Hesekia ntua dwetɛ dwetikɛse+ ahasa ne sika dwetikɛse aduasa.
15 Na Hesekia de dwetɛ a ɛwɔ Yehowa fie+ ne ahemfie akorade mu no nyinaa maa no.+
16 Saa bere no, Hesekia twitwaa Yehowa asɔrefie no apon+ ne apongua a Yuda hene Hesekia de sika duraa ho+ no, na ɔde maa Asiria hene.
17 Na Asiria+ hene somaa Tartan+ ne Rabsaris ne Rabsake+ fii Lakis+ de asraafodɔm kɛse kaa wɔn ho sɛ wɔnkɔ Ɔhene Hesekia nkyɛn wɔ Yerusalem, enti wosiim kɔɔ Yerusalem. Wɔkɔe no, wokogyinaa atifi fam ɔtare+ no suka+ ho, ɔtempɔn a ɛkɔ ntamasifo asase+ so no so.
18 Na wɔteɛɛm frɛɛ ɔhene no, na Hilkia ba Eliakim+ a ɔyɛ ofiepanyin, ne Sebna+ a ɔyɛ ɔkyerɛwfo, ne Asaf ba Yoa a ɔyɛ ɔhene krakye behyiaa wɔn.
19 Ɛnna Rabsake+ ka kyerɛɛ wɔn sɛ: “Monkɔka nkyerɛ Hesekia sɛ, ‘Nea ɔhenkɛse,+ Asiria hene, aka ni: “Dɛn koraa na wode wo ho ato so yi?+
20 Woaka sɛ, ‘Mewɔ nyansa+ ne ahoɔden a metumi de ako,’ nanso ne nyinaa yɛ anosɛm ara kwa. Hwɛ, hena koraa na wode wo ho ato no so a enti woatew atua+ atia me yi?
21 Wo ara hwɛ! Egypt+ na wode wo ho ato no so, demmire+ a emu abu a sɛ onipa tweri a ɛbɛwɔ ne nsam ahwirew mu yi. Saa na Egypt hene Farao+ te ma wɔn a wɔde wɔn ho to no so nyinaa.
22 Na sɛ moka kyerɛ me sɛ, ‘Yehowa,+ yɛn Nyankopɔn na yɛde yɛn ho ato no so’+ a, ɛnyɛ ɔno ara na Hesekia+ atutu ne sorɔnsorɔmmea+ ne n’afɔremuka na waka akyerɛ Yuda ne Yerusalem sɛ: ‘Afɔremuka yi anim na monkotow wɔ Yerusalem’ no?”’+
23 Afei wopɛ a, wo ne me wura Asiria hene nto nkyia+ na memma wo apɔnkɔ mpem abien, na hwɛ sɛ wubetumi anya mmarima atenatena so anaa.+
24 Na sɛ nteaseɛnam+ ne apɔnkɔsotefo+ nti na wode wo ho ato Egypt so a, wobɛyɛ dɛn atumi ako atia me wura nkoa nkumaa no mu amrado+ biako mpo?
25 Mugye di sɛ Yehowa amma me kwan a anka mɛba sɛ merebɛsɛe ha? Yehowa na ɔka kyerɛɛ me sɛ,+ ‘Kɔ asase yi so na kɔsɛe no.’”
26 Ɛnna Hilkia ba Eliakim+ ne Sebna+ ne Yoa+ ka kyerɛɛ Rabsake+ sɛ: “Yɛsrɛ wo, wo ne wo nkoa nka Siria kasa,+ na yɛte; wo ne yɛn nnka Yudafo kasa+ mmma nkurɔfo a wɔwɔ ɔfasu no so no nnte.”
27 Nanso Rabsake ka kyerɛɛ wɔn sɛ: “Mo wura ne mo nti na me wura somaa me sɛ memmɛka nsɛm yi anaa? Ɛnyɛ wɔn a wɔtete ɔfasu no so nti, sɛnea ɛbɛma wɔadi wɔn tiafi+ na wɔanom wɔn dwensɔ sɛ mo ara?”+
28 Afei Rabsake gyinaa yiye, na ɔde nne kɛse teɛɛm wɔ Yudafo kasa+ mu kae sɛ: “Muntie ɔhenkɛse,+ Asiria hene no, nsɛm.
29 Nea ɔhene aka ni, ‘Mommma Hesekia nnnaadaa mo, na ɔrentumi nnye mo mfi me nsam.+
30 Munnni Hesekia akyi mmfa mo ho nnto Yehowa so+ nnka sɛ: “Ogye na Yehowa begye+ yɛn, na ɔremfa kurow yi nhyɛ Asiria hene nsa.”+
31 Munntie Hesekia, na Asiria hene aka sɛ: “Mungow mo ho mma me na mommra me nkyɛn na obiara nni n’ankasa bobe ne ne borɔdɔma,+ na ɔnnom n’ankasa abura mu nsu,+
32 nkosi sɛ mɛba abɛfa mo akɔ asase a ɛte sɛ mo ara mo asase so,+ asase a awi ne nsã foforo wɔ so, asase a paanoo+ ne bobe nturo+ wɔ so, asase a ngodua ne ɛwo+ wɔ so, na moatena nkwa mu, na moanwuwu. Munntie Hesekia efisɛ sɛ ɔka sɛ, ‘Yehowa begye yɛn’+ a, na ɔredaadaa mo.
33 Amanaman no anyame no bi atumi agye+ ne nkurɔfo afi Asiria hene nsam pɛn?+
34 Hamat+ ne Arpad+ anyame no wɔ he? Sefarwayim+ ne Hena+ ne Iwa+ anyame no nso wɔ he? Wɔatumi agye Samaria afi me nsam anaa?+
35 Amanaman no anyame nyinaa mu hena na watumi agye ne man afi me nsam+ a enti Yehowa betumi agye Yerusalem afi me nsam?”’”+
36 Nanso nkurɔfo no yɛɛ komm+ na wɔanka asɛm biara,+ efisɛ na ɔhene aka sɛ: “Mummmua no.”+
37 Ɛnna Hilkia ba Eliakim+ a ɔyɛ ofiepanyin, ne Sebna+ a ɔyɛ ɔkyerɛwfo, ne Asaf ba Yoa+ a ɔyɛ ɔhene krakye sunsuan wɔn ntade mu,+ kɔɔ Hesekia nkyɛn, na wɔkaa Rabsake nsɛm no kyerɛɛ no.
