2 Korintofo 12:1-21
12 Ɛsɛ sɛ mehoahoa me ho. Mfaso nni so; nanso mereba Awurade anisoadehu+ ne n’adiyi so.
2 Minim onipa bi wɔ Kristo mu a mfe dunan ni wohwim no—sɛ ɛyɛ ɔhonam mu oo, sɛ ɛnyɛ ɔhonam mu oo, minnim; Onyankopɔn na onim—na wɔde no kɔɔ+ ɔsoro a ɛto so abiɛsa.
3 Yiw, minim saa onipa no—sɛ ɛyɛ ɔhonam mu oo, sɛ ɛnyɛ ɔhonam oo,+ minnim; Onyankopɔn na onim—
4 na wohwim no kɔɔ paradise,+ na ɔtee nsɛm a wɔmmɔ so a mmara mma ho kwan sɛ onipa ka.
5 Obi a ɔte saa ho na mɛhoahoa me ho, na m’ankasa de, merenhoahoa me ho, gye me mmerɛwyɛ ho.+
6 Na sɛ mepɛ sɛ mehoahoa me ho+ nso a, anka ɛrenyɛ ade a ntease nnim, efisɛ nea mɛka no bɛyɛ nokware. Nanso merenyɛ saa, na obi ammu me ankyɛn sɛnea ohu me anaasɛ nea ɔte fi m’ano,
7 adiyi dodow no nti.
Enti, nea ɛbɛyɛ na meremma me ho so mmoro so no,+ wɔama me ɔhonam mu nsɔe,+ Satan bɔfo, sɛ ɔmmɛbobɔ me na mamma me ho so ammoro so.
8 Eyi nti mesrɛɛ Awurade mprɛnsa+ sɛ emfi me so;
9 nanso nea ɔka kyerɛɛ me ne sɛ: “M’adom no ara dɔɔso+ ma wo; me tumi wie pɛyɛ wɔ mmerɛwyɛ mu.”+ Enti mede anigye kɛse bɛhoahoa me ho me mmerɛwyɛ ho+ mmom, na Kristo ahoɔden atena me so sɛ ntamadan.
10 Enti mmerɛwyɛ, ahohora, ohia, ɔtaa, ne ahokyere a Kristo nti mihyia no yɛ anigyesɛm ma me. Efisɛ meyɛ mmerɛw mmom a na minya ahoɔden.+
11 Mayɛ obi a ɔnte asɛm ase. Mo na mohyɛɛ me,+ efisɛ ɛsɛ sɛ anka mokamfo me. Na sɛ mensɛ hwee mpo a, biribiara nni hɔ a mo asomafo ahotefo+ no de kyɛn me.+
12 Ɔsomafo nsɛnkyerɛnne+ no daa adi mo mu wɔ boasetɔ nyinaa mu,+ ɛne nsɛnkyerɛnne ne anwonwade ne ahoɔdenne mu.+
13 Sɛ ɛnyɛ adesoa a manyɛ amma mo+ no a, dɛn bio nti na moanto asafo a aka no? Mesrɛ mo, momfa mfomso yi mfiri me.
14 Hwɛ, ne mprɛnsa so+ ni a masiesie me ho sɛ mereba mo nkyɛn, nanso merenyɛ mo so adesoa. Efisɛ menhwehwɛ mo ahode,+ na mmom mo ankasa; na ɛnyɛ mma+ na ɛpɛ ade ma wɔn awofo, na mmom awofo na ɛsɛ sɛ wɔpɛ ade ma wɔn mma.+
15 Na me de, mifi anigye kɛse mu de me ho nneɛma bɛma na mede me ho ama mo kra+ korakora. Sɛ medɔ mo boro so saa a, so ɛsɛ sɛ ɔdɔ a mowɔ ma me no tɔ sin?
16 Ne nyinaa mu no, manyɛ mo so adesoa.+ Nanso moka sɛ meyɛ “onitefo” na mede “nnɛɛdɛɛ” na enyaa mo.+
17 Wɔn a mesomaa wɔn mo nkyɛn no, so menam wɔn mu bi so hwehwɛɛ mo ho mfaso?
18 Mesrɛɛ Tito, na mesomaa onua no kaa ne ho. Tito hwehwɛɛ mo ho mfaso bi anaa?+ So yɛannantew honhom koro+ no ara mu? Yɛantutu anammɔn koro no ara?
19 Saa bere yi nyinaa mususuw sɛ yɛreyi yɛn ano akyerɛ mo? Onyankopɔn anim na yɛkasa wɔ Kristo mu. Nanso adɔfo, ade nyinaa wɔ hɔ ma mo denhyɛ.+
20 Na misuro sɛ, sɛ meba+ a, ebia meremmɛto mo sɛnea mepɛ, na me nso morenhu me sɛnea mopɛ, na mmom nea ebia ɛrekɔ so ne ntawntawdi, ahoɔyaw,+ abufuw, mansotwe, anoɔyaw, nsekudi, ahomaso, sakasakayɛ.+
21 Ebia meba bio a, me Nyankopɔn bɛbrɛ me ase wɔ mo mu, na madi wɔn a wɔayɛ bɔne+ a wɔnsakraa wɔn adwene wɔn afide ne aguamammɔ+ ne ahohwisɛm+ a wodii ho no pii ho awerɛhow.
