Adiyisɛm 18:1-24
18 Eyinom akyi no, mihuu ɔbɔfo foforo sɛ ofi soro resian a ɔwɔ tumi+ kɛse; na n’anuonyam hyerɛn asase so.+
2 Na ɔde nne kɛse teɛɛm+ sɛ: “Wahwe ase! Babilon Kɛse no ahwe ase,+ na wabɛyɛ adaemone tenabea ne mframa+ fĩ biara atɛwee ne anomaa biara a ne ho ntew na ɛyɛ abofono atɛwee!+
3 Na n’aguamammɔ abufuw nsã no anya amanaman nyinaa,+ na asase so ahene ne no bɔɔ aguaman,+ na asase so aguadifo+ nyaa wɔn ho esiane ne taamudi tumi nti.”+
4 Na metee nne foforo fii soro sɛ: “Mumfi ne mu, me man,+ sɛ mompɛ sɛ munya ne bɔne no mu kyɛfa+ na munya ne haw no bi a.
5 Na ne bɔne no aboaboa ano akodu soro,+ na Onyankopɔn akae ne nnebɔne no.+
6 Nea ɔde tuaa mo ka no, momfa saa ara ntua no ka,+ na mommɔ ho abien mma no, yiw, nneɛma a ɔyɛe no mmɔho abien;+ kuruwa+ a ɔde mfrafrae guu mu no, momfa mfrafrae no mmɔho abien+ ngu mu mma no.+
7 Sɛnea ɔhyɛɛ ne ho anuonyam baabi a odii taamu kodui no, saa ara na monyɛ no ayayade na momma onni awerɛhow.+ Na ɔka wɔ ne komam sɛ, ‘Meredi ade sɛ ɔhemmaa,+ merenni kuna,+ na merenhu awerɛhow da.’+
8 Enti na da koro pɛ ne haw+ bɛba no, owu ne awerɛhow ne ɔkɔm, na wɔde ogya bɛhyew no dwerɛbee,+ efisɛ Yehowa Nyankopɔn a obuu no atɛn no yɛ ɔhoɔdenfo.+
9 “Na sɛ wɔrehyew no na asase so ahene+ a wɔne no bɔɔ aguaman na wodii taamu no hu wusiw+ no a, wobesu no+ de awerɛhow abobɔ wɔn kokom,
10 na esiane sɛ wosuro n’ayayade no nti, wobegyinagyina akyirikyiri aka sɛ,+ ‘Due, due, kurow kɛse,+ Babilon a woyɛ kurow dennen, efisɛ dɔnhwerew biako mu na w’atemmu aba!’+
11 “Asase so aguadifo+ nso resu di ne ho awerɛhow,+ efisɛ obiara nni hɔ a ɔbɛtɔ wɔn aguade bio,
12 aguade+ a ɛyɛ sika ne dwetɛ ne aboɔdenbo ne nhene pa ne nwera pa ne ntama kɔkɔɔ ne sirikyi ne atade kɔkɔɔ, ne biribiara a wɔde nnua a ɛyɛ huam ayɛ ne ade biara a wɔde asommɛn ayɛ ne ade biara a wɔde nnua a ɛwɔ bo ne kɔbere ne dade ne abohemmaa ayɛ;+
13 afei nso anoatre ne India akekaduru ne aduhuam ne ngohuam ne ɛhyɛ ne bobesa ne ngo ne esiam ne awi ne anantwi ne nguan, ne apɔnkɔ ne nteaseɛnam ne nkoa ne nnipa akra.+
14 Yiw, aba pa a na wo kra pɛ+ no afi wo nkyɛn, na nnepa ne anuonyanne nyinaa afi wo nkyɛn asɛe, na nnipa renhu bio da.+
15 “Nneɛma yi ho aguadifo+ a ne nti wonyaa wɔn ho no begyinagyina akyirikyiri esiane sɛ wosuro n’ayayade no nti, na wobesu adi awerɛhow,+
16 na wɔbɛka sɛ, ‘Due, due—kurow kɛse+ a ofura nwera pa ne ntama kɔkɔɔ na ɔhyɛ atade kɔkɔɔ, a ɔde sika ne aboɔdenbo ne ahene pa ahyehyɛ ne ho,+
17 efisɛ dɔnhwerew biako pɛ mu na ahode bebrebe no ayɛ pasaa yi!’+
“Na hyɛn kwankyerɛfo biara ne onipa biara a ɔde hyɛn tu kwan,+ ne hyɛn mu adwumayɛfo ne wɔn a wɔyɛ adwuma wɔ po so nyinaa gyinagyinaa akyirikyiri,+
18 na bere a wɔrehyew no na wohuu wusiw a ɛreba no, wɔteɛteɛɛm kae sɛ, ‘Kurow bɛn na ɛte sɛ kurow kɛse no?’+
19 Na wɔde mfutuma guu wɔn atifi+ teɛɛm, na wosu dii awerɛhow+ kae sɛ, ‘Due, due—kurow kɛse a n’ahonya nti wɔn a wɔwɔ po+ so ahyɛn nyinaa anya wɔn ho,+ efisɛ dɔnhwerew biako pɛ mu na wɔayɛ no pasaa!’+
20 “Ɔsoro,+ ma w’ani nnye, nea ato no no nti, ne mo akronkronfo+ ne asomafo+ ne adiyifo nso, efisɛ Onyankopɔn abu no atɛn atwe n’aso ama mo!”+
21 Na ɔbɔfo hoɔdenfo bi maa ɔbo a ɛte sɛ owiyammo+ kɛse bi so tow too po+ no mu kae sɛ: “Saa ara na wɔbɛtow Babilon kurow kɛse no hwii akyene, na wɔrenhu no bio da.+
22 Na wɔrente asankubɔfo ne nnwontofo ne mmɛnhyɛnfo ne torobɛntohyɛnfo nne wɔ wo mu bio,+ na wɔrenhu odwumfo biara wɔ wo mu bio, na wɔrente owiyammo nnyigyei wɔ wo mu bio,
23 na kanea hann biara renhyerɛn wɔ wo mu bio, na wɔrente ayeforokunu ne ayeforo biara nne wɔ wo mu bio;+ efisɛ w’aguadifo+ na na wɔyɛ atitiriw+ wɔ asase so, na wonam ahonhonsɛm+ so daadaa amanaman nyinaa.
24 Yiw, ne mu na wohuu adiyifo+ ne akronkronfo+ ne wɔn a wɔakunkum wɔn asase so nyinaa+ mogya.”+
