Mmebusɛm 11:1-31
11 Nsisi nsenia yɛ Yehowa akyide,+ na abrammo a ewie pɛyɛ na n’ani gye ho.
2 Ahantan aba anaa? Ɛnde animguase bedi akyi;+ na ahobrɛasefo na nyansa ne wɔn te.+
3 Teefo nokwaredi na ɛkyerɛ wɔn kwan,+ na nkontompofo nnaadaasɛm na ɛbɛsɛe wɔn.+
4 Ahonyade so remma mfaso abufuw da,+ na trenee na ebegye onipa afi owu mu.+
5 Pɛyɛfo trenee na ɛbɛma ne kwan ayɛ tee,+ na ɔbɔnefo amumɔyɛ na ɛbɛma wahwe ase.+
6 Teefo trenee na ebegye wɔn,+ na amumɔyɛfo akɔnnɔde mu na wɔbɛkyere wɔn.+
7 Sɛ ɔbɔnefo wu a, n’anidaso yera;+ na ahoɔden a onipa ani da so no yera.+
8 Ɔtreneeni na woyi no fi ahohia mu,+ na ɔbɔnefo si n’ananmu.+
9 Ɔwaefo de n’ano sɛe ne yɔnko,+ na nimdeɛ na wɔde gye ɔtreneeni.+
10 Treneefo papayɛ ma ɔman ho sɛpɛw no,+ na abɔnefo yera a, anigye ba.+
11 Treneefo nhyira ma ɔman nya anuonyam,+ na abɔnefo anom asɛm bɔ ɔman.+
12 Onipa a onni ti bu ne yɔnko animtiaa,+ na nea ɔyɛ ɔbadwemma no yɛ dinn.+
13 Nea ɔnenam sɛe nkurɔfo din+ no yi atirimsɛm adi,+ na nea ɔyɛ ɔnokwafo* no kata asɛm so.+
14 Sɛ akwankyerɛ pa nni hɔ a, ɔman hwe ase,+ na agyinatufo dodow mu na nkwagye wɔ.+
15 Nea odi ɔhɔho agyinam+ no, ebewie no bɔne, na nea ɔnteɛ ne nsa nkyia basabasa no asom dwo no.
16 Ɔbea onuonyamfo nya nidi;+ na atirimɔdenfo de, ahonyade na woso mu.
17 Ɔyamyefo yɛ ne kra yiye,+ na otirimɔdenfo de mmusu na ɛba ne honam so.+
18 Ɔbɔnefo nya akatua bɔne,+ na nea ogu trenee no, onya akatua pa.+
19 Nea ogyina trenee mu pintinn no, obenya nkwa,+ na nea odi bɔne akyi no, ne wu na obenya.+
20 Koma mu kɔntɔnkyefo yɛ Yehowa akyide,+ na wɔn a wɔn kwan yɛ pɛ ma n’ani gye.+
21 Sɛ nsa tɔ nsayam mpo a, ɔbɔnefo remfa ne ho nni;+ na treneefo asefo de, wobenya wɔn ti adidi mu.+
22 Sɛnea sika kawa te wɔ prako hwene mu no, saa ara na ɔbea hoɔfɛfo a onnim nyansa+ te.
23 Treneefo ade a wɔpɛ yɛ papa nko ara;+ na abɔnefo anidaso yɛ abufuw.+
24 Obi wɔ hɔ a ɔpete, nanso ɔkɔ so nya bebree;+ na obi nso kame ade, nanso hia ara na ehia no.+
25 Ɔkra yamyefo bɛdɔ srade,+ na nea ɔma ebinom mee no, ɔno nso, wɔbɛma wamee.*+
26 Nea ɔde aburow kame nkurɔfo no—ɔmanfo bɛdome no, na nea ɔma wɔtɔ no, nhyira bebu so n’atifi.+
27 Nea ɔhwehwɛ papa no, ɔbɛkɔ so ahwehwɛ adom;+ na nea ɔhwehwɛ bɔne no, ɛbɛba no so.+
28 Nea ɔde ne ho to n’ahonyade so no—ɔno na ɔbɛhwe ase;+ na treneefo bɛyɛ frɔmfrɔm te sɛ ahaban momono.+
29 Obiara a ɔde mmusu ba ne fie so+ no bedi mframa;+ na ɔkwasea bɛyɛ akoa ama koma mu nyansafo.
30 Ɔtreneeni aba yɛ nkwa dua,+ na nea onya akra no yɛ onyansafo.+
31 Hwɛ! Ɔtreneeni—obenya akatua asase so.+ Hwɛ sɛnea ebewie omumɔyɛfo ne ɔbɔnefo!+
Ase Hɔ Nsɛm
^ Nea ɛkyerɛ ankasa ne, “nea ɔwɔ ɔnokwafo honhom.”
^ Nea ɛkyerɛ ankasa ne, “nea ogugu nkurɔfo so nsu bebree no, wobegugu no so nsu bebree.”
