Mmebusɛm 23:1-35
23 Sɛ wotena ase sɛ wo ne ɔhene rebedidi a, susuw nea ɛwɔ w’anim no ho yiye,+
2 na sɛ woyɛ odidifo a, fa sekan to wo menewa mu.+
3 Mma wo kɔn nnnɔ n’akɔnnɔduan no, na ɛyɛ nnaadaa aduan.+
4 Mmiri wo mogya ani mpɛ ahonyade.+ Mfa wo ho nto wo ntease so.+
5 Ɛno na wode w’ani ato so, bere a ɛyɛ adehunu?+ Efuw ntaban te sɛ ɔkɔre na etu kɔ wim.+
6 Nni ɔyamɔnwenefo biara aduan,+ na mma wo kɔn nnnɔ n’akɔnnɔduan.+
7 Sɛnea obi dwen biribi ho sie ne komam no, saa ara na ɔte.+ Ɔka kyerɛ wo sɛ: “Didi na nom,” nanso emfi ne komam.+
8 Kakra a woadi no, wobɛfe aba, na wo nsɛm dɛdɛ no ayɛ ɔkwa.+
9 Nkasa ngu ɔkwasea asom,+ na obebu wo nsɛm a adwene wom no animtiaa.+
10 Mpiapia ɔhye a efi tete no,+ na nkɔ agyanka afuw mu.+
11 Wɔn Gyefo no ho yɛ den; ɔno na ɔne wo bedi ama wɔn.+
12 Fa wo koma ma nteɛso, na yɛ aso ma nimdeɛ nsɛm.+
13 Mfa nteɛso nkame abofra.+ Sɛ wode abaa hwe no a, ɔrenwu.
14 Fa abaa hwe no, na woagye ne kra afi Adamoa* mu.+
15 Me ba, sɛ wo koma hu nyansa a,+ me na me koma bedi ahurusi.+
16 Na sɛ w’ano ka teeyɛ nsɛm+ a, m’asaabo bedi ahurusi.
17 Mma wo koma ani mmmere abɔnefo,+ na suro Yehowa daa nyinaa.+
18 Ɛno na ebesi wo yiye daakye,+ na wɔrentwa w’anidaso nkyene.+
19 Enti me ba, tie na yɛ onyansafo, na ma wo koma mfa ɔkwan no so.+
20 Nkɔka sadweamfo+ ne wɔn a wodi nam fuu+ ho.
21 Asabofo ne adidifo no, ebehia wɔn;+ na nkotɔ de ntamagow befura onipa.+
22 Tie wo papa, ɔno na ɔwoo wo,+ na mmu wo maame animtiaa sɛ wayɛ aberewa nti.+
23 Tɔ nokware+ na ntɔn—tɔ nyansa ne nteɛso ne ntease nso.+
24 Anigye na ɔtreneeni papa benya;+ na onyansafo papa nso bedi ne ho ahurusi.+
25 Wo papa ne wo maame bedi ahurusi, na wo maame a ɔwoo wo ani agye.+
26 Me ba, fa wo koma ma me, na ma w’ani nnye m’akwan ho.+
27 Aguaman yɛ amoa donkudonku,+ na ɔbea huhuni yɛ abura hihiaa.
28 Ɔno na ɔtetɛw sɛ odwowtwafo;+ na ɔma nkontompofo dɔɔso mmarima mu.+
29 Hena na ɔwɔ ahohia mu? Hena na ɔwɔ ahoyeraw mu?+ Hena na ntɔkwaw ahyɛ no mã? Hena na ɔwɔ ɔhaw mu? Hena na wapirapira opira hunu? Hena na n’aniwa ayɛ sann?
30 Ɛyɛ wɔn a wɔtena nsa ho kyɛ,+ wɔn a wɔkɔhwehwɛ afrasa.+
31 Nhwɛ bobesa a ani yɛ kɔɔ a ehuru wɔ kuruwa mu, na ɛkɔ yɔɔ no.
32 Akyiri no, ɛka sɛ ɔwɔ,+ na epuw bɔre te sɛ ahurutoa.+
33 Wubehu nneɛma wɔ w’ani so, na wo koma akeka nsɛnhunu.+
34 Wobɛyɛ sɛ obi a ɔda po mfinimfini ne obi a ɔda hyɛnnua so.+
35 Wobɛka sɛ: “Wɔbɔɔ me, ante me; wɔpem me, na manhu. Bere bɛn na mɛsɔre+ na masan akosi me ho so bio?”+
Ase Hɔ Nsɛm
^ Anaa “Sheol.” Nea ɛkyerɛ ne adesamma adamoa. Hwɛ Nkekaho 4.
