Mmebusɛm 24:1-34
24 Mma w’ani mmmere abɔnefo,+ na mma wo kɔn nnnɔ sɛ wo ne wɔn bɛbɔ.+
2 Adesɛe na wɔn koma dwen ho, na nsɛmmɔne na wɔn ano keka.+
3 Nyansa na wɔde kyekye ofie,+ na nhumu na ɛma egyina.+
4 Nimdeɛ so na wɔnam de aboɔdenne ne afɛfɛde a ɛsom bo nyinaa bi hyɛ mpia mã.+
5 Nea ɔde nyansa hwɛ n’ahoɔden so no yɛ ɔdɔmmarima,+ na onimdefo hyɛ ne ho den.+
6 Akwankyerɛ pa na wode bɛkɔ wo sa,+ na agyinatufo dodow mu na nkwagye wɔ.+
7 Ɔkwasea de, nyansa wɔ soro ma no dodo;+ ɔremmue n’ano wɔ kurow pon ano.
8 Obiara a ɔbɔ pɔw bɔne no, wɔbɛfrɛ no adwemmɔnefo hene.+
9 Nkwasea ahohwibra yɛ bɔne,+ na ɔfɛwdifo yɛ adesamma akyide.+
10 W’aba mu abu ahohia da mu anaa?+ W’ahoɔden so bɛtew.
11 Gye wɔn a wɔde wɔn rekɔ owu mu; na wɔn a wɔrehinhim okum kwan so no, gye wɔn.+
12 Sɛ woka sɛ: “Hwɛ! Ná yennim eyi”+ a, so nea ɔkari koma no renhu,+ na nea ɔhwɛ wo kra no, ɔrenhu,+ na ɔrentua ɔdesani ka sɛnea ne nnwuma te anaa?+
13 Me ba, di ɛwo, na eye; na fa ɛwokyɛm a ɛyɛ dɛ hyɛ wo dodom.+
14 Saa ara na hu nyansa ma wo kra.+ Sɛ wuhu a, ɛno na ebesi wo yiye daakye, na wɔrentwa w’anidaso nkyene.+
15 Nyɛ wo ho sɛ ɔbɔnefo ntɛw ɔtreneeni tenabea;+ nkɔtow nhyɛ ne homebea so.+
16 Sɛ ɔtreneeni hwe ase mpɛn ason mpo a, ɔbɛsɔre;+ na abɔnefo de, mmusu bɛma wɔahwe ase.+
17 Sɛ wo tamfo hwe ase a, nni ahurusi; na sɛ biribi to no hintidua a, mma wo koma ani nnnye,+
18 na Yehowa anhu, na anyɛ bɔne wɔ n’ani so ma wannan n’abufuw amfi no so.+
19 Mma wo bo mmfuw denneennen abɔnefo nti. Mma w’ani mmmere nnebɔneyɛfo.+
20 Anidaso bi nni hɔ mma ɔbɔnefo+ biara; na nnebɔneyɛfo kanea bedum.+
21 Me ba, suro Yehowa ne ɔhene.+ Mfa wo ho mfra atuatewfo.+
22 Wɔn amanehunu bɛba prɛko pɛ,+ na sɛ wotwa atuatewfo fi hɔ a, hena na obehu?+
23 Saa nsɛm yi kɔ ma anyansafo+ nso: Atemmu mu animhwɛ, enye.+
24 Nea ɔka kyerɛ ɔdebɔneyɛfo sɛ: “Woyɛ ɔtreneeni”+ no, aman bɛdome no, na amanaman bebu no busuyɛfo.
25 Wɔn a wɔka n’anim no, wɔn ani begye,+ na papayɛ nhyira bɛba wɔn so.+
26 Nea ɔma mmuae a ɛteɛ no, obefew ano.+
27 Siesie w’adwuma wɔ abɔnten, na yɛ w’afuw mu adwuma.+ Ɛno akyi no, kyekye wo fie nso.
28 Nni wo yɔnko ho adansekurum.+ Ɛbɛma w’ano aka nkwaseasɛm.+
29 Nka sɛ: “Sɛ ɔyɛɛ me no, saa ara na mɛyɛ no.+ Metua obiara ka sɛnea ne nneyɛe te.”+
30 Mitwaam wɔ ɔkwadwofo+ afuw ne ɔbarima a onni ti+ bobeturo ho.
31 Hwɛ! Nwura nko ara na afuw.+ Nsasono agye afa, na ne ban abubu.+
32 Enti m’ankasa mehwɛe; misusuw ho yiye;+ mihui, na mefaa mu adwene:+
33 Wode nna kakra, nkotɔ kakra, mɛpono me nsa mada kakra,+
34 wode saa ara na wo hia abɛto wo sɛ odwowtwafo, na w’ahokyere aba sɛ ɔkyɛmkurafo.+
