Amos 6:1-14
6 “Wɔn a wɔte Sion dwoodwoo+ ne wɔn a wɔde wɔn ho to Samaria bepɔw so no nnue! Eyinom ne atitiriw a wofi amanaman mu odikanfo no mu, na wɔn nkyɛn na Israel fie kɔ.
2 Monkɔ Kalne nkɔhwɛ, na mumfi hɔ nkɔ Hamat+ kɛse, na munsian nkɔ Filistifo kurow Gat+ mu. So woye sen ahenni yi, anaasɛ wɔn asase sõ sen mo asase?+
3 Moayi da bɔne no afi mo adwenem,+ na moatwe amumɔyɛ agua abɛn anaa?+
4 Modeda mpa a wɔde asommɛn ayɛ so,+ na moadwudwo mo ho wɔ mo nnae so, na mowe mo nguan mu adwennini ne anantwi mma a wɔadɔ srade;+
5 moyɛ dwom de gyigye sanku ho,+ na mo ankasa moayɛ asanku te sɛ Dawid;+
6 monom nsã wɔ nkuruwa akɛse mu,+ na mosra ngo pa,+ nanso Yosef amanehunu no mmɔɔ mo yare.+
7 “Ɛno nti wobedi wɔn a wɔrekɔ nkoasom mu no kan akɔ nkoasom mu,+ na wɔn a wɔadwudwo wɔn ho no gyegyeegye nyinaa to betwa.
8 “‘Awurade Tumfoɔ Yehowa de n’ankasa kra aka ntam,’+ Yehowa, asafo Nyankopɔn, asɛm ni, ‘“Mikyi Yakob ahantan,+ na metan n’aban akɛse no,+ na mede kurow yi ne nea ayɛ mu mã nyinaa bɛma.+
9 Na sɛ ɛka nnipa du wɔ fie biako mu a, wɔn nso bewuwu.+
10 Na obiako papa nua beyi wɔn mmiako mmiako ahyew wɔn mmiako mmiako na ama wayi wɔn nnompe afi fie hɔ.+ Na obebisa obi a ɔwɔ pia mu sɛ, ‘Obi foforo ka wo ho?’ Na obebua sɛ, ‘Obiara nka me ho!’ Na ɔno nso bɛka sɛ, ‘Yɛ komm! Na ɛnyɛ saa bere yi na wɔbɔ Yehowa din.’”+
11 “‘Yehowa de ahyɛde ama,+ na obebubu ofi kɛse no pasaa na wabubu ofi ketewa no nso asinasin.+
12 “‘So apɔnkɔ betu mmirika wɔ ɔbotan so, anaasɛ obi de anantwi bɛfɛtɛw so? Na moadan atɛntrenee+ awuduru, na moadan trenee aba nso awɔnwene,
13 mo a mudi ade a enni hɔ ho ahurusi,+ na moka sɛ: “So ɛnyɛ yɛn ankasa ahoɔden na yɛde anya mmɛn yi?”+
14 Hwɛ, Israel fie, mɛma ɔman+ bi aba mo so, na wɔbɛhyɛ mo so fi Hamat+ hye so akosi Araba subon no ano,’ Yehowa, asafo Nyankopɔn, asɛm ni.”
