Asomafo Nnwuma 13:1-52
13 Wɔ Antiokia asafo no, na adiyifo+ ne akyerɛkyerɛfo wom, Barnaba ne Simeon a wɔfrɛ no Niger no, ne Lukio+ a ofi Kirene, ne Manaen a wɔtetee ɔne Herode a ɔyɛ ɔmantam sodifo no, ne Saul.
2 Bere a wɔreyɛ Yehowa som adwuma+ na wɔredi mmuada no, honhom kronkron kae sɛ: “Munyi Barnaba ne Saul+ mma me na wɔnkɔyɛ adwuma a enti mefrɛɛ wɔn no.”
3 Ɛnna wodii mmuada bɔɔ mpae na wɔde wɔn nsa+ guu wɔn so ma wɔkɔe.
4 Enti saa mmarima a honhom kronkron asoma wɔn yi kɔɔ Seleukia, na wofii hɔ de po so hyɛn kɔɔ Kipro.
5 Bere a woduu Salami no, wofii ase bɔɔ Onyankopɔn asɛm no dawuru wɔ Yudafo hyia adan mu. Ná Yohane+ nso wɔ wɔn nkyɛn sɛ ɔsomfo.
6 Bere a wɔfaa supɔw no so koduu Pafo no, wohyiaa Yudani barima osumanni bi, odiyifo torofo+ bi a wɔfrɛ no Bar-Yesu,
7 na ɔwɔ amrado Sergio Paulo a ɔyɛ onyansafo no nkyɛn. Bere a wɔfrɛɛ Barnaba ne Saul maa no no, ɔbarima yi hwehwɛe denneennen sɛ ɔte Onyankopɔn asɛm.
8 Nanso na osumanni Elima wɔ hɔ (nokwarem no, ne din no asekyerɛ ne osumanni); na ofii ase ne wɔn dii asi,+ pɛe sɛ ɔdan amrado no fi gyidi no ho.
9 Afei bere a honhom kronkron ahyɛ Saul, a wɔsan frɛ no Paulo mã no, ɔhwɛɛ no dinn
10 kae sɛ: “O ɔbarima a nsisi ne amumɔyɛ nyinaa ayɛ wo mã, Ɔbonsam ba,+ trenee nyinaa tamfo, wunnyae sɛ wokyea Yehowa kwan a ɛteɛ no?
11 Afei hwɛ! Yehowa nsa wɔ wo so, na w’ani befura, a wunhu owia hann kosi bere bi.” Mpofirim ara n’ani so yɛɛ no kusuu na esum duruu no, na okyin hwehwɛɛ nnipa a wobeso ne nsa akyerɛ no kwan.+
12 Afei bere a amrado+ no huu nea asi no, ɔbɛyɛɛ gyidini, efisɛ Yehowa nkyerɛkyerɛ no maa no ho dwiriw no.
13 Afei, mmarima no ne Paulo faa po so fii Pafo kɔɔ Perga a ɛwɔ Pamfilia.+ Na Yohane+ de, ɔne wɔn tetew mu san kɔɔ+ Yerusalem.
14 Nanso, wɔn de wofii Perga baa Antiokia a ɛwɔ Pisidia, na wɔkɔɔ hyiadan+ mu homeda kɔtenaa ase.
15 Wɔkenkan Mmara+ ne Adiyifo no wɔ baguam wiei no, hyiadan mu mpanyimfo+ no soma kɔɔ wɔn nkyɛn sɛ: “Mmarima, anuanom, sɛ mowɔ nkuranhyɛsɛm bi ma nnipa yi a, monka.”
16 Enti Paulo sɔre nyamaa+ ne nsa kae sɛ:
“Mmarima, Israelfo ne mo a musuro Onyankopɔn, muntie.+
17 Israel man yi Nyankopɔn paw yɛn agyanom, na ɔmaa wɔn so bere a na wɔyɛ ahɔho wɔ Egypt asase so no de basa a wɔama so yii wɔn fii hɔ.+
18 Na bɛyɛ mfe aduanan+ no, onyaa wɔn nneyɛe ho abotare wɔ sare no so.
19 Ɔsɛee aman ason wɔ Kanaan asase so akyi no, ɔbɔɔ wɔn asase no so ntonto kyekyɛe:+
20 ne nyinaa sii bɛyɛ mfe ahanan aduonum mu.
“Na eyinom akyi no, ɔmaa wɔn atemmufo de besii odiyifo Samuel so.+
21 Na efi ɛno so no, wobisaa ɔhene,+ na Onyankopɔn de Kis ba Saul, ɔbarima a ofi Benyamin abusua mu,+ maa wɔn mfe aduanan.
22 Na oyii no fii hɔ+ no, ɔmaa Dawid so maa wɔn sɛ ɔhene,+ na odii ne ho adanse kae sɛ, ‘Mahu Yese ba Dawid,+ ɔbarima a me koma da no so+ a ɔbɛyɛ nea mepɛ nyinaa.’+
23 Saa ɔbarima yi mu+ na sɛnea Onyankopɔn bɔhyɛ te no, oyii Yesu maa Israel sɛ agyenkwa,+
24 bere a Yohane,+ a odii Ɔno anim bae+ no, kaa asubɔ a ɛyɛ adwensakra ho sɛnkyerɛnne ho asɛm wɔ baguam kyerɛɛ Israelfo nyinaa no.
25 Na bere a Yohane dwumadi reba awiei no, ɔkae sɛ, ‘Mususuw sɛ meyɛ hena? Menyɛ ɔno. Nanso, hwɛ! obi di m’akyi reba a memfata sɛ mesan ne nan ase mpaboa mpo.’+
26 “Mmarima, anuanom, Abraham asefo ne wɔn a wɔwɔ mo mu a wosuro Onyankopɔn, yɛn na wɔde nkwagye yi ho asɛm abrɛ yɛn.+
27 Na wɔn a wɔtete Yerusalem ne wɔn sodifo no anhu no,+ nanso bere a wɔrebu atɛn no, wɔmaa nea na Adiyifo+ no aka a wɔkenkan no den Homeda biara no baa mu,
28 na wɔanhu hwee a ɛkyerɛ sɛ ɔsɛ owu+ de, nanso wɔkae sɛ Pilato mma wonkum no.+
29 Afei, bere a wɔyɛɛ nea wɔakyerɛw afa ne ho nyinaa wiei+ no, woyii no fii dua+ no so de no too ɔda mu.+
30 Nanso Onyankopɔn nyan no fii awufo mu;+
31 na wɔn a wɔne no fi Galilea kɔɔ Yerusalem no huu no nna pii, na seesei wodi ne ho adanse kyerɛ nkurɔfo.+
32 “Ɛno nti yɛreka bɔhyɛ a wɔde maa agyanom no ho asɛmpa akyerɛ mo,+
33 sɛ Onyankopɔn ama aba mu koraa ama yɛn a yɛyɛ wɔn mma no efisɛ wanyan Yesu,+ sɛnea wɔakyerɛw wɔ dwom a ɛto so abien no mu no sɛ, ‘Woyɛ me ba, ɛnnɛ mayɛ w’Agya.’+
34 Nokwasɛm a ɛne sɛ onyan no fii awufo mu a ɛremma bio sɛ ɔbɛsan akɔ ɔporɔw mu no, ɛno na waka wɔ saa kwan yi so sɛ, ‘Mede adɔe a Dawid nyae a ɛyɛ nokware no bɛma mo.’+
35 Enti ɔno nso kae wɔ dwom foforo mu sɛ, ‘Woremma wo nokwafo nhu ɔporɔw.’+
36 Na Dawid de,+ ɔyɛɛ Onyankopɔn pɛ a wɔada no adi no wɔ n’ankasa awo ntoatoaso mu, na ɔdae wɔ owu mu ma wosiee no n’agyanom nkyɛn, na ohuu ɔporɔw.+
37 Nanso nea Onyankopɔn nyan no no anhu ɔporɔw.+
38 “Enti anuanom, munhu sɛ yɛnam Oyi so reka bɔne fafiri ho asɛm akyerɛ mo;+
39 na nneɛma a wɔantumi amfa Mose mmara so ammu mo bem wɔ ho+ no, wɔnam Oyi so abu obiara a ogye di no bem wɔ ho.+
40 Enti monhwɛ na nea wɔaka wɔ Adiyifo no mu no amma mo so,
41 ‘Mo animtiaabufo, monhwɛ ma ɛnyɛ mo nwonwa na monyera, efisɛ mereyɛ adwuma bi mo bere so, adwuma a sɛ obi ka ho asɛm nyinaa kyerɛ mo mpo a, morennye nni.’”+
42 Afei bere a wɔrefi hɔ akɔ no, nkurɔfo no paa wɔn kyɛw sɛ wɔnka nsɛm yi nkyerɛ wɔn homeda a edi hɔ+ no.
43 Enti hyiadan no mu nhyiam no baa awiei no, Yudafo no mu pii ne wɔn a wɔasakra a wɔsom Onyankopɔn no dii Paulo ne Barnaba akyi,+ na wɔkasa kyerɛɛ wɔn hyɛɛ wɔn nkuran+ sɛ wɔnkɔ so ntena Onyankopɔn adom+ mu.
44 Homeda a edi hɔ no, ɛkame ayɛ sɛ kurow no mufo nyinaa hyiaam sɛ wɔrebetie Yehowa asɛm.+
45 Bere a Yudafo no huu nnipakuw no, anibere+ hyɛɛ wɔn mã na wofii ase kaa abususɛm de bɔɔ nea Paulo reka no gui.+
46 Enti, Paulo ne Barnaba de akokoduru kae sɛ: “Ná ɛho hia sɛ wɔka Onyankopɔn asɛm kyerɛ mo kan.+ Nanso esiane sɛ mupia to nkyɛn+ na mummu mo ho sɛ mofata daa nkwa nti, hwɛ! yɛredan akɔ amanaman no nkyɛn.+
47 Nokwarem no, Yehowa ama yɛn ahyɛde sɛ, ‘Mapaw wo sɛ amanaman no hann,+ na woayɛ nkwagye de akɔpem asase ano.’”+
48 Bere a amanaman mufo tee eyi no, wofii ase dii ahurusi na wɔhyɛɛ Yehowa asɛm anuonyam,+ na wɔn a wɔpɛ daa nkwa nyinaa dan gyidifo.+
49 Afei nso, wɔkɔɔ so de Yehowa asɛm no kɔɔ asase no nyinaa so.+
50 Na Yudafo+ no tutu guu mmea a wɔwɔ din a wɔsom Onyankopɔn no ne kurow no mu nnipa atitiriw no asom, na wɔde ɔtaa+ baa Paulo ne Barnaba so pam wɔn fii wɔn ahye so.
51 Ɛnna wɔporoporow wɔn nan ase mfutuma guu wɔn so+ na wɔkɔɔ Ikoniom.
52 Na anigye+ ne honhom kronkron kɔɔ so hyɛɛ asuafo no mã.
