Asomafo Nnwuma 22:1-30
22 “Mmarima, anuanom+ ne agyanom, afei muntie me na minyi m’ano+ nkyerɛ mo.”
2 (Enti, bere a wɔtee sɛ ɔde Hebri ne wɔn rekasa+ no, ɛma wɔyɛɛ dinn koraa, na ɔkae sɛ:)
3 “Meyɛ Yudani+ a wɔwoo me Tarso a ɛwɔ Kilikia,+ nanso wɔkyerɛkyerɛɛ me wɔ kurow yi mu wɔ Gamaliel+ nan ase sɛnea agyanom Mmara kyerɛ no pɛpɛɛpɛ,+ na mebɔɔ Onyankopɔn ho mmɔden+ sɛnea mo nyinaa yɛ nnɛ yi.
4 Na metaa Ɔkwan yi kɔɔ owu mu.+ Mekyekyeree mmarima ne mmea nyinaa ma wɔde wɔn guu afiase;+
5 ɔsɔfo panyin no ne mpanyimfo+ bagua no nyinaa bedi me adanse. Migyigyee nkrataa+ fii wɔn hɔ nso kɔmaa anuanom a wɔwɔ Damasko no, na na menam ɔkwan so rekɔkyere wɔn a wɔwɔ hɔ no aba Yerusalem ma wɔatwe wɔn aso.
6 “Na merekɔ a mereyɛ abɛn Damasko bɛyɛ owigyinae no, mpofirim ara na hann kɛse bi hyerɛn fii soro twaa me ho hyiae,+
7 na mitwa hwee fam, na metee sɛ nne bi ne me rekasa sɛ, ‘Saul, Saul, dɛn nti na wotaa me?’+
8 Mibuae sɛ, ‘Ɛyɛ wo hena, Owura?’ Na ɔka kyerɛɛ me sɛ, ‘Ɛyɛ me Nasareni Yesu, a wotaa no no.’+
9 Afei mmarima a wɔka me ho+ no huu hann no nanso wɔante nne a na ɛne me rekasa no.+
10 Ɛnna mekae sɛ, ‘Menyɛ dɛn,+ Owura?’ Na Awurade ka kyerɛɛ me sɛ, ‘Sɔre kɔ Damasko, na wɔbɛka biribiara a wɔahyɛ sɛ yɛ no akyerɛ wo wɔ hɔ.’+
11 Nanso esiane sɛ na hann no anuonyam mma minhu hwee nti, wɔn a me ne wɔn nam no susoo me nsa de me kɔɔ Damasko.+
12 “Afei ɔbarima bi a wɔfrɛ no Anania, a ɔyɛ nyamesurofo sɛnea Mmara no hwehwɛ a Yudafo a wɔtete hɔ nyinaa bɔ no din pa+ no
13 baa me nkyɛn, na bere a ogyina me ho no, ɔka kyerɛɛ me sɛ, ‘Onua Saul, san hu ade!’+ Na dɔn no ara mu memaa m’ani so hwɛɛ no.
14 Ɔkae sɛ, ‘Yɛn agyanom Nyankopɔn+ apaw wo+ sɛ hu n’apɛde na hu+ Ɔtreneeni+ no na te ne nne,+
15 efisɛ wubedi nea woahu na woate no ho adanse akyerɛ nnipa nyinaa ama no.+
16 Na afei dɛn nti na woretwentwɛn wo nan ase? Sɔre ma wɔmmɔ wo asu+ na bɔ ne din ma ɛnhohoro+ wo bɔne.’+
17 “Nanso bere a mesan baa Yerusalem+ a merebɔ mpae wɔ asɔrefie hɔ no, minyaa anisoadehu,+
18 na mihuu no sɛ ɔreka akyerɛ me sɛ, ‘Ma wo ho nyɛ hare na fi Yerusalem ntɛm, efisɛ wɔrempene+ me ho adanse a wudi no so.’
19 Na mekae sɛ, ‘Awurade, wɔn ankasa nim pefee sɛ na mekyere wɔn a wogye wo di no gu afiase+ hwe wɔn wɔ hyiadan ahorow mu;+
20 na bere a wɔrehwie wo dansefo Stefano+ mogya agu no, na m’ankasa nso migyina hɔ bi a mepenee so,+ na mehwɛɛ wɔn a wɔrekum no no ntade nguguso so.’
21 Nanso ɔka kyerɛɛ me sɛ, ‘Sɔre kɔ, efisɛ mɛsoma wo akɔ amanaman a ɛwɔ akyirikyiri mu.’”+
22 Na wotiee no besii saa asɛm yi so, na wɔmaa wɔn nne so kae sɛ: “Yi onipa yi fi asase so, efisɛ ɔmfata sɛ ɔtena ase!”+
23 Na esiane sɛ na wɔreteɛteɛm totow wɔn ntade gu na wɔretu mfutuma gu mframa mu+ nti,
24 ɔsahene no hyɛe sɛ wɔmfa no mmra asraafo asoɛe hɔ, na wɔnka no mpire mfa nhwehwɛ ne nsɛm mu na ama wahu ade pɔtee a enti wɔreteɛteɛm+ gu no so saa no.
25 Na bere a wɔtwee Paulo mu a wɔrebɛka no mpire no, obisaa ɔsraani panyin a ogyina hɔ no sɛ: “Mmara ma kwan sɛ moka Romani+ mpire bere a wommuu no fɔ?”
26 Ɔsraani panyin no tee eyi no, ɔkɔɔ ɔsahene no nkyɛn kɔbɔɔ no amanneɛ sɛ: “Dɛn na wopɛ sɛ woyɛ yi? Hwɛ, onipa yi yɛ Romani.”
27 Enti ɔsahene no bae bebisaa no sɛ: “Ka kyerɛ me, woyɛ Romani?”+ Ɔkae sɛ: “Yiw.”
28 Ɔsahene no buae sɛ: “Mede sika kɛse paa na ɛtɔɔ saa hokwan yi sɛ ɔman ba.” Ɛnna Paulo kae sɛ: “Nanso me de, wɔde woo+ me.”
29 Enti, ntɛm ara na wɔn a wɔrebɛyɛ no ayayade de ahwehwɛ ne nsɛm mu no fii ne nkyɛn kɔe; na bere a ɔsahene no hui sɛ ɔyɛ Romani+ na wakyekyere no no, osuroe.
30 Enti ade kyee a ɔpɛe sɛ ohu dekode pɔtee a enti Yudafo no abɔ no sobo no, ɔsan no na ɔhyɛɛ asɔfo mpanyin no ne Sanhedrin no nyinaa ma wohyiaam. Na ɔde Paulo begyinaa wɔn mfinimfini.+
