Asomafo Nnwuma 24:1-27
24 Nnanum akyi no, ɔsɔfo panyin Anania+ ne mpanyimfo bi ne Tertulo a ogyina bagua anim kasa no bae, na wɔde Paulo ho nsɛm+ bɛtoo amrado+ no anim.
2 Bere a wɔfrɛɛ Tertulo no, ofii ase bɔɔ no sobo sɛ:
“Esiane sɛ ɛnam wo so na yenya asomdwoe+ kɛse na wo nhumu ama nsakrae aba ɔman yi mu nti,
3 Onuonyamfo+ Felike, yɛde aseda a ɛkyɛn so gye eyinom bere nyinaa wɔ baabiara.
4 Nanso nea ɛbɛyɛ na mansiw wo kwan pii bio nti, mesrɛ wo sɛ fi w’ayamye mu tie yɛn kakra.
5 Yɛahu ɔbarima yi sɛ obusuyɛfo+ a otutu gu Yudafo nyinaa asom ma wɔtew atua+ wɔ asase nyinaa so, na odi Nasirifo fekuw+ no mu akoten,
6 na ɔno ara nso na ɔbɔɔ mmɔden sɛ obegu asɔrefie no ho fĩ+ ma yɛkyeree no.
7 ——
8 W’ankasa wubetumi abisabisa no ahu nea yɛde rebɔ no sobo yi nyinaa mu.”
9 Ɛnna Yudafo no nso de wɔn ano too mu bi kae sɛ nsɛm yi te saa.
10 Bere a amrado no nyamaa ne ti kyerɛɛ Paulo sɛ ɔnkasa no, obuae sɛ:
“Esiane sɛ minim yiye sɛ woayɛ ɔman yi temmufo mfe pii nti, me ho pere me sɛ meyi m’ano+ wɔ m’asɛm yi ho,
11 efisɛ sɛnea wubetumi ahu no, mekɔɔ Yerusalem kɔsomee+ no, enni mmoroo nnafua dumien;
12 na wɔanhu me sɛ me ne obi regye akyinnye wɔ asɔrefie+ hɔ anaasɛ mapiapia nnipakuw+ de basabasayɛ aba hyia adan anaa kurow no mu.
13 Na wɔrentumi nso nnya sobo a wɔrebɔ me mprempren yi ho adanse+ mma wo.
14 Nanso migye nokwasɛm yi tom wɔ w’anim sɛ nea wɔfrɛ no ‘fekusɛm’ yi ara ne ɔkwan a menam so som m’agyanom Nyankopɔn,+ efisɛ migye nea Mmara+ no ka na wɔakyerɛw wɔ Adiyifo no mu no di;
15 na mewɔ anidaso+ wɔ Onyankopɔn mu, a wɔn nso wɔ saa anidaso no ara bi, sɛ bere bi bɛba a wɔn a wɔteɛ+ ne wɔn a wɔnteɛ+ bɛsɔre afi awufo mu.+
16 Enti bere nyinaa mehwɛ hu+ sɛ merenyɛ bɔne biara ntia Onyankopɔn ne nnipa.
17 Enti mfe kakra akyi no, mede adɔeyɛde brɛɛ me man, ɛne ayɛyɛde.+
18 Bere a mereyɛ eyinom no, wohuu me asɔrefie hɔ sɛ madwira me ho,+ nanso na nnipakuw anaa hooyɛ biara nni hɔ. Mmom no, na Yudafo bi a wofi Asia mantam no mu na wɔwɔ hɔ,
19 na anka ɛsɛ sɛ wɔba w’anim na sɛ wɔwɔ biribi tia me a, wɔde ato gua.+
20 Anaasɛ, ma mmarima yi ankasa nka bɔne a wohui bere a na migyina Sanhedrin no anim no,
21 gye asɛm biako yi ara a meteɛɛm kae bere a na migyina wɔn mu no sɛ, ‘Awufo sɔre so na wogyina rebu me atɛn nnɛ mo anim no!’”+
22 Nanso, esiane sɛ Felike+ nim Ɔkwan+ yi ho asɛm yiye nti, otuu nkurɔfo no asɛm no hyɛɛ da kae sɛ: “Bere biara a ɔsahene Lisia+ bɛba no, mesi mo nsɛm yi ho gyinae.”
23 Na ɔhyɛɛ ɔsraani panyin no sɛ ɔnhwɛ ɔbarima no so na wɔnnhaw no wɔ baabi a ɔda no, na ɛnsɛ sɛ wɔbara ne ho nipa biara a ɔbɛba abɛsom no.+
24 Nna bi akyi no, Felike+ ne ne yere Drusila a ɔyɛ Yudani+ no bae, na ɔsoma kɔfrɛɛ Paulo bae, na wotiee nea ɔwɔ ka fa Kristo Yesu mu gyidi ho.+
25 Afei bere a ɔkaa trenee+ ne ahosodi+ ne atemmu+ a ɛbɛba ho asɛm no, ehu kaa Felike ma ɔkae sɛ: “Mprempren de, kɔ, na mmom sɛ minya bere a mɛsan asoma abɛfrɛ wo.”
26 Nanso saa bere yi nyinaa na n’ani da so sɛ Paulo bɛma no sika.+ Enti na ɔtaa soma kɔfrɛ no ne no bɔ nkɔmmɔ.+
27 Afei mfe abien twaam no, Porkio Festo bedii Felike ade; na esiane sɛ na Felike pɛ sɛ onya Yudafo no anim dom+ nti, ogyaw Paulo mpokyerɛ mu.
