Asomafo Nnwuma 25:1-27
25 Enti, bere a Festo baa+ aban mu wɔ ɔmantam no mu no, ne nnansa akyi, ofi Kaesarea+ kɔɔ Yerusalem;
2 na asɔfo mpanyin ne Yudafo atitiriw no bɛkaa Paulo ho asɛmmɔne+ kyerɛɛ no. Na wofii ase paa no kyɛw,
3 srɛe sɛ ɔnyɛ wɔn adom nsoma nkɔfrɛ ɔbarima no mmra Yerusalem, efisɛ saa bere no na wɔtɛw kwan ho+ ayɛ krado sɛ wobekum no.
4 Nanso, Festo buae sɛ wɔbɛkora Paulo so wɔ Kaesarea na ɛrenkyɛ ɔno ara nso bɛkɔ hɔ.
5 Ɔkae sɛ, “Enti momma wɔn a wɔwɔ mo mu a wɔwɔ tumi no ne me nkɔ, na sɛ biribi a ɛmfa kwan mu wɔ ɔbarima no ho a, wɔabɔ no sobo.”+
6 Enti bere a odii wɔn nkyɛn bɛyɛ nnawɔtwe anaa dadu no, ɔkɔɔ Kaesarea, na ade kyee no, ɔtenaa atemmu agua+ so hyɛe sɛ wɔmfa Paulo mmra.
7 Bere a ɔbae no, Yudafo a wofi Yerusalem aba no betwaa ne ho hyiae, kaa nsɛm+ akɛse bebree guu no so a wɔantumi amfa adanse biara amma.
8 Nanso Paulo yii n’ano sɛ: “Menyɛɛ bɔne biara a etia Yudafo Mmara anaa asɔrefie+ no anaa Kaesare.”+
9 Afei esiane sɛ Festo pɛ sɛ onya Yudafo no anim dom+ nti, obuaa Paulo sɛ: “Wopɛ sɛ wokɔ Yerusalem ma wodi asɛm no m’anim?”+
10 Ɛnna Paulo kae sɛ: “Migyina Kaesare atemmu agua anim,+ na ɛha na ɛsɛ sɛ wodi m’asɛm. Menyɛɛ Yudafo bɔne biara,+ sɛnea w’ankasa woabehu no pefee no.
11 Nanso sɛ meyɛ ɔbɔnefo+ ampa, na mayɛ biribi a ɛsɛ owu+ a, minguan owu; nanso sɛ nea mmarima yi de ato me so yi mu biara nnim a, obiara ntumi mfa me nhyɛ wɔn nsa mfa mpata wɔn. Mede asɛm no dan Kaesare!”+
12 Afei Festo ne baguafo no kasa wiei no, obuae sɛ: “Kaesare na wode asɛm no adan no; Kaesare hɔ na wobɛkɔ.”
13 Nna bi akyi no, Ɔhene Agripa ne Bernike baa Kaesarea bekyiaa Festo.
14 Na esiane sɛ na wobedi nna kakra wɔ hɔ nti, Festo de Paulo asɛm no too ɔhene no anim sɛ:
“Ɔbarima bi wɔ ha a Felike gyaw no afiase,
15 na bere a mewɔ Yerusalem no, asɔfo mpanyin ne Yudafo mpanyimfo de ne ho asɛm+ bae, srɛe sɛ mimmu no fɔ.
16 Na mibuaa wɔn sɛ ɛnyɛ Romafo amanne sɛ wobebu obi fɔ ama wɔn a wɔabɔ no sobo+ bere a onnyaa hokwan nyii n’ano wɔ wɔn anim.
17 Enti bere a wobehyiae wɔ ha no, mantwentwɛn me nan ase koraa, na ade kyee ara na metenaa atemmu agua so hyɛe sɛ wɔmfa ɔbarima no mmra.
18 Ɔsɔre gyinae no, wɔn a wɔrebɔ no sobo no antumi anka ne ho asɛmmɔne+ biara sɛnea misusuwii no.
19 Ɛne sɛ, wɔne no dii anobaabae wɔ ɔkwan a wɔn ankasa fa so som+ wɔn nyame no ho, ne afei nso Yesu bi a owui a Paulo ka denneennen sɛ ɔte ase no ho.+
20 Afei na minhu nea menyɛ wɔ anobaabae yi ho, enti mibisae sɛ ɔpɛ sɛ ɔkɔ Yerusalem ma wokodi asɛm no wɔ hɔ anaa.+
21 Nanso bere a Paulo kyerɛe+ sɛ wɔnkora no so nkosi sɛ Otumfoɔ no bebua asɛm no, mehyɛe sɛ wɔnkora no so nkosi sɛ mede no bɛkɔ akɔma Kaesare.”
22 Ɛha no, Agripa ka kyerɛɛ Festo sɛ: “Me nso mɛpɛ sɛ mitie ɔbarima no ano asɛm.”+ Ɔkae sɛ, “ɔkyena, wubetie no.”
23 Enti, ade kyee no, Agripa ne Bernike bae a wɔahyehyɛ wɔn ho kɔsɔɔ,+ na wɔne asahene ne kurow no mu atitiriw no kɔɔ baabi a wotie asɛm no, na Festo ma wɔde Paulo bae.
24 Na Festo kae sɛ: “Ɔhene Agripa ne mmarima a moka yɛn ho wɔ ha nyinaa, ɔbarima a mo ani tua no yi yɛ obi a Yudafo dɔm no srɛɛ me wɔ Yerusalem ne ha nso, teɛteɛɛm sɛ ɛnsɛ sɛ ɔtena nkwa mu bio.+
25 Nanso mihui sɛ ɔnyɛɛ biribiara a ɛsɛ owu.+ Enti bere a ɔno ankasa de asɛm no dan+ Otumfoɔ no, meyɛe sɛ mede no bɛkɔ.
26 Nanso minnim asɛm a menkyerɛw mfa ne ho nkɔma me Wura. Enti mede no baa mo anim, titiriw wo Ɔhene Agripa, na sɛ wohwehwɛ asɛm no mu wie+ a, manya biribi akyerɛw,
27 efisɛ ntease nnim sɛ mede ɔdeduani bɛkɔ a menkyerɛ asɛm a wɔde ato no so.”
