Asomafo Nnwuma 4:1-37
4 Afei bere a wɔn baanu rekasa akyerɛ nkurɔfo no, asɔfo mpanyin ne asɔrefie hwɛfo+ no ne Sadukifo+ no baa wɔn so,
2 a wɔn bo afuw sɛ wɔrekyerɛkyerɛ nkurɔfo no na wɔde Yesu nhwɛso no reka owusɔre ho asɛm fann kyerɛ wɔn;+
3 na wɔkyeree wɔn de wɔn koguu afiase maa ade kyee,+ efisɛ na onwini adwo dedaw.
4 Nanso, wɔn a wotiee ɔkasa no mu pii gye dii,+ na mmarima no dodow beduu bɛyɛ mpemnum.+
5 Ade kyee no, wɔn sodifo ne mpanyimfo ne akyerɛwfo no hyiaam wɔ Yerusalem+
6 (na ɔsɔfo panyin Anas+ ne Kaiafa+ ne Yohane ne Aleksandro, ne wɔn mu pii a na wɔyɛ ɔsɔfo panyin no abusuafo nso ka ho),
7 na wɔde wɔn gyinaa wɔn mfinimfini fii ase bisabisaa wɔn sɛ: “Tumi bɛn anaa hena din mu na moyɛɛ eyi?”+
8 Ɛnna Petro a honhom kronkron ahyɛ no mã+ no ka kyerɛɛ wɔn sɛ:
“Ɔman atumfoɔ ne mpanyimfo,
9 sɛ ɛnnɛ moregyina papa a yɛayɛ ama ɔyarefo so ahwehwɛ yɛn nsɛm mu,+ ahu nea ɛnam no so na ɔbarima yi ho atɔ no a,
10 ɛnde mo ne nnipa a wɔwɔ Israel nyinaa nhu sɛ Nasareni+ Yesu Kristo a mobɔɔ no asɛndua mu+ a Onyankopɔn nyan no fii awufo mu+ no, ɛnam no so na ɔbarima yi ho atɔ no a ogyina mo anim ha yi.
11 Oyi ne ‘ɔbo a mo adansifo amfa no anyɛ hwee a abɛyɛ tweatibo+ no.’
12 Bio nso, nkwagye nni obi foforo biara mu, na edin+ foforo biara nni ɔsoro ase a wɔde ama nnipa sɛ wɔmfa so nnye yɛn nkwa.”+
13 Afei bere a wohuu sɛnea Petro ne Yohane kasa akokoduru so, na wohui sɛ wɔyɛ nnipa a wonsuaa nhoma na wɔyɛ mpapahwekwa+ no, ɛyɛɛ wɔn nwonwa. Na wofii ase huu wɔn yiye sɛ na wɔka Yesu ho;+
14 na wɔhwɛɛ ɔbarima a ogyina wɔn nkyɛn a ne ho atɔ no no,+ wɔannya hwee anka antia wɔn.+
15 Enti wɔma wofii Sanhedrin asa no so puei, na wofii ase tuu agyina,
16 kae sɛ: “Dɛn na yɛnyɛ saa nnipa yi?+ Efisɛ, nokwasɛm ni, sɛnkyerɛnne soronko bi nam wɔn so aba, biribi a ada adi wɔ wɔn a wɔte Yerusalem nyinaa anim;+ na yɛrentumi nnye ho kyim.
17 Nanso, sɛnea ɛbɛyɛ na ankɔ so antrɛw nnipa no mu nti, momma yenhunahuna wɔn sɛ wɔnnka edin yi ho asɛm nnkyerɛ onipa biara bio.”+
18 Ɛno nti wɔfrɛɛ wɔn hyɛɛ wɔn sɛ wɔnnkasa na wɔnnkyerɛkyerɛ wɔ Yesu din mu wɔ baabiara.
19 Nanso Petro ne Yohane bua see wɔn sɛ: “Sɛ ɛteɛ wɔ Onyankopɔn ani so sɛ yetie mo mmom sen Onyankopɔn a, mo ankasa mummua.
20 Na yɛn mmom de, nea yɛate na yɛahu no, yɛrentumi nnyae ho asɛm ka.”+
21 Enti, wohunahunaa wɔn bio no wogyaa wɔn esiane sɛ wɔannya biribiara a wobegyina so atwe wɔn aso ne afei nkurɔfo no nti,+ efisɛ na wɔn nyinaa rehyɛ Onyankopɔn anuonyam wɔ nea aba no ho;
22 ná ɔbarima a wɔsaa no yare anwonwakwan so yi adi boro mfe aduanan.
23 Wogyaa wɔn no, wɔkɔɔ wɔn mfɛfo nkyɛn+ de nea asɔfo mpanyin ne mpanyimfo no aka akyerɛ wɔn no ho amanneɛ kɔbɔɔ wɔn.
24 Wɔtee eyi no wɔde koma koro maa wɔn nne so ka kyerɛɛ Onyankopɔn+ sɛ:
“Awurade Tumfoɔ,+ wo na woyɛɛ ɔsoro ne asase ne po ne nea ɛwɔ mu nyinaa,+
25 na wonam honhom kronkron so faa yɛn agya Dawid a ɔyɛ w’akoa ano so kae+ sɛ, ‘Adɛn nti na amanaman yɛɛ gyegyeegye na nkurɔfo dwinnwen nsɛnhunu ho?+
26 Asase so ahene sɔre gyinae na atumfoɔ boom sɔre tiaa Yehowa ne nea wasra no no.’+
27 Ɛno mpo no, Herode ne Pontio Pilato+ ne amanaman mufo ne nkurɔfo a wofi Israel ka boom ankasa wɔ kurow yi mu ko tiaa w’akoa kronkron+ Yesu a wosraa no no,+
28 sɛnea ɛbɛyɛ a wɔbɛyɛ nea wo nsa ne w’agyina ahyɛ ato hɔ sɛ ɛbɛba no.+
29 Afei, Yehowa, hwɛ wɔn ahunahuna no+ na ma wo nkoa nkɔ so mfa akokoduru nyinaa nka w’asɛm,+
30 na teɛ wo nsa ma nnipa nnya ayaresa na nsɛnkyerɛnne ne anwonwade+ mfa w’akoa+ kronkron Yesu din+ so mmra.”
31 Bere a wowiee wɔn adesrɛ no, baabi a wohyiaam no wosowee;+ na honhom kronkron hyɛɛ wɔn nyinaa mãmã+ na wɔde akokoduru kaa Onyankopɔn asɛm no.+
32 Bio nso, nnipadɔm a wɔagye adi no nyaa koma ne ɔkra koro,+ na wɔn mu biako mpo anka sɛ biribi a ɔwɔ no yɛ n’ankasa de; na mmom biribiara a wɔwɔ yɛ kwasafode.+
33 Afei nso, asomafo no de tumi kɛse kɔɔ so dii Awurade Yesu wusɔre no ho adanse;+ na wonyaa adom pii.
34 Nokwarem no, wɔn mu biara nni hɔ a na biribi hia no;+ efisɛ na wɔn a wɔwɔ nsase anaa afie no nyinaa tɔn de nea wonya no ba
35 na wɔde begu asomafo no nan ase.+ Na wɔn nso kyekyɛ+ ma obiara sɛnea n’ahiade te.
36 Enti Yosef a asomafo no too ne din Barnaba,+ a asekyerɛ ne Awerɛkyekye Ba, Lewini a ofi Kipro,
37 a ɔwɔ asase bi no, tɔn de sika no beguu asomafo no nan ase.+
