Atemmufo 17:1-13
17 Ná ɔbarima bi te Efraim+ bepɔw so a ne din de Mika.
2 Da bi ɔka kyerɛɛ ne maame sɛ: “Nnwetɛbona apem ne ɔha a obi fa fii wo nkyɛn a wobɔɔ ho dua+ na woka ma metee no, hwɛ, dwetɛ no wɔ me hɔ. Me na mefae.”+ Ɛnna ne maame kae sɛ: “Yehowa nhyira me ba yi.”+
3 Enti ɔde nnwetɛbona apem ne ɔha no san maa ne maame,+ na ne maame kae sɛ: “Me ba yi nti, mehyira dwetɛ yi so ama Yehowa, na mɛma wɔde ayɛ ohoni a wɔasen+ ne nea wɔagu.+ Na mɛsan de ama wo.”
4 Na ɔsan de dwetɛ no maa ne maame, na ne maame yii nnwetɛbona ahanu maa dwetɛ dwumfo+ bi. Na ɔyɛɛ ohoni a wɔasen+ ne nea wɔagu+ de sii Mika fie.
5 Ná Mika wɔ abosomfie+ bi wɔ hɔ, na ɔyɛɛ asɔfotade+ ne terafim honi,+ na ɔde tumi hyɛɛ ne ba biako nsa+ ma ɔsomee sɛ ne sɔfo.+
6 Saa bere no, na ɔhene biara nni Israel.+ Nea ɛteɛ wɔ obiara ani so na ɔyɛe.+
7 Na Lewini+ aberante bi te Betlehem+ wɔ Yuda. Saa bere no na wakɔsoɛ Yuda abusua mu kakra.
8 Ɔbarima no fii Betlehem kurow a ɛwɔ Yuda kyin kɔhwehwɛɛ baabi a obenya atena kakra. Ɔnenam no, okopuee Mika fie wɔ Efraim bepɔw so.+
9 Na Mika bisaa no sɛ: “Wufi he?” Na obuae sɛ: “Meyɛ Lewini a mifi Betlehem wɔ Yuda, na merehwehwɛ baabi a menya atena kakra.”
10 Afei Mika ka kyerɛɛ no sɛ: “Tena me nkyɛn, na memfa wo nyɛ me papa+ ne me sɔfo,+ na mɛma wo nnwetɛbona du afe biara ne asɔfotade ne w’ano aduan.” Na Lewini no baa fie hɔ.
11 Enti Lewini no penee so ne ɔbarima no tenae, na aberante no bɛyɛe sɛ ne mma no mu biako.
12 Na Mika de tumi hyɛɛ Lewini no nsa+ sɛnea ɛbɛma aberante no ayɛ ne sɔfo+ na watena Mika fie.
13 Ɛnna Mika kae sɛ: “Afei na mahu sɛ Yehowa ne me bedi no yiye, efisɛ manya Lewini sɛ me sɔfo.”+
