Atemmufo 21:1-25
21 Ná Israel mmarima aka ntam wɔ Mispa+ sɛ: “Yɛn mu biara nni hɔ a ɔde ne babea bɛma Benyaminni aware.”+
2 Na ɔman no baa Betel+ bɛtenaa nokware Nyankopɔn+ no anim kosii anwummere, na wɔmaa wɔn nne so sui pii.+
3 Na wɔkae sɛ: “O Israel Nyankopɔn Yehowa, asɛm bɛn na ato Israel yi? Dɛn nti na nnɛ abusuakuw biako ayera afi Israel?”+
4 Ade kyee no, nkurɔfo no sɔree ntɛm sii afɔremuka, na wɔbɔɔ ɔhyew afɔre+ ne asomdwoe afɔre+ wɔ hɔ.
5 Na Israelfo no bisae sɛ: “Israel mmusua nyinaa mu, hena na wamma Yehowa anim wɔ guabɔ no ase? Yɛaka ntankɛse+ sɛ nea wamma Yehowa anim wɔ Mispa no, ‘Ɛsɛ sɛ wokum no.’”+
6 Israelfo no dii wɔn nua Benyamin ho awerɛhow, na wɔkae sɛ: “Ɛnnɛ wɔatwa abusuakuw biako afi Israel.
7 Bere a yɛaka ntam+ wɔ Yehowa anim sɛ yɛremfa yɛn mmabea mma wɔn aware+ yi, yɛbɛyɛ dɛn anya ɔyerenom ama wɔn a wɔaka no?”
8 Wɔtoaa so bisae sɛ: “Israel mmusua mu hena na wamma Yehowa anim wɔ Mispa?”+ Na wohui sɛ obiara amfi Yebes-Gilead+ amma guabɔ no ase wɔ asoɛe hɔ.
9 Na bere a wɔkan nkurɔfo no, na Yebes-Gileadfo no mu biara nni hɔ.
10 Enti asafo no somaa mmarima akatakyi no mu akunini mpem dumien sɛ: “Momfa nkrante nkokunkum Yebes-Gileadfo, mmea ne mmofra mpo.+
11 Na nea monyɛ ni: Munkum mmarima no nyinaa ne mmea a wɔne mmarima ada pɛn nyinaa.”+
12 Na wohui sɛ mmabaa, mmaabun ankasa,+ ahanan wɔ Yebes-Gilead+ a wɔne mmarima nnae da. Na wɔde wɔn baa wɔn asoɛe wɔ Silo+ a ɛwɔ Kanaan asase so no.
13 Afei asafo no nyinaa tuu abɔfo kɔɔ Benyaminfo a wɔte Rimon+ botan so no nkyɛn, na wɔne wɔn kaa asomdwoesɛm.
14 Enti Benyaminfo no san bae saa bere no mu. Na wɔde Yebes-Gileadfo+ mmea a wɔankum wɔn no maa wɔn, nanso anso wɔn nyinaa so.+
15 Benyaminfo+ no asɛm haw ɔman no, efisɛ na Yehowa ama mpaapaemu aba Israel mmusua no mu.
16 Enti asafo no mu mpanyimfo no kae sɛ: “Mprempren yi a wɔahyew Benyaminfo mmea nyinaa ase yi, yɛbɛyɛ dɛn anya ɔyerenom ama wɔn a wɔaka no?”
17 Ɛnna wɔkae sɛ: “Ɛsɛ sɛ Benyaminfo a wonyaa wɔn ti didii mu no nya agyapade,+ na wɔampopa abusuakuw bi amfi Israel.
18 Na yɛn de, yɛrentumi mfa yɛn mmabea mma wɔn aware, efisɛ Israelfo aka ntam sɛ, ‘Nnome nka nea ɔde ɔbea bi bɛma Benyamin aware.’”+
19 Afei wɔkae sɛ: “Hwɛ, afe biara wɔhyɛ fã ma Yehowa wɔ Silo+ a ɛwɔ Betel atifi, ɔtempɔn a efi Betel kɔ Sekem+ no apuei, wɔ Lebona anafo.”
20 Enti wɔka kyerɛɛ Benyaminfo no sɛ: “Monkɔtɛw bobe nturo no mu.
21 Na sɛ muhu sɛ Silo mmabaa no aba rebɛsaw*+ a, mumfi bobe nturo no mu mmra na obiara nkyere Silo mmabaa no bi sɛ ne yere, na monsan nkɔ Benyamin asase so.
22 Na sɛ ɛba sɛ wɔn papanom ne wɔn nuabarimanom ne yɛn bɛtwe manso a, yɛbɛka akyerɛ wɔn sɛ, ‘Monhwɛ yɛn anim nhu wɔn mmɔbɔ, efisɛ yɛannya yere amma wɔn nyinaa wɔ ɔko mu.+ Afei nso ɛnyɛ mo na mode mmea no maa wɔn, anyɛ saa a anka sesɛɛ moadi fɔ.’”+
23 Enti Benyaminfo no yɛɛ saa pɛpɛɛpɛ, na wɔkyeree mmabaa a wɔbɛsawee no bi+ ma obiara nyaa ne yere.+ Afei wɔsan wɔn akyi kɔɔ wɔn agyapade so, na wɔkyekyee nkurow+ tenatenaa mu.
24 Israelfo no nso fii hɔ kɔe saa bere no, na obiara kɔɔ n’abusuakuw mu ne ne fie, na wofii hɔ kɔɔ wɔn agyapade so.+
25 Saa bere no, na ɔhene biara nni Israel.+ Nea ɛteɛ wɔ obiara ani so na ɔyɛe.+
Ase Hɔ Nsɛm
^ Ɛkyerɛ “asaw a wɔsaw twa kanko.”
