Daniel 1:1-21
1 Yuda hene Yehoiakim+ ahenni afe a ɛto so abiɛsa mu no, Babilon hene Nebukadnesar baa Yerusalem, na obetwaa ho hyiae.+
2 Bere bi akyi no, Yehowa de Yuda hene Yehoiakim ne nokware Nyankopɔn fie anwenne+ no bi hyɛɛ ne nsa,+ na ɔde kɔɔ ne nyame fie wɔ Sinar+ asase so, na ɔde anwenne no koguu ne nyame adekoradan mu.+
3 Na ɔhene ka kyerɛɛ n’ahemfie panyin+ Aspenas sɛ ɔmfa Israelfo no bi ne ahene asefo ne adehye+ no bi mmra,
4 mmerantewa a wɔn ho nni dɛm+ biara na wɔn ho yɛ fɛ, wɔwɔ nyansa+ nyinaa mu ntease, wɔwɔ nimdeɛ ne nhumu,+ a wobetumi agyina ɔhene anim,+ na ɔnkyerɛ wɔn mma wonsua Kaldeafo nhoma ne wɔn kasa.
5 Afei nso ɔhene hyɛe sɛ wɔmma wɔn ɔhene nnuan+ ne ne nsã a ɔnom no bi da biara, na wɔnhwɛ wɔn mfe abiɛsa, na ɛno akyi no wommegyina ɔhene anim.
6 Wɔn mu bi a wofi Yudafo mu ne Daniel,+ Hanania, Misael ne Asaria.+
7 Na ahemfie panyin no totoo wɔn din.+ Ɔtoo Daniel din Beltesasar,+ ɔtoo Hanania din Sadrak, ɔtoo Misael din Mesak, na ɔtoo Asaria din Abednego.+
8 Na Daniel suaee ne komam sɛ ɔremfa ɔhene nnuan ne ne nsã a ɔnom no ngu ne ho fĩ,+ enti ɔsrɛɛ ahemfie panyin no daa sɛnea ɛbɛyɛ a ɔrengu ne ho fĩ.+
9 Na nokware Nyankopɔn maa Daniel nyaa ahemfie panyin no anim adɔe ne mmɔborɔhunu.+
10 Na ahemfie panyin no ka kyerɛɛ Daniel sɛ: “Misuro me wura ɔhene a wayi aduan ne nsã ama mo no.+ Dɛn nti na mopɛ sɛ ohu sɛ mo anim ayɛ mmɔbɔmmɔbɔ sen mo atipɛnfo mmerantewa no? Na dɛn nti na moreyɛ ama me ti atõ ɔhene anim yi?”
11 Ɛnna Daniel ka kyerɛɛ ɔpanyin a ahemfie panyin+ no de no asi Daniel, Hanania, Misael ne Asaria so no sɛ:
12 “Yɛsrɛ wo, sɔ wo nkoa hwɛ dadu, na ma wɔmma yɛn afumduan+ nni ne nsu nnom,
13 na hwɛ yɛn ne mmerantewa a wodi ahennuan no anim, na sɛnea wubehu no no, wo ne wo nkoa nni no saa.”
14 Ɛnna ɔpenee nea wɔkae no so, na ɔsɔɔ wɔn hwɛe dadu.
15 Dadu no soe no, wohui sɛ wɔn anim ayɛ fɛ na wɔayeyɛ akɛse sen mmerantewa a wodii ahennuan no nyinaa.+
16 Enti ɔpanyin a ɔhwɛ wɔn no yii wɔn ahennuan ne nsã a wɔbɛnom no fii hɔ, na ɔmaa wɔn afumduan+ daa.
17 Na mmerantewa baanan yi, nokware Nyankopɔn maa wɔn nhoma ne nyansa nyinaa mu nimdeɛ ne nhumu,+ na Daniel nyaa anisoadehu ne adae nyinaa mu ntease.+
18 Nna a ɔhene hyɛe sɛ wɔmfa wɔn mmra no soe no,+ ahemfie panyin no de wɔn baa Nebukadnesar anim.
19 Na ɔhene ne wɔn kasae, na wɔn nyinaa mu no, wɔanhu nea ɔte sɛ Daniel, Hanania, Misael ne Asaria;+ na wogyinaa ɔhene anim+ daa.
20 Nyansa ne nhumu asɛm biara+ a ɔhene bisaa wɔn no, ohui sɛ n’ahenni nyinaa mu no, wɔkyɛn akɔmfo+ ne nkonyaayifo+ a wɔwɔ hɔ no nyinaa mpɛn du.
21 Na Daniel tenaa hɔ koduu ɔhene Kores afe a edi kan mu.+
