Daniel 2:1-49
2 Na Nebukadnesar ahenni afe a ɛto so abien mu no, Nebukadnesar sosoo adae+ bi, na ne ho yeraw no,+ na ne nna tu yerae.
2 Enti ɔhene kae sɛ wɔnkɔfrɛ akɔmfo+ ne nkonyaayifo ne asumanfo ne Kaldeafo no mmra na wɔmmɛka ɔhene adae no nkyerɛ no.+ Na wɔbae begyinagyinaa ɔhene anim.
3 Na ɔhene ka kyerɛɛ wɔn sɛ: “Maso dae bi ma me ho yeraw me, na mepɛ sɛ mihu ɔdae no.”
4 Ɛnna Kaldeafo no ka kyerɛɛ ɔhene wɔ Aram kasa+ mu sɛ: “O ɔhene, nya nkwa daa.+ Ka dae no kyerɛ wo nkoa, na yɛbɛkyerɛ ase.”+
5 Na ɔhene ka kyerɛɛ Kaldeafo no sɛ: “Merehyɛ mmara sɛ: Sɛ moanka ɔdae no ankyerɛ me na moankyerɛ ase a, wobetwitwa mo mu asinasin+ na wɔadan mo afie agyananbea.+
6 Na sɛ moka ɔdae no na mokyerɛ ase a, mubenya me hɔ akyɛde ne ayɛyɛde ne nidi kɛse.+ Enti monka ɔdae no nkyerɛ me na monkyerɛ ase.”
7 Ɛnna wɔkae ne mprenu so sɛ: “Ma ɔhene nka ɔdae no nkyerɛ ne nkoa ɛ, na yɛbɛkyerɛ ase.”
8 Na ɔhene kae sɛ: “Minim ampa sɛ bere ara na morepɛ, efisɛ moahu sɛ merehyɛ mmara.
9 Sɛ moanka ɔdae no ankyerɛ me a, asɛm biako pɛ yi+ na ɛda hɔ ma mo. Minim sɛ moasusuw atosɛm ne nnaadaasɛm sɛ morebɛka wɔ m’anim+ de akosi sɛ bere no bɛsakra. Enti monka ɔdae no nkyerɛ me na minhu sɛ mubetumi akyerɛ ase.”
10 Ɛnna Kaldeafo no ka kyerɛɛ ɔhene sɛ: “Onipa bi nni asase so a obetumi aka asɛm yi akyerɛ ɔhene, na ɔhenkɛse anaa amrado biara mmisaa ɔkɔmfo anaa nkonyaayifo anaa Kaldeani biara hɔ asɛm a ɛte sɛɛ da.
11 Asɛm a ɔhene rebisa yi yɛ den, na obiara nni hɔ a obetumi akyerɛ asɛm yi wɔ ɔhene anim, gye anyame+ a wɔn tenabea nni nnipa mu no.”+
12 Ɛno nti ɔhene bo fuwii, na n’ani beree kɛse,+ na ɔkae sɛ wɔnsɛe Babilon anyansafo nyinaa.+
13 Na wɔhyɛɛ mmara no, enti wɔkɔe sɛ wɔrekokunkum anyansafo no, na wɔhwehwɛɛ Daniel ne ne mfɛfo no sɛ wobekunkum wɔn nso.
14 Saa bere no, Daniel de nhumu ne nyansa+ ne ɔhene awɛmfo so panyin Ariok a ofii adi sɛ ɔrekokunkum Babilon anyansafo no kasae.
15 Obisaa ɔhene awɛmfo so panyin Ariok sɛ: “Ɛdɛn nti na ɔhene ahyɛ mmara dennen sɛɛ yi?” Ɛnna Ariok kaa asɛm no kyerɛɛ Daniel.+
16 Na Daniel kɔe kɔsrɛɛ ɔhene sɛ ɔmma no bere na ɔmmɛkyerɛ ase nkyerɛ ɔhene.+
17 Ɛno akyi no, Daniel kɔɔ ne fie, na ɔkɔkaa asɛm no kyerɛɛ ne mfɛfo Hanania, Misael ne Asaria,
18 na ɔkae sɛ wɔnsrɛ ɔsoro Nyankopɔn+ hɔ mmɔborɔhunu,+ ahintasɛm yi ho,+ na wɔansɛe Daniel ne ne mfɛfo no anka Babilon anyansafo a aka no ho.+
19 Ɛnna woyii ahintasɛm no adi kyerɛɛ Daniel anadwo anisoadehu mu.+ Enti Daniel hyiraa+ ɔsoro Nyankopɔn no.
20 Na Daniel kae sɛ: “Nhyira nka Onyankopɔn din+ daa daa, efisɛ ɔno na nyansa ne tumi wɔ no.+
21 Ɔno na ɔsakra bere ne nna,+ na otu ahene si ahene,+ na ɔma anyansafo nyansa, na ɔma wɔn a wɔwɔ nhumu nso nimdeɛ.+
22 Ɔno na oyi nea emu dɔ ne ahintasɛm adi.+ Ɔno na onim nea ɛwɔ esum mu;+ ɔno na hann+ ne no te.
23 O m’agyanom Nyankopɔn, wo na miyi wo ayɛ kamfo wo,+ efisɛ woama me nyansa+ ne tumi. Na afei woayi nea yɛsrɛɛ wo no adi akyerɛ me, na ɔhene asɛm no, woama yɛahu.”+
24 Ɛno nti Daniel kɔɔ Ariok+ a ɔhene ayi no sɛ ɔnsɛe Babilon anyansafo no nkyɛn. Ɔkɔe no, asɛm a ɔka kyerɛɛ no ne sɛ: “Babilon anyansafo no,+ nsɛe obiara. Fa me kɔ ɔhene anim,+ na menkɔkyerɛ ɔhene dae no ase.”
25 Ɛnna Ariok yɛɛ ntɛm de Daniel kɔɔ ɔhene anim, na nea ɔka kyerɛɛ no ni: “Mahu Yuda atukɔfo+ no mu ɔbarima bi a obetumi akyerɛ ɔhene ɔdae no ase.”
26 Na ɔhene bisaa Daniel a ne din de Beltesasar+ no sɛ: “Wugye di sɛ wubetumi aka ɔdae a mesoe no ne ne nkyerɛase akyerɛ me?”+
27 Daniel buae wɔ ɔhene anim sɛ: “Ahintasɛm a ɔhene abisa no, anyansafo, nkonyaayifo, akɔmfo, ne nsoromma mu ahwɛfo rentumi nyi no adi nkyerɛ ɔhene.+
28 Nanso Onyankopɔn bi wɔ ɔsoro a oyi ahintasɛm adi,+ na wama Ɔhene Nebukadnesar ahu nea ɛbɛba nna a edi akyiri no mu.+ Wo dae ne anisoadehu a wunyae wɔ wo mpa so no ni:
29 “Wo, ɔhene, wususuw nea daakye ɛbɛba no ho wɔ wo mpa so,+ na Nea oyi ahintasɛm adi no ama woahu nea ɛbɛba.+
30 Na me de, ɛnyɛ nyansa a ɛwɔ me mu sen ateasefo nyinaa nti na wɔayi ahintasɛm yi akyerɛ me,+ na mmom nea ɛbɛyɛ na ɔhene ahu nkyerɛase no, na woahu wo koma mu nsusuwii ntia.+
31 “Wo, ɔhene, wohwɛe, na hwɛ! ohoni kɛse bi ni. Ná ohoni no sõ, na ɛhyerɛn hyɛnn; ná egyina w’anim, na ɛyɛ hu.
32 Ohoni no, ne ti yɛ sika pa,+ ne koko ne n’abasa yɛ dwetɛ,+ ne yafunu ne n’asrɛ yɛ kɔbere,+
33 n’anan yɛ dade,+ ne nan ase fã bi yɛ dade, na ɔfã bi nso yɛ dɔte.+
34 Wohwɛe ara kosii sɛ ɔbo bi a nsa biara nkura mu+ tew bɛbɔɔ ohoni no nan ase a ɛyɛ dade ne dɔte no, na ebubuu no.+
35 Saa bere no, dade, dɔte, kɔbere, dwetɛ ne sika no nyinaa bubui, na ɛyɛe sɛ ahohuru bere mu awiporowbea so ntɛtɛwa,+ na mframa sesaw kɔe, na wɔanhu ɛho biribiara bio.+ Ɔbo a ɛbɔɔ ohoni no dan bepɔw kɛse, na ɛyɛɛ asase nyinaa so ma.+
36 “Ɔdae no ni, na yɛbɛka ne nkyerɛase akyerɛ ɔhene.+
37 Wo, ɔhene, woyɛ ahene mu hene, na wo na ɔsoro Nyankopɔn de ahenni+ ne tumi ne ahoɔden ne anuonyam ama wo,
38 na baabiara a nnipa mma ne wuram mmoa ne wim nnomaa te no, ɔde wɔn ahyɛ wo nsa,+ na ɔde wo asi wɔn nyinaa so. Wone sika ti no.+
39 “W’akyi no, ahenni foforo bɛsɔre+ a ennu wo de no,+ na ahenni foforo a ɛto so abiɛsa a ɛyɛ kɔbere a ebedi asase nyinaa so bɛsɔre.+
40 “Na ahenni a ɛto so anan no+ de, ɛbɛyɛ den sɛ dade.+ Na sɛnea dade bubu na ɛyam ade nyinaa no, saa ara na ebebubu na ayam eyinom nyinaa sɛnea dade yam ade no.+
41 “Na sɛnea wuhuu nan ase ne nansoaa no sɛ ɔfã bi yɛ ɔnwemfo dɔte na ɔfã bi nso yɛ dade no,+ saa ara na ahenni no mu bɛpaapae,+ nanso sɛnea wuhui sɛ dɔte frafra dade no mu no,+ dade denyɛ bɛda adi wom.
42 Na nansoaa a ne fã bi yɛ dade na ne fã bi nso yɛ dɔte no, ahenni no fã bi bɛyɛ den na ɔfã bi nso ayɛ mmerɛw.
43 Na sɛnea wuhui sɛ dɔte ne dade adi afra no, ɛne nnipa mma bedi afra, nanso ɛremfomfam ho, sɛnea dade ne dɔte ntumi mfra no.
44 “Na ahene no nna no mu no,+ ɔsoro Nyankopɔn+ bɛma ahenni bi so.+ Wɔrensɛe no da,+ na wɔrennyaw ahenni no mma ɔman foforo biara.+ Ebebubu ahenni horow no nyinaa ama asã,+ na ɛno de, ebegyina daa;+
45 sɛnea wuhui sɛ ɔbo a nsa biara nkura mu+ tew fii bepɔw ho, na ebebubuu dade, kɔbere, dɔte, dwetɛ ne sika no,+ saa ara na ɛbɛyɛ. Onyankopɔn Kɛse+ no na wakyerɛ ɔhene nea ɛbɛba daakye.+ Ɔdae no wom, na ne nkyerɛase nso yɛ nokware.”+
46 Ɛnna Ɔhene Nebukadnesar de n’anim butuw fam, na ɔde nidi maa Daniel, na ɔkae sɛ wɔmma no akyɛde na wɔnhyew aduhuam mma no.+
47 Na Ɔhene ka kyerɛɛ Daniel sɛ: “Ampa ara, mo Nyankopɔn no yɛ anyame mu Nyame+ ne ahene Wura+ ne Nea oyi ahintasɛm adi, efisɛ woatumi ayi ahintasɛm yi adi.”+
48 Enti ɔhene yɛɛ Daniel onipa kɛse,+ na ɔmaa no akyɛde akɛse bebree, na ɔma odii Babilon mantam no nyinaa so tumi,+ na ɔyɛɛ no Babilon anyansafo nyinaa so panyin.
49 Daniel nso srɛɛ ɔhene ma ɔde Sadrak, Mesak ne Abednego+ sisii Babilon mantam no so sɛ ahwɛfo, na Daniel de, ɔtenaa ahemfie.+
