Daniel 4:1-37
4 “Ɔhene Nebukadnesar de eyi kɔma aman, nkurɔfo ne kasa horow nyinaa a wɔte asase nyinaa so:+ Mo asomdwoe nnɔɔso.+
2 Nsɛnkyerɛnne ne anwonwade a Ɔsorosoroni Nyankopɔn ayɛ ama me no, ayɛ me fɛ sɛ mɛka ho asɛm.+
3 Hwɛ sɛnea ne nsɛnkyerɛnne sõsõ, na n’anwonwade yɛ kɛse fa!+ N’ahenni yɛ daa ahenni,+ na ne tumi wɔ hɔ, awo ntoatoaso nyinaa mu.+
4 “Me, Nebukadnesar, ná mete me fie dwoodwoo,+ na midi yiye m’ahemfie.+
5 Mesoo ɔdae bi a ɛma mebɔɔ hu,+ na me mpa so adwennwen ne m’anisoadehu ma misuroe.+
6 Enti mehyɛe sɛ wɔmfa Babilon anyansafo nyinaa mmra m’anim na wɔmmɛkyerɛ me ɔdae+ no ase.
7 “Ɛnna akɔmfo, nkonyaayifo, Kaldeafo+ ne nsoromma mu ahwɛfo+ no bae, na mekaa dae no kyerɛɛ wɔn, nanso wɔantumi ankyerɛ me ase.+
8 Na akyiri yi, Daniel a wɔfrɛ no Beltesasar,+ sɛnea me nyame no din+ te, a ɔwɔ anyame kronkron no honhom+ no baa m’anim, na mekaa dae no n’anim sɛ:
9 “‘Akɔmfo panyin+ Beltesasar, minim sɛ anyame kronkron honhom wɔ wo mu,+ na ahintasɛm biara nni hɔ a ɛkyere wo so,+ enti ka me dae mu adehu a mihui ne ne nkyerɛase kyerɛ me.+
10 “‘Afei me dae ne anisoadehu a minyae wɔ me mpa so mu no, mihui+ na hwɛ! dua+ bi si asase mfinimfini a ɛware tenteenten.+
11 Dua no nyin bɛyɛɛ den, na ne tenten koduu ɔsoro, na wohui wɔ asase so baabiara.+
12 Ná n’ahaban yɛ fɛ, na n’aba dɔɔso, na aduan wɔ so ma obiara. Wuram mmoa+ gyee nwini wɔ ase,+ na wim nnomaa nso sisii ne mmaa so.+ Ɔhonam nyinaa nso didii so.
13 “‘Mekɔɔ so hwɛe, me dae ne anisoadehu a minyae wɔ me mpa so no mu, na hwɛ! ɔwɛmfo,+ ɔkronkronni,+ bi na ofi ɔsoro resian ba yi.
14 Na ɔteɛɛm denneennen sɛ: “Muntwa dua no+ na muntwitwa ne mmaa. Momporow n’ahaban na mompansam n’aba. Mmoa nguan mfi ase, na nnomaa ntutu mfi ne mmaa so.+
15 Nanso munnyaw ne dunsin asase mu, na momfa dade ne kɔbere nkyekyere wɔ wuram sare so, na ɔsoro bosu mfɔw no, na ɛne mmoa ntena asase so wuram.+
16 Ma ne koma nsesa na anyɛ ɔdesani de bio, na wɔmma no aboa koma+ na mmere ason+ ntwa ne ti so.
17 Awɛmfo+ ahyɛde so na asɛm yi ba, na akronkronfo asɛm so na atemmu yi gyina na ama ateasefo ahu sɛ Ɔsorosoroni no na odi adesamma ahenni so tumi,+ na obiara a ɔpɛ no, ɔde ma no,+ na nnipa mu akumaa koraa na ɔde no si so.”+
18 “‘Ɔdae yi na me, Ɔhene Nebukadnesar, mesoe. Na afei wo, Beltesasar, kyerɛ ase, efisɛ m’ahenni mu anyansafo a wɔaka nyinaa antumi ankyerɛ me ase.+ Nanso wo de, esiane sɛ wowɔ anyame kronkron no honhom nti,+ migye di sɛ wubetumi.’
19 “Ɛnna Daniel a ne din de Beltesasar+ no ho dwiriw no kakra, na ne tirim adwene ma ɔbɔɔ hu.+
“Ɔhene kae sɛ, ‘Beltesasar, mma ɔdae no ne ne nkyerɛase mmmɔ wo hu.’+
“Beltesasar buae sɛ, ‘O me wura, anka ma ɔdae no mfa wɔn a wokyi wo ho na ne nkyerɛase mfa w’atamfo ho.+
20 “‘Dua a wuhui a enyin bɛyɛɛ kɛse na ɛyɛɛ den a ne tenten kɔpem ɔsoro a wohui wɔ asase so baabiara,+
21 na n’ahaban yɛ fɛ na n’aba dɔɔso na aduan wɔ so ma obiara, na wuram mmoa tete ase na wim nnomaa sisi ne mmaa so no,+
22 O ɔhene,+ ɛyɛ wo ara, efisɛ woayɛ kɛse na woayɛ den, na wo kɛseyɛ akɔ ara akodu ɔsoro,+ na wo tumidi akodu asase ano nohoa.+
23 “‘Enti sɛ́ ɔhene huu ɔwɛmfo, ɔkronkronni+ bi, sɛ ofi ɔsoro reba na ɔkae sɛ: “Muntwa dua no nsɛe no, nanso munnyaw ne dunsin asase mu, na momfa dade ne kɔbere nkyekyere wɔ wuram sare so, na ɔsoro bosu mfɔw no, na ɛne wuram mmoa ntena nkosi sɛ mmere ason betwa ne ti so” no,+
24 Ɔhene, nkyerɛase no ni, na Ɔsorosoroni+ no ahyɛde+ bɛba mu, me wura ɔhene so.+
25 Wɔbɛpam wo afi nnipa mu, na wuram mmoa na wo ne wɔn bɛtena,+ na wura na wɔde bɛma wo awe sɛ nantwi,+ na ɔsoro bosu bɛfɔw wo, na mmere ason+ atwa wo ti so, akosi sɛ wubehu sɛ Ɔsorosoroni no na odi adesamma ahenni so tumi,+ na obiara a ɔpɛ no, ɔde ma no.+
26 “‘Na sɛ́ wɔkae sɛ wonnyaw dua no dunsin no,+ sɛ wunya hu sɛ ɔsoro na edi tumi a,+ wɔbɛsan adan w’ahenni ama wo.
27 Enti ɔhene, ma m’afotu nyɛ wo fɛ,+ na yɛ adetrenee fa pa wo bɔne gu,+ na hu ahiafo mmɔbɔ fa popa w’amumɔyɛ.+ Ebia ɛbɛma woadi yiye akyɛ.’”+
28 Eyinom nyinaa baa ɔhene Nebukadnesar so.+
29 Asram dumien awiei no, da bi na ɔnenam Babilon ahemfie no soro.
30 Na ɔhene kae sɛ:+ “Ɛnyɛ Babilon Kɛse a mede me tumi kɛse akyekye de ayɛ ahenkurow,+ na ama m’anuonyam agye din no ni anaa?”+
31 Bere a ɔhene ano gu so reka asɛm no, ɛnne bi fi soro bae sɛ: “Wo ɔhene Nebukadnesar, wɔreka akyerɛ wo sɛ, ‘Ahenni no afi wo nsa.+
32 Wɔbɛpam wo afi nnipa mu, na wuram mmoa na wo ne wɔn bɛtena,+ na wura na wɔde bɛma wo awe sɛ nantwi, na mmere nson atwa wo ti so, akosi sɛ wubehu sɛ Ɔsorosoroni no na odi adesamma ahenni so tumi, na obiara a ɔpɛ no, ɔde ma no.’”+
33 Dɔn no mu ara+ na asɛm no baa mu Nebukadnesar so, na wɔpam no fii nnipa mu, na ɔwee wura sɛ nantwi, na ɔsoro bosu fɔw ne honam, de kosii sɛ ne nhwi fuwii sɛ ɔkɔre ntakra, na n’awerɛw yɛe sɛ nnomaa de.+
34 “Na nna no baa awiei no,+ me, Nebukadnesar, memaa m’ani so hwɛɛ ɔsoro,+ na m’adwene san bae, na mihyiraa Ɔsorosoroni no,+ na mekamfoo Nea ɔte ase daa no yii no ayɛ,+ efisɛ ne tumi yɛ daa tumi na n’ahenni wɔ hɔ, awo ntoatoaso nyinaa mu.+
35 Na asase sotefo nyinaa nsɛ hwee,+ na ɔyɛ nea ɔpɛ wɔ ɔsoro asafo ne asase sotefo mu.+ Obiara nni hɔ a obetumi abɔ ne nsa akyene+ anaa obetumi aka akyerɛ no sɛ, ‘Dɛn na woreyɛ yi?’+
36 “Saa bere no ara na m’adwene san bae, na sɛnea ɛbɛyɛ na masan anya m’ahenni anuonyam nti, me kɛseyɛ ne me hyerɛn san baa me so,+ na ɔhene agyinatufo ne m’abirɛmpɔn kyinkyin hwehwɛɛ me, na wɔde me sii m’ahenni so bio, na minyaa tumi a ɛsen kan de no kaa ho.+
37 “Afei me, Nebukadnesar, miyi ɔsoro Hene no ayɛ na mema no so hyɛ no anuonyam,+ efisɛ ne nnwuma nyinaa yɛ nokware, na n’akwan yɛ atɛntrenee,+ na wɔn a wɔnam ahantan so no, otumi brɛ wɔn ase.”+
