Daniel 5:1-31
5 Ɔhene Belsasar+ tow ponkɛse maa n’abirɛmpɔn apem, na ɔnom nsã wɔ apem no anim.+
2 Bere a nsã+ no bow Belsasar no, ɔkae sɛ wɔmfa sika ne dwetɛ anwenne+ a ne papa* Nebukadnesar kɔfa fii Yerusalem asɔrefie hɔ bae no mmra mma ɔhene ne n’abirɛmpɔn ne ne yerenom ne n’ayefam nnom mu.+
3 Ɛnna wɔde sika anwenne a wɔkɔfa fii Onyankopɔn asɔrefie a ɛwɔ Yerusalem no bae, na ɔhene ne n’abirɛmpɔn, ne yerenom ne n’ayefam no nom mu.
4 Wɔnonom nsã, na wɔkamfoo sika ne dwetɛ, kɔbere, dade, dua ne abo anyame no.+
5 Dɔn no mu ara na onipa nsateaa bae bɛkyerɛw ahemfie no fasu no ho,+ kaneadua no anim, na ɔhene huu nsa a ɛrekyerɛw no akyi.
6 Ɛnna ɔhene anim danee, na ne tirim nsusuwii ma ɔbɔɔ hu,+ na n’asen mu hodwowee,+ na ne nkotodwe keka boom.+
7 Ɔhene teɛɛm denneennen sɛ wɔnkɔfa nkonyaayifo, Kaldeafo ne nsoromma mu ahwɛfo no mmra.+ Na ɔhene ka kyerɛɛ Babilon anyansafo no sɛ: “Obiara a ɔbɛkan nkyerɛwee yi na wakyerɛ me ase no, wobefura no ɔtankɔkɔɔ+ de sika kɔnmuade agu ne kɔn mu, na ɔbɛyɛ nea ɔto so abiɛsa adi tumi wɔ ahenni yi mu.”+
8 Ɛnna ɔhene anyansafo no nyinaa bae, nanso wɔantumi ankan nkyerɛwee no, na wɔantumi ankyerɛ ɔhene ase.+
9 Enti Ɔhene Belsasar bɔɔ hu kɛse, na n’anim sakrae, na n’abirɛmpɔn no ho yeraw wɔn.+
10 Ɔhene ne n’abirɛmpɔn nsɛm no nti ɔhemmaa no baa apontow dan no mu. Na ɔhemmaa kae sɛ: “O ɔhene, nya nkwa daa!+ Mma wo tirim nsusuwii mmmɔ wo hu, na mma w’anim nnsakra.
11 Ɔbarima mmɔdenbɔfo bi wɔ w’ahenni mu a ɔwɔ anyame kronkron no honhom,+ na wo papa bere so no, wohuu no sɛ ɔwɔ nimdeɛ ne nhumu ne nyansa sɛ anyame nyansa, na wo papa, ɔhene Nebukadnesar, de no sii akɔmfo, nkonyaayifo, Kaldeafo ne nsoromma mu ahwɛfo so panyin,+ O ɔhene, wo papa ankasa.
12 Wohuu honhom a ɛkyɛn so ne nimdeɛ ne nhumu a wɔde kyerɛ dae+ ne aborɔme ase na wɔde san apɔw wɔ Daniel a ɔhene too no din Beltesasar+ no mu.+ Enti ma wɔnkɔfrɛ Daniel mmra na ɔmmɛkyerɛ ase.”
13 Ɛnna wɔde Daniel baa ɔhene anim. Na ɔhene bisaa Daniel sɛ: “Wone Daniel a wufi Yuda atukɔfo+ a me papa ɔhene de wɔn fi Yuda bae no mu no?+
14 Mate wo nka nso sɛ wowɔ anyame no honhom,+ na wɔahu sɛ wowɔ nimdeɛ ne nhumu, na wowɔ nyansa+ a ɛkyɛn so.
15 Na afei wɔde anyansafo ne nkonyaayifo no baa m’anim sɛ wɔmmɛkenkan nkyerɛwee yi na wɔnkyerɛ me ase, nanso wɔantumi ankyerɛ asɛm no ase.+
16 Mate wo nka sɛ wutumi kyerɛ nsɛm ase+ na wosan apɔw. Enti sɛ wutumi kenkan nkyerɛwee yi na wokyerɛ me ase a, wobefura wo ɔtankɔkɔɔ de sika kɔnmuade agu wo kɔn mu, na woayɛ nea ɔto so abiɛsa adi tumi wɔ ahenni yi mu.”+
17 Ɛnna Daniel kae wɔ ɔhene anim sɛ: “Ma w’ayɛyɛde ntena hɔ, na fa w’akyɛde ma nnipa foforo.+ Nanso mɛkenkan nkyerɛwee no akyerɛ ɔhene, na mama woahu ne nkyerɛase.+
18 Wo, ɔhene, Ɔsorosoroni Nyankopɔn+ no de ahenni ne kɛseyɛ ne nidi ne anuonyam+ maa wo papa Nebukadnesar.+
19 Tumi a ɔde maa no nti, aman, nkurɔfo ne kasa horow nyinaa ho popoe, na wosuroo n’anim.+ Nea ɔpɛ no, okum no, na nea ɔpɛ no, ɔma ɔtenaa ase; nea ɔpɛ no, ɔmaa no so, na nea ɔpɛ no, ɔbrɛɛ no ase.+
20 Nanso bere a ne koma maa ne ho so na ne honhom yɛɛ den ma ɔyɛɛ ahantan no,+ wotuu no fii n’ahengua so, na wogyee n’anuonyam fii ne nsam.+
21 Wɔpam no fii adesamma mu, na wɔmaa ne koma yɛe sɛ aboa de, na ɔne sare so mfurum tenae.+ Wɔma ɔwee wura sɛ nantwi, na ɔsoro bosu fɔw ne honam,+ kosii sɛ ohui sɛ Ɔsorosoroni Nyankopɔn no na odi adesamma ahenni so tumi, na obiara a ɔpɛ no, ɔde no si so.+
22 “Na wo, ne ba* Belsasar,+ wunim eyi nyinaa,+ nanso woammrɛ wo koma ase.+
23 Ɔsoro Wura no na woama wo ho so atia no,+ na wɔde ne fie anwenne aba w’anim,+ na wo ne w’abirɛmpɔn, wo yerenom ne w’ayefam anom mu nsã, na woakamfo dwetɛ ne sika, kɔbere, dade, dua ne abo anyame+ a wonhu ade na wɔnte asɛm na wonnim hwee no,+ na Onyankopɔn a wo home wɔ ne nsam+ a w’akwan nyinaa wɔ no no de,+ woanni no ni.+
24 Enti ɔno na ɔsomaa nsa bi bɛkyerɛw nkyerɛwee yi.+
25 Na nsɛm a ɛkyerɛwee no ni: MENE, MENE, TEKEL ne PARSIN.
26 “Asɛm no nkyerɛase ni: MENE, Onyankopɔn akan w’ahenni nna, na ɔde aba awiei.+
27 “TEKEL, wɔakari wo wɔ nsenia mu, na wɔahu sɛ wotɔ sin.+
28 “PERES, wɔakyɛ w’ahenni mu de ama Mediafo ne Persiafo.”+
29 Ɛnna Belsasar kae ma wofuraa Daniel ɔtankɔkɔɔ, na wɔde sika kɔnmuade guu ne kɔn mu, na wɔbɔ gyee no so sɛ ɔno na ɔbɛyɛ nea ɔto so abiɛsa adi tumi wɔ ahenni no mu.+
30 Saa anadwo no ara, wokum Kaldeafo hene Belsasar,+
31 na wɔde ahenni no maa Mediani Dario+ a saa bere no na wadi bɛyɛ mfe aduosia abien no.
