Deuteronomium 11:1-32
11 “Monnɔ Yehowa mo Nyankopɔn+ na muntie no, na munni n’ahyɛde ne n’atemmusɛm+ ne ne mmara so daa.
2 Na mo ara munim nnɛ sɛ ɛnyɛ mo mma na me ne wɔn kasae. (Wɔn de, wonnim na wɔanhu Yehowa mo Nyankopɔn nteɛso+ ne ne kɛseyɛ,+ ne nsa a ɛyɛ den+ ne ne basa a wateɛ mu,+
3 anaa sɛnkyerɛnne ne anwonwade a ɔde baa Egypt hene Farao ne ne man nyinaa so wɔ Egypt no.+
4 Afei wonnim sɛ bere a Egypt asraafo ne apɔnkɔ ne nteaseɛnam retiw mo no,+ Yehowa maa Po Kɔkɔɔ no bu faa wɔn so, na ɔsɛee wɔn koraa besi nnɛ.+
5 Wonnim nea ɔyɛɛ mo sare no so kosii sɛ mubeduu ha.
6 Na saa ara nso na wonnim sɛ ɔmaa asase mu buei na ɛmenee Ruben ba Eliab mma Datan ne Abiram+ ne wɔn fie ne wɔn ntamadan ne biribiara anaa obiara a odi wɔn akyi wɔ Israelfo nyinaa mu.)+
7 Mo na mode mo ani huu anwonwade akɛse a Yehowa yɛe no nyinaa.+
8 “Monhwɛ nni mmara a mede rema mo nnɛ yi nyinaa so+ na ama mo ho ayɛ den, na moatwa akɔfa asase a morekɔ so no.+
9 Eyi bɛma mo nna aware+ wɔ asase a Yehowa kaa ntam kyerɛɛ mo agyanom sɛ ɔde bɛma wɔn ne wɔn asefo no so,+ asase a nufusu ne ɛwo sen wɔ so no.+
10 “Asase a morekɔ akɔfa no nte sɛ Egypt asase a mufi so bae no. Ɛhɔ de, mudua ade a, na mode mo nan na egugu so nsu te sɛ mfikyifuw.
11 Nanso asase a morekɔfa yi yɛ mmepɔw+ ne abon asase a ɛnom nyankonsu.
12 Ɛyɛ asase a Yehowa mo Nyankopɔn hwɛ so. Yehowa mo Nyankopɔn ani+ wɔ so daa fi afe ahyɛase kosi afe awiei.
13 “Sɛ mutie ahyɛde+ a mede rema mo nnɛ yi na modɔ Yehowa mo Nyankopɔn de mo koma nyinaa ne mo kra nyinaa som no+ a,
14 ɛnde me nso mɛtɔ osu agu mo asase so wɔ ne bere mu,+ asusow ne adonsu.+ Na mobɛboaboa mo nnɔbae ne mo nsã dɔkɔdɔkɔ ne mo ngo ano.
15 Na mɛma mo mmoa anya sare awe wɔ mo asase so+ na mo nso moadidi amee.+
16 Monhwɛ yiye na biribiara antwetwe mo koma+ na moankɔsom anyame foforo ankotow wɔn.+
17 Sɛ moyɛ saa a, Yehowa abufuw bɛdɛw ahyɛ mo, na ɔbɛto ɔsoro mu na osu rentɔ,+ na asase remmɔ aduan. Ɛba saa a, ɛrenni da bi na moawuwu afi asase pa a Yehowa de ama mo no so.+
18 “Enti momfa me nsɛm yi nsie mo koma+ ne mo kra mu, na momfa nyɛ sɛnkyerɛnne nkyekyere mo nsa, na ɛnyɛ nkae ade wɔ mo moma so.+
19 Na momfa nkyerɛkyerɛ mo mma na monka ho asɛm bere a mote fie, bere a monam kwan so, bere a moda hɔ, ne bere a moasɔre.+
20 Na monkyerɛw ngu mo fie apon ne mo aponkɛse ho,+
21 na ama mo ne mo mma nna adɔɔso+ wɔ asase a Yehowa kaa ntam kyerɛɛ mo agyanom sɛ ɔde bɛma wɔn no so,+ bere tenten a ɔsoro kata asase so yi.+
22 “Na sɛ mutie mmara+ a mede rema mo yi nyinaa na mudi so, na modɔ Yehowa mo Nyankopɔn+ nantew n’akwan nyinaa so,+ na mode mo ho fam ne ho+ a,
23 Yehowa nso bɛpam aman yi nyinaa ama mo,+ na mubedi aman akɛse a wɔdɔɔso sen mo so.+
24 Baabi a mo nan betia biara bɛyɛ mo dea.+ Efi sare so kosi Lebanon, efi asubɔnten kɛse no, asubɔnten Eufrate, ho kosi atɔe fam po no ano nyinaa bɛyɛ mo asase.+
25 Obiara rentumi nnyina mo anim.+ Yehowa mo Nyankopɔn bɛma mo ho hu atɔ asase+ a mobɛfa so no nyinaa so na wama wɔasuro mo, sɛnea ɔhyɛɛ mo bɔ no.
26 “Monhwɛ, ɛnnɛ mede nhyira ne nnome asi mo anim:+
27 Sɛ mutie Yehowa mo Nyankopɔn ahyɛde+ a mede rema mo nnɛ yi a, nhyira na mubenya.
28 Na sɛ moantie Yehowa mo Nyankopɔn ahyɛde+ na moman fi ɔkwan a merekyerɛ mo nnɛ yi so kodi anyame foforo a munnim wɔn akyi a, ɛnde nnome+ na ɛbɛba mo so.
29 “Na sɛ Yehowa mo Nyankopɔn de mo du asase a morekɔfa no so a,+ munhyira wɔ Bepɔw Gerisim+ so na monnome wɔ Bepɔw Ebal+ so.
30 Hwɛ, ɛwɔ Yordan apuei wɔ Kanaanfo a wɔte Araba+ no asase so. Ɛhɔ bɛn More+ nnua akɛse a ɛwɔ Gilgal+ anim no.
31 Na moretwa Yordan akɔfa asase a Yehowa mo Nyankopɔn de ama mo no na moatena so.+
32 Enti monhwɛ nni ahyɛde ne atemmusɛm+ a mereka ho asɛm akyerɛ mo nnɛ no nyinaa so.+
