Deuteronomium 15:1-23
15 “Mfe ason biara awiei no, fa ɛka biara kyɛ.
2 Ɛho akwankyerɛ ni:+ Obiara mfa ka a ne yɔnko de no no nkyɛ. Ɛnsɛ sɛ ɔyere ne yɔnko anaa ne nua sɛ ontua,+ efisɛ ɔde ka no akyɛ wɔ Yehowa anim.+
3 Ɔhɔho+ de, wubetumi ayere no ama watua wo ka; nanso sɛ wo biribi kodi wo nua nkyɛn a, gyaw ma no.
4 Ɛnsɛ sɛ ehia obi wɔ wo kurom, efisɛ Yehowa behyira+ wo wɔ asase a Yehowa wo Nyankopɔn de ama wo sɛ agyapade no so.+
5 Nea ehia ara ne sɛ wubetie Yehowa wo Nyankopɔn asɛm na woadi ahyɛde a mede rema wo nnɛ yi nyinaa so.+
6 Yehowa wo Nyankopɔn behyira wo sɛnea ɔhyɛɛ wo bɔ no, na wubenya wo ho de bi afɛm+ amanaman pii, na wo de, worenkɔfɛm hwee; na wubedi amanaman pii so, na wo de, wɔrenni wo so.+
7 “Sɛ wudu asase a Yehowa wo Nyankopɔn de ama wo no so na ehia wo nua bi wɔ wo kurom a, mma wo koma anaa wo nsam nnyɛ den wɔ wo nua hiani no so.+
8 Bue wo nsam ma no+ na fa nea ohia biara fɛm no.
9 Hwɛ yiye na nsusuwii bɔne biara amma wo komam+ sɛ, ‘Aka kakraa bi na afe a ɛto so ason a wɔde ka kyɛ no adu.’+ Sɛ wudwen saa a, wobɛkata w’ani abɔ wo nua hiani no atirimɔden.+ Ɛba saa a, wo nti obesu afrɛ Yehowa+ na ɛbɛdan bɔne ama wo.+
10 Enti pɛ biribi ma no;+ mmɔ no ayamɔnwene na Yehowa wo Nyankopɔn ahwɛ so ahyira biribiara a woyɛ so, nea wo nsa beso mu biara.+
11 Hu sɛ ohiani rempa w’asase so.+ Eyi nti na merehyɛ wo sɛ, ‘Bue wo nsam ma wo nua a ne ho akyere no anaa nea ahia no wɔ w’asase so’ no.+
12 “Sɛ wɔtɔn wo nua Hebrini barima anaa ɔbea ma wo,+ na ɔsom wo mfe asia a, afe a ɛto so ason no, gyaa no ma ɔnkɔ.+
13 Na sɛ wugyaa no a, mma ɔmmfa nsapan nnkɔ.+
14 Fa wo nguan ne wo nnɔbae ne wo ngo ne wo nsã no bi gya no kwan. Hwɛ sɛnea Yehowa wo Nyankopɔn ahyira wo na wo nso pɛ biribi ma no.+
15 Kae sɛ na woyɛ akoa wɔ Egypt asase so na Yehowa wo Nyankopɔn gyee wo.+ Ɛno nti na mede mmara yi rema wo nnɛ no.
16 “Nanso sɛ ɔdɔ wo ne wo fiefo, na ɔte nka sɛ wanya asetena pa wɔ wo nkyɛn a, ebia ɔbɛka akyerɛ wo sɛ, ‘Mempɛ sɛ mifi wo nkyɛn!’+
17 Ɛba saa a, fa no tweri ɔpon ho na fa fitii bɔ n’asom tokuru ma ɔnyɛ w’akoa afebɔɔ.+ Sɛ ɔyɛ afenaa nso a yɛ no saa ara.
18 Mma ɛnnyɛ wo den sɛ wubegyaa no ma wakɔ,+ efisɛ adwuma a ɔde mfe asia yɛe no yɛ apaafo+ baanu adwuma, na Yehowa wo Nyankopɔn ahyira nea woayɛ biara so.+
19 “Hyira wo nguan ne w’anantwi mmakan a wɔyɛ anini no so ma Yehowa wo Nyankopɔn.+ Mfa wo nantwi abakan nyɛ adwuma na ntwitwa wo guan abakan ho nhwi.+
20 Wo ne wo fiefo nwe wɔ Yehowa wo Nyankopɔn anim afe biara wɔ faako a Yehowa bɛkyerɛ no.+
21 Sɛ aboa no atɔ apakye anaa n’ani abɔ anaa wadi dɛm foforo biara a, mfa no mmɔ afɔre mma Yehowa wo Nyankopɔn.+
22 We wɔ wo kurom. Obiara a ne ho tew ne nea ne ho ntew nyinaa betumi awe bi,+ te sɛ ɔwansan ne ɔforote.+
23 Nanso hwɛ na woanni ne mogya.+ Hwie gu fam sɛ nsu.+
