Deuteronomium 34:1-12
34 Afei Mose fi Moab sare so kɔɔ Bepɔw Nebo+ so wɔ Pisga+ a ɛne Yeriko+ di nhwɛanim no. Na Yehowa de asase no nyinaa kyerɛɛ no, fi Gilead kosi Dan,+
2 ne Naftali nyinaa ne Efraim ne Manase ne Yuda asase nyinaa kosi po a ɛda atɔe fam no ho,+
3 ne Negeb+ ne Yordan Mantam+ ne mmɛ kurow,+ Yeriko sare so, de kosi Soar.+
4 Na Yehowa toaa so ka kyerɛɛ no sɛ: “Asase yi na mekaa ntam kyerɛɛ Abraham ne Isak ne Yakob sɛ, ‘Mede bɛma w’asefo’+ no. Mama wode w’ani ahu, na wo nan de, ɛrensi hɔ.”+
5 Afei Yehowa akoa Mose+ wui wɔ Moab asase so sɛnea Yehowa kae no.+
6 Na osiee no bon mu wɔ Moab asase so, baabi a ɛne Bet-Peor+ di nhwɛanim, na obiara nhuu ne damoa de besi nnɛ.+
7 Bere a Mose wui no na wadi mfe ɔha aduonu.+ Na n’ani so anyɛ no kusuu,+ na n’ahoɔden so anhuan.+
8 Israelfo suu Mose adaduasa+ wɔ Moab sare so. Afei bere a wɔde suu Mose yɛɛ n’ayi no baa awiei.
9 Na nyansa bɛhyɛɛ Nun ba Yosua mã,+ efisɛ na Mose de ne nsa agu ne so.+ Na Israelfo yɛɛ aso tiee no na wɔyɛɛ nea Yehowa hyɛɛ Mose no pɛpɛɛpɛ.+
10 Nanso odiyifo biara nsɔree Israel a ɔte sɛ Mose+ a Yehowa huu no anim ne anim no.+
11 Sɛ yɛhwɛ nsɛnkyerɛnne ne anwonwade a Yehowa somaa no ma ɔkɔyɛe wɔ Egypt, Farao ne ne nkoa ne n’asase nyinaa so,+
12 ne ahoɔdenne ne ahude a Mose yɛe wɔ Israelfo nyinaa anim no a, obiara nni hɔ a ɔte sɛ ɔno.+
