Exodus 2:1-25
2 Saa bere no, ɔbarima bi a ofi Lewi fie kɔwaree Lewi babea+ bi.
2 Ɔbea no nyinsɛn woo ɔbabarima. Na bere a ohuu sɛnea ne ho yɛ fɛ no, ɔde no siei+ asram abiɛsa.+
3 Bere a ohui sɛ ontumi mfa no nsie bio no,+ ɔfaa demmire kɛntɛn* bi de kootaa ne amane+ yɛɛ ho na ɔde abofra no too mu de no kosii wura bi mu+ wɔ Nil asubɔnten ho.
4 Afei ne nuabea kogyinaa baabi hwɛɛ nea ɛbɛto no.+
5 Akyiri yi Farao babea baa Nil asubɔnten ho sɛ ɔrebeguare, na na ne mmaawa nenam asubɔnten no ho. Na ohui sɛ kɛntɛn bi si nwura no mu. Ɛhɔ ara na ɔsomaa n’abaawa biako sɛ ɔnkɔfa mmra.+
6 Obuee so no, ohui sɛ abarimaa no da mu a ɔresu. Na ɔyɛɛ no mmɔbɔ+ na ɔkae sɛ: “Hebrifo no bi ba ni.”
7 Ɛnna ne nuabea no bisaa Farao babea no sɛ: “Menkɔfrɛ Hebrifo mmea a wogyigye mmofra no bi na ɔmmɛhwɛ no mma wo?”
8 Na Farao babea no ka kyerɛɛ no sɛ: “Kɔ!” Na ntɛm ara abeawa no kɔfrɛɛ abofra no maame+ bae.
9 Na Farao babea no ka kyerɛɛ no sɛ: “Fa abofra yi kɔhwɛ no ma me, na metua wo ka.”+ Na ɔbea no faa abofra no kɔhwɛɛ no.
10 Abofra no nyinii no, ɔde no kɔmaa Farao babea no na ɔde no yɛɛ ne ba.+ Ɔtoo no din Mose, efisɛ ɔkae sɛ: “Nsu mu na miyii no fii.”+
11 Afei bere a Mose nyin yɛɛ ɔbarima mũ no, ofii adi kɔɔ ne nuanom nkyɛn kɔhwɛɛ adwumaden a wɔreyɛ no;+ na ohui sɛ Egyptni bi reboro ne nuanom Hebrifo no mu biako.+
12 Bere a ɔhwɛɛ ha ne ha a ohui sɛ obiara nni hɔ no, ɔbɔɔ Egyptni no kum no, na ɔde no hyɛɛ anhwea mu.+
13 Na ade kyee a ofii adi no, ohui sɛ Hebrifo baanu bi reko. Enti obisaa nea odi fɔ no sɛ: “Dɛn nti na woreboro wo yɔnko no?”+
14 Ɛnna obisaa no sɛ: “Hena na ɔpaw wo obirɛmpɔn ne ɔtemmufo wɔ yɛn so?+ Wopɛ sɛ wukum me sɛnea wukum Egyptni no+ anaa?” Afei Mose bɔɔ hu na ɔkae sɛ: “Ei, asɛm yi apue!”+
15 Afei Farao tee asɛm no na ɔpɛe sɛ okum Mose,+ nanso Mose guan+ fii Farao hɔ sɛ ɔrekɔ Midian+ asase so; na ɔkɔtenaa abura bi ho.
16 Ná Midian sɔfo+ wɔ mmabea baason, na sɛnea wɔtaa yɛ no, wɔbɛsaw nsu de hyɛɛ suka no mã na wɔn papa nguan no anom.+
17 Na nguanhwɛfo bi bae bɛpam wɔn. Ɛnna Mose sɔre boaa mmea no, na ɔmaa wɔn mmoa no nsu.+
18 Bere a wɔkɔɔ fie no, wɔn papa Reuel+ teɛɛm sɛ: “Ɛnnɛ de, ɛyɛɛ dɛn na moaba fie ntɛm saa?”
19 Ɛnna wobuae sɛ: “Egyptni bi+ na ogyee yɛn fii nguanhwɛfo no nsam. Afei ɔsan saw nsu maa nguan no nomee.”
20 Na obisaa ne mmabea no sɛ: “Ɔwɔ he? Adɛn na moagyaw no hɔ? Monkɔfrɛ no mma ommedidi.”+
21 Na Mose penee so sɛ ɔbɛtena ɔbarima no nkyɛn, na ɔde ne babea Sipora+ maa Mose.
22 Akyiri yi, ɔwoo ɔbabarima na Mose too no din Gersom,+ efisɛ ɔkae sɛ: “Meyɛ ɔhɔho a mabɛtena ananafo asase so.”+
23 Awiei koraa no Egypt hene no wui,+ nanso Israel mma no kɔɔ so sii apini, nkoasom no nti;+ na wosu+ hwehwɛɛ ɔboafo, na wɔn nkoasom mu sufrɛ koduu nokware Nyankopɔn asom.
24 Na Onyankopɔn tee+ wɔn apinisi+ na ɔkaee apam a ɔne Abraham ne Isak ne Yakob yɛe no.+
25 Enti Onyankopɔn hwɛɛ Israelfo no, na nea ɛtoo wɔn nyinaa na Onyankopɔn ani tua.
Ase Hɔ Nsɛm
^ Anaasɛ, “adaka,” sɛnea Hebri asɛmfua no kyerɛ no.
