Exodus 24:1-18
24 Afei ɔka kyerɛɛ Mose sɛ: “Wo ne Aaron ne Nadab ne Abihu+ ne Israel mpanyimfo aduɔson+ mmra Yehowa anim, na munnyina akyirikyiri mmɔ mo mu ase nsom.
2 Na Mose nkutoo mmra Yehowa anim; wɔn a aka no mmma bi, na ɔman no mmforo nnni n’akyi.”+
3 Afei Mose bɛkaa Yehowa nsɛm no nyinaa ne atemmusɛm no nyinaa kyerɛɛ Israelfo+ no, na wɔn nyinaa de nokoro kae sɛ: “Nea Yehowa aka nyinaa yɛbɛyɛ.”+
4 Enti Mose kyerɛw Yehowa nsɛm no nyinaa.+ Ade kyee anɔpatutuutu no, ɔsɔre sii afɔremuka ne adum dumien a egyina hɔ ma Israel mmusua dumien+ no wɔ bepɔw no ase.
5 Ɛno akyi no, ɔsomaa Israel mmerante ma wɔkɔbɔɔ ɔhyew afɔre na wɔde anantwinini bɔɔ asomdwoe afɔre+ maa Yehowa.
6 Mose kyɛɛ mogya no mu abien de fã guu nyaawa+ mu, na ɔde fã petepetee afɔremuka no so.+
7 Afei Mose faa apam+ nhoma no na ɔkenkan kyerɛɛ nkurɔfo no.+ Na wɔkae sɛ: “Nea Yehowa aka nyinaa yebetie na yɛadi so.”+
8 Enti Mose de mogya petepetee nkurɔfo no so+ kae sɛ: “Nsɛm yi nyinaa ho apam+ a Yehowa ne mo yɛe no ho mogya ni.”
9 Afei Mose ne Aaron ne Nadab ne Abihu ne Israel mpanyimfo aduɔson no foro kɔe,
10 na wohuu Israel Nyankopɔn+ no. Ná biribi te sɛ hoabo wɔ ne nan ase, na na ɛho tew te sɛ ɔsoro ankasa.+
11 Wamfa ne nsa anka Israel mmarima atitiriw+ yi, na wonyaa nokware Nyankopɔn no ho anisoadehu.+ Na wodidi nomee.+
12 Afei Yehowa ka kyerɛɛ Mose sɛ: “Bra me nkyɛn wɔ bepɔw no so bɛtena hɔ, na mɛkyerɛw mmara ne ahyɛde wɔ abopon so ama wode akyerɛkyerɛ nkurɔfo+ no.”
13 Enti Mose ne ne somfo Yosua sɔree, na Mose kɔɔ nokware Nyankopɔn no bepɔw so.+
14 Na ɔka kyerɛɛ mpanyimfo no sɛ: “Montwɛn wɔ ha nkosi sɛ yɛbɛsan aba mo nkyɛn.+ Hwɛ, Aaron ne Hur+ wɔ ha. Enti obi wɔ asɛm bi a ɔmfa mmrɛ wɔn mma wonni.”+
15 Mose foro kɔɔ bepɔw no so bere a omununkum akata so nyinaa.+
16 Afei Yehowa anuonyam+ kɔɔ so hyɛɛ Bepɔw Sinai so+ mã, na omununkum no kataa so nnansia. Da a ɛto so ason no, ɔfrɛɛ Mose wɔ omununkum no mu.+
17 Israelfo no hwɛ Yehowa anuonyam no a, na ɛte sɛ ogyaframa+ kɛse bi wɔ bepɔw no so.
18 Afei Mose wuraa omununkum no mu kɔɔ bepɔw no so.+ Na odii bepɔw no so adaduanan, awia ne anadwo.+
