Exodus 29:1-46
29 “Afei nea ɛbɛyɛ na wɔatumi asom sɛ asɔfo wɔ m’anim no, yɛ eyi fa tew wɔn ho: Fa nantwinini kumaa biako ne adwennini+ abien a wɔte apɔw,+
2 na fa awisiam muhumuhu yɛ paanoo a mmɔkaw nnim, na fa ngo fra esiam no bi yɛ paanoo a ɛte sɛ kawa a mmɔkaw nnim. Afei yɛ paanoo ntraantraa a mmɔkaw nnim na fa ngo sra ho.+
3 Fa gu kɛntɛn+ mu na fa ka nantwinini ne adwennini abien no ho bra.
4 “Afei fa Aaron ne ne mma no bra ahyiae ntamadan no ano,+ na fa nsu guare wɔn.+
5 Fa atade+ tenten no ne nsasin no ne nguguso no ne nkatabo no hyɛ Aaron, na fa abɔso a ɛwɔ nkatabo no ho no bɔ ne mu.+
6 Afei fa abotiten no bɔ ne ti na fa ahosohyira sɛnkyerɛnne kronkron no bɔ abotiten no anim.+
7 Wuwie a, hwie ɔsrango+ gu ne mpampam fa sra no+ sɛ ɔsɔfo.
8 “Fa ne mma no nso bra, na fa ntade no hyehyɛ wɔn.+
9 Fa abomu no bobɔ wɔn mu, Aaron ne ne mma no nyinaa, na fa abotiri no nso bobɔ wɔn. Na ɛnyɛ ahyɛde sɛ asɔfodi no bɛtena wɔn fie daa.+ Enti ma Aaron ne ne mma tumi.*+
10 “Afei fa nantwi no bra ahyiae ntamadan no anim na Aaron ne ne mma no mfa wɔn nsa ngu nantwi no mpampam.+
11 Na kum nantwi no wɔ Yehowa anim wɔ ahyiae ntamadan no ano.+
12 Fa wo nsateaa bɔ nantwi no mogya+ mu fa sosɔ mmɛn a ɛwɔ afɔremuka no so+ no so, na hwie mogya a aka no nyinaa gu afɔremuka no ase.+
13 Yi srade+ a ɛsensɛn nsono+ ne berɛbo+ no ho no nyinaa ne asaabo abien no ne ɛho srade na hyew wɔ afɔremuka no so.+
14 Na nantwi no nam ne ne nhoma ne ne bin de, fa ogya hyew wɔ nsraban no akyi.+ Ɛyɛ bɔne ho afɔre.
15 “Afei fa odwennini+ biako na Aaron ne ne mma mfa wɔn nsa ngu odwennini no mpampam.+
16 Kum odwennini no na fa ne mogya petepete afɔremuka no ho hyia.+
17 Twitwa aboa no mu asinasin na hohoro ne nsono+ ne ne nnyawa ho, na fa sin biara to ne fã ho kosi ne ti.
18 Hyew odwennini mũ no nyinaa wɔ afɔremuka no so. Ɛyɛ Yehowa ɔhyew afɔre+ huamhuam.+ Ɛyɛ afɔre a wɔde ogya hyew ma Yehowa.
19 “Fa odwennini a waka no nso bra na Aaron ne ne mma mfa wɔn nsa ngu ne mpampam.+
20 Afei kum odwennini no na fa ne mogya no bi yɛ Aaron asõ nifa ne ne mma no asõ nifa ne wɔn nsa nifa kokurobeti ne wɔn nan nifa kokurobeti ho.+ Na fa mogya no petepete afɔremuka no ho hyia.
21 Afei fa mogya a ɛwɔ afɔremuka no so ne ɔsrango+ no bi petepete Aaron ho ne ne ntade mu, ne ne mma ho ne wɔn ntade mu na ama ɔne ne ntade ne ne mma ne wɔn ntade ayɛ kronkron.+
22 “Yi odwennini no srade ne ne dua tufuu+ no ne srade a ɛsɛn ne nsono ne ne berɛbo ho, ne n’asaabo abien ne srade a ɛwɔ ho, ne ne nan nifa,+ efisɛ ɛyɛ asɔfohyɛ+ guan.
23 Afei yi paanoo nkuruwankuruwa ne nea ngo wom a ɛte sɛ kawa ne nea wayɛ no ntraantraa a mmɔkaw nnim no fi kɛntɛn a esi Yehowa anim+ no mu.
24 Na fa ne nyinaa hyɛ Aaron ne ne mma nsam,+ na him no sɛ ohim afɔre wɔ Yehowa anim.+
25 Afei gye fi wɔn nsam na hyew wɔ afɔremuka no so sɛ ɔhyew afɔre huamhuam wɔ Yehowa anim.+ Ɛyɛ afɔre a wɔde ogya hyew ma Yehowa.+
26 “Na fa Aaron asɔfohyɛ guan+ no koko na him sɛ ohim afɔre wɔ Yehowa anim. Ɛno na ɛbɛyɛ wo kyɛfa.
27 Afei fa aboa no koko+ a wohim de bɔɔ afɔre no ne Aaron ne ne mma asɔfohyɛ guan a wɔde bɔɔ afɔre kronkron+ no nan na tew ho.
28 Eyi bɛyɛ Aaron ne ne mma dea. Ɛyɛ ahyɛde a Israelfo bedi so daa, efisɛ ɛyɛ afɔrebɔde kronkron.+ Sɛ Israelfo bɔ asomdwoe afɔre+ a, wɔde eyi bɛma wɔn, efisɛ ɛyɛ afɔrebɔde kronkron ma Yehowa.
29 “Na wɔde Aaron ntade kronkron+ no bɛma ne mma+ a wobedi n’akyi no na sɛ wɔresra wɔn+ a, wɔahyɛ na wɔde tumi ahyɛ wɔn nsa.+
30 Ne mma no mu nea obedi n’ade sɛ ɔsɔfo a ɔbɛba ahyiae ntamadan no mu abɛsom wɔ kronkronbea hɔ no bɛhyɛ no nnanson.+
31 “Afei fa asɔfohyɛ guan no na noa nam no wɔ beae a ɛhɔ yɛ kronkron.+
32 Na Aaron ne ne mma nwe+ odwennini no nam na wonni paanoo a ɛwɔ kɛntɛn mu no wɔ ahyiae ntamadan no ano.
33 Wonni nea wɔde ayɛ mpatade a wɔnam so de tumi bɛhyɛ wɔn nsa no na ama wɔn ho atew.+ Ɔhɔho nnni bi, efisɛ ɛyɛ kronkron.+
34 Na sɛ nam anaa paanoo a wɔde bɔɔ afɔre no bi ka ma ade kye so a, fa ogya hyew.+ Obiara nnni, efisɛ ɛyɛ kronkron.
35 “Yɛ Aaron ne ne mma sɛnea mahyɛ wo yi nyinaa.+ Ebegye nnanson na wode tumi ahyɛ wɔn nsa.+
36 Na fa nantwinini bɔ bɔne ho afɔre daa fa yɛ mpata,+ na bɔ mpata afɔre fa dwira afɔremuka no ho.* Afei sra+ afɔremuka no na ɛnyɛ kronkron.
37 Fa nnanson pata afɔremuka no so na tew+ ho ma afɔremuka no nyɛ akronkronne mu ade kronkron.+ Obiara a ɔde ne nsa bɛka afɔremuka no nyɛ kronkron.+
38 “Nea wode bɛbɔ afɔre wɔ afɔremuka no so ni: da biara+ adwennini nkumaa abien a wɔn mu biara adi afe.
39 Fa odwennini biako bɔ afɔre anɔpa+ na fa biako bɔ afɔre anwummere.+
40 Fa ngodua ngo kurennyenn hin nkyem anan mu biako fɔtɔw esiam muhumuhu efa+ nkyem du mu biako ne nsã+ hin nkyem anan mu biako ka odwennini a odi kan no ho bɔ afɔre.
41 Na fa odwennini a ɔto so abien no bɔ afɔre anwummere. Fa ka aduan afɔre+ ne afɔrebɔ nsa no ho sɛnea anɔpa de no te no. Fa bɔ ogya afɔre huamhuam ma Yehowa.
42 Mo awo ntoatoaso nyinaa mu no, mommɔ ɔhyew afɔre yi Yehowa anim daa+ wɔ ahyiae ntamadan no ano, na ɛhɔ na meyi me ho adi ne mo akasa.+
43 “Meyi me ho adi akyerɛ Israelfo no wɔ hɔ na m’anuonyam ayɛ hɔ kronkron.+
44 Mɛyɛ ahyiae ntamadan no ne afɔremuka no kronkron, na mɛyɛ Aaron ne ne mma nso kronkron+ ma wɔasom sɛ asɔfo wɔ m’anim.
45 Na mɛtena Israelfo mu na mayɛ wɔn Nyankopɔn.+
46 Na wobehu sɛ mene Yehowa wɔn Nyankopɔn. Me na miyii wɔn fii Egypt asase so sɛ me ne wɔn bɛtena.+ Mene Yehowa wɔn Nyankopɔn.+
