Exodus 4:1-31
4 Na Mose buae sɛ: “Na sɛ wɔannye me anni na wɔantie me,+ na wɔka sɛ ‘Yehowa nyii ne ho adi nkyerɛɛ wo’ nso ɛ?”
2 Ɛnna Yehowa bisaa no sɛ: “Dɛn na ekura wo yi?” Na obuae sɛ “Ɛyɛ poma.”+
3 Ɛnna ɔkae sɛ: “Tow kyene fam.” Enti ɔtow kyenee fam, na ɛdan ɔwɔ;+ ɛnna Mose guan fii hɔ.
4 Na Yehowa ka kyerɛɛ Mose sɛ: “Teɛ wo nsa so ne dua mu.” Na ɔteɛɛ ne nsa soo ne dua mu, na ɛdan poma wɔ ne nsam.
5 Na ɔkae sɛ: “Ɛno bɛma wɔagye adi sɛ Yehowa wɔn agyanom Nyankopɔn,+ Abraham Nyankopɔn,+ Isak Nyankopɔn+ ne Yakob Nyankopɔn+ no ayi ne ho adi akyerɛ wo.”+
6 Afei Yehowa ka kyerɛɛ no bio sɛ: “Mesrɛ wo, fa wo nsa hyɛ wo kokom.” Enti ɔde ne nsa hyɛɛ ne kokom. Oyii no, na kwata ayɛ ne nsa ho fitaa te sɛ sukyerɛmma!+
7 Afei ɔkae sɛ: “Fa wo nsa san hyɛ wo kokom.” Na ɔde ne nsa san hyɛɛ ne kokom. Na bere a oyi fii ne kokom no, na kwata no kɔ ma ne nsa ho ayɛ sɛ ne honam baabiara!+
8 Na ɔkae sɛ: “Sɛ wɔantie wo na wɔannye sɛnkyerɛnne a edi kan no anni a, sɛnkyerɛnne a ɛto so abien no de, wobegye adi.+
9 Na sɛ wɔannye nsɛnkyerɛnne abien yi anni na wɔantie wo+ a, kɔsaw Nil asubɔnten mu nsu na hwie gu asase kesee so, na nsu a wosaw fii Nil asubɔnten no mu no bɛdan mogya wɔ asase kesee so.”+
10 Afei Mose ka kyerɛɛ Yehowa sɛ: “Yehowa, mesrɛ wo, ebesi nnɛ ne bere a wo ne w’akoa rekasa yi mpo, m’ano ntew, efisɛ me kasa yɛ nyaa na me tɛkrɛma yɛ duru.”+
11 Ɛnna Yehowa bisaa no sɛ: “Hena na ɔyɛɛ ano maa onipa, na hena na ɔyɛ mum anaa ɔsotifo anaa nea ohu ade anaa onifuraefo? Ɛnyɛ me Yehowa?+
12 Enti kɔ, na worekasa a, mɛka wo ho na makyerɛ wo nea ka.”+
13 Nanso ɔkae sɛ: “Yehowa, sɛ obi foforo wɔ hɔ a wobɛsoma no a, mesrɛ wo soma no.”
14 Ɛnna Yehowa bo fuw Mose, na ɔkae sɛ: “Wo nua Lewini Aaron+ nni hɔ? Minim sɛ onim kasa. Na mpo ɔnam kwan so rebehyia wo. Sɛ ohu wo a, n’ani begye ne komam.+
15 Wo ne no nkasa na fa asɛm no hyɛ n’ano,+ na sɛ worekasa a, mɛka wo ho, na ɔno nso rekasa a, mɛka ne ho,+ na mɛkyerɛ mo nea monyɛ.+
16 Ɔbɛyɛ wo kyeame ama ɔman no; ɔno na ɔbɛyɛ ano ama wo+ na wo nso woayɛ sɛ Onyankopɔn ama no.+
17 Na fa poma yi kura na wode ayɛ nsɛnkyerɛnne no.”+
18 Afei Mose san kɔɔ n’ase Yetro hɔ kɔka kyerɛɛ no sɛ:+ “Mesrɛ wo, mepɛ sɛ mesan kɔ me nuanom a wɔwɔ Egypt no nkyɛn kɔhwɛ sɛ wɔda so te ase+ anaa.” Ɛnna Yetro ka kyerɛɛ Mose sɛ: “Fa asomdwoe kɔ.”+
19 Na Yehowa ne Mose kasae wɔ Midian sɛ: “San kɔ Egypt, efisɛ wɔn a na wɔrehwehwɛ wo kra no nyinaa awuwu.”+
20 Ɛnna Mose faa ne yere ne ne mma de wɔn tenaa afurum so, na osiim de n’ani kyerɛɛ Egypt. Na ɔfaa nokware Nyankopɔn no poma no kurae.+
21 Na Yehowa ka kyerɛɛ Mose sɛ: “Sɛ wunya kodu Egypt a, hwɛ sɛ wobɛyɛ anwonwade a mede ahyɛ wo nsa no nyinaa wɔ Farao anim.+ Na mɛma wapirim ne koma;+ na ɔremma ɔman no kwan nkɔ.+
22 Na ka kyerɛ Farao sɛ, ‘Nea Yehowa aka ni: “Israel yɛ me ba, me ba panyin.+
23 Mise wo sɛ: Ma me ba no kwan na ɔnkɔsom me. Na sɛ woamma no kwan ankɔ a, mekum wo ba panyin.”’”+
24 Na ɛbae sɛ woduu ɔkwan no so ahomegyebea+ bi no, Yehowa behyiaa no+ na ɔpɛe sɛ okum no.+
25 Ɛnna Sipora+ faa ɔbo bi a ano yɛ nnam de twaa ne ba no twetia+ na ɔma ɛkaa ne nan, na ɔkae sɛ: “Woyɛ mogya ayeforokunu ma me.”
26 Ɛnna ogyaa no. Na twetiatwa no nti Sipora kae sɛ: “Woyɛ mogya ayeforokunu.”
27 Afei Yehowa ka kyerɛɛ Aaron sɛ: “Kohyia Mose wɔ sare so.”+ Enti okohyiaa no wɔ nokware Nyankopɔn no bepɔw+ so na ofew n’ano.
28 Na Mose kaa nsɛm a Yehowa de asoma no+ ne nsɛnkyerɛnne a wahyɛ sɛ ɔnyɛ+ nyinaa kyerɛɛ Aaron.
29 Enti Mose ne Aaron kɔboaboaa Israel mpanyimfo nyinaa ano.+
30 Afei Aaron kaa nsɛm a Yehowa ka kyerɛɛ Mose no nyinaa,+ na ɔyɛɛ nsɛnkyerɛnne+ no wɔ nkurɔfo no anim.
31 Ɛbaa saa no nkurɔfo no gye dii.+ Na bere a wɔtee sɛ Yehowa adan n’ani+ aba Israelfo so na wahu wɔn amanehunu+ no, wɔbɔɔ wɔn mu ase de wɔn anim butuw fam.+
