Exodus 6:1-30
6 Yehowa ka kyerɛɛ Mose sɛ: “Afei wubehu nea mɛyɛ Farao,+ efisɛ nsa a ɛyɛ den bɛhyɛ no ma wama wɔn kwan akɔ, na nsa a ɛyɛ den bɛma wapam wɔn mpo afi n’asase so.”+
2 Na Onyankopɔn toaa so ka kyerɛɛ Mose sɛ: “Mene Yehowa.+
3 Miyii me ho adi kyerɛɛ Abraham,+ Isak,+ ne Yakob+ sɛ ade nyinaa so Tumfoɔ Nyankopɔn,+ nanso me din Yehowa+ no de, mamma wɔamfa anhu me.+
4 Na me ne wɔn yɛɛ apam sɛ mede Kanaan asase a wɔkɔsoɛɛ so sɛ ahɔho no bɛma wɔn.+
5 Afei mate Israelfo no apinisi,+ nkoasom a Egyptfo de wɔn aba mu no, na m’apam+ no, mekae.
6 “Enti ka kyerɛ Israelfo no sɛ, ‘Mene Yehowa, na meyi mo afi Egyptfo nnesoa ase na magye mo afi wɔn nkoasom mu;+ mede basa a emu ateɛ ne atemmu kɛse na ebegye mo.+
7 Na mede mo bɛyɛ me man,+ na mayɛ mo Nyankopɔn;+ na mubehu sɛ mene Yehowa mo Nyankopɔn a oyii mo fii Egypt nkoasom mu+ no.
8 Mede mo bɛba asase a memaa me nsa so kaa ntam+ sɛ mede bɛma Abraham, Isak, ne Yakob no so; na mede bɛma mo sɛ agyapade.+ Mene Yehowa.’”+
9 Afei Mose de nsɛm yi nyinaa too Israelfo no anim, nanso abasamtu ne nkoasom dennen no nti, wɔantie Mose.+
10 Ɛnna Yehowa ka kyerɛɛ Mose sɛ:
11 “Kɔka kyerɛ Egypt hene Farao+ sɛ ɔmma Israelfo no kwan mma womfi n’asase so nkɔ.”+
12 Nanso Mose ka kyerɛɛ Yehowa sɛ: “Hwɛ, Israelfo no mpo antie me,+ na ɛbɛyɛ dɛn na Farao atie me+ a wontwaa m’ano twetia+ yi?”
13 Na Yehowa ka kyerɛɛ Mose ne Aaron sɛ wɔmfa n’ahyɛde nkɔto Israelfo no ne Egypt hene Farao anim, na wonyi Israelfo no mfi Egypt asase so.+
14 Eyinom ne atitiriw a wɔwɔ wɔn agyanom fie: Israel ba panyin+ Ruben mma ne Hanok, Palu, Hesron, ne Karmi.+ Eyinom ne Ruben asefo.+
15 Na Simeon mma ne Yemuel, Yamin, Ohad, Yakin, Sohar, ne Saul a ɔne Kanaanni bea woo no+ no. Eyinom ne Simeon asefo.+
16 Lewi+ mma din sɛnea wɔn mmusua te+ ni: Gerson, Kohat, ne Merari.+ Na mfe a Lewi dii nyinaa yɛ ɔha aduasa ason.
17 Gerson mma ne Libni ne Simei,+ sɛnea wɔn mmusua+ te.
18 Kohat mma ne Amram, Yisar, Hebron, ne Usiel.+ Na mfe a Kohat dii nyinaa yɛ ɔha aduasa abiɛsa.
19 Na Merari mma ne Mahli ne Musi.+
Eyinom ne Lewi asefo no mmusua.+
20 Afei Amram waree ne papa nuabea Yokebed.+ Akyiri yi ɔwoo Aaron ne Mose+ maa no. Mfe a Amram dii nyinaa yɛ ɔha aduasa ason.
21 Yisar mma ne Kora+ ne Nefeg ne Sikri.
22 Na Usiel mma ne Misael ne Elisafan ne Sitri.+
23 Afei Aaron waree Aminadab babea Eliseba a ɔyɛ Naason+ nuabea. Akyiri yi ɔwoo Nadab, Abihu, Eleasar, ne Itamar+ maa no.
24 Na Kora mma ne Asir ne Elkana ne Abiasaf.+ Eyinom ne Kora asefo.+
25 Afei Aaron ba Eleasar+ waree Putiel babea. Akyiri yi ɔwoo Finehas+ maa no.
Eyinom ne Lewifo agyanom atitiriw, sɛnea wɔn mmusua te.+
26 Aaron ne Mose yi na Yehowa ka kyerɛɛ wɔn sɛ:+ “Monhyehyɛ Israelfo sɛ asraafokuw na munyi wɔn mfi Egypt asase so” no.+
27 Wɔn na wɔne Egypt hene Farao kɔkasae sɛ ɔmma wɔn kwan mma wonyi Israelfo no mfi Egypt no.+ Mose ne Aaron no ni.
28 Afei da a Yehowa ne Mose kasae wɔ Egypt asase so+ no,
29 Yehowa ka kyerɛɛ Mose sɛ: “Mene Yehowa.+ Nea mɛka akyerɛ wo biara, ka kyerɛ Egypt hene Farao.”
30 Ɛnna Mose ka kyerɛɛ Yehowa sɛ: “Hwɛ, wontwaa m’ano twetia, ɛbɛyɛ dɛn na Farao atie me?”+
