Filemon 1:1-25
1 Me, Paulo a Kristo Yesu nti meyɛ ɔdeduani,+ a yɛn nua Timoteo+ ka me ho, merekyerɛw akɔma Filemon, yɛn dɔfo ne yɛn yɔnko dwumayɛni,+
2 ne yɛn nuabea Apia ne afei Arkipo,+ yɛn yɔnko sraani,+ ne asafo a ɛwɔ wo fie+ no:
3 Adom ne asomdwoe a efi yɛn Agya Onyankopɔn ne Awurade Yesu Kristo hɔ nka mo.+
4 Bere biara a mɛkae wo wɔ me mpaebɔ mu+ no, meda me Nyankopɔn ase
5 sɛ daa mete ɔdɔ ne gyidi a wowɔ wɔ Awurade Yesu ne akronkronfo+ nyinaa fam no ho asɛm,
6 na ama gyidi+ a wo ne afoforo wɔ no ada adi, efisɛ wugye adepa biara a yɛwɔ tom sɛ ɛfa Kristo ho.
7 Na wo dɔ nti, minyaa anigye ne awerɛkyekye+ bebree, efisɛ wudwudwoo akronkronfo koma,+ onua.
8 Enti ɛwom sɛ anka metumi aka no pen wɔ Kristo mu de ahyɛ wo+ ma woayɛ nea ɛsɛ de,
9 nanso mede ɔdɔ+ mmom na ɛresrɛ wo, esiane sɛnea mete nti, akora Paulo a seesei nso Kristo Yesu nti meyɛ ɔdeduani+ no;
10 meresrɛ wo ama m’abofra+ Onesimo+ a mebɛyɛɛ ne papa+ wɔ m’afiase mpokyerɛ mu,
11 nea bere bi a atwam no na ne so nni wo mfaso nanso seesei de ne ho hia wo ne me nyinaa no.+
12 Ɔno na merema wasan aba wo nkyɛn, yiw, nea me koma da no so no.+
13 Anka mepɛ sɛ mema ɔtena me nkyɛn, na wasi w’ananmu+ akɔ so asom me wɔ asɛmpa no ho wɔ afiase mpokyerɛ+ mu.
14 Nanso mempɛ sɛ mifi w’akyi yɛ biribiara, na anyɛ sɛ wo papayɛ no fi ɔhyɛ mu, na mmom w’ankasa wo pɛ mu.+
15 Ebia eyi nti na ɔtew ne ho kakra, na ama woanya no daa,
16 ɛnyɛ sɛ akoa bio,+ na mmom nea ɔsen akoa,+ sɛ ɔmmɛyɛ onua dɔfo,+ titiriw wɔ me fam, nanso ɔbɛyɛ nea ɛboro saa ama wo wɔ honam fam ne afei Awurade mu.
17 Enti sɛ wubu me sɛ ɔyɔnko+ de a, gye+ no fɛw so sɛnea anka wubegye me no.
18 Bio nso, sɛ wayɛ wo bɔne bi anaa ɔde wo ka bi a, me na metua wo ka.
19 Me Paulo ankasa na mede me nsa rekyerɛw:+ metua ahyɛ mu—wo koraa nso wode me ka.
20 Yiw, onua, ma minnya wo ho mfaso Awurade mu: dwudwo me koma+ wɔ Kristo mu.
21 Merekyerɛw wo yi, mewɔ ahotoso sɛ wubetie, na minim nso sɛ wobɛyɛ aboro nea meka no mpo.+
22 Na ɛno akyi nso siesie tenabea+ ma me, efisɛ m’ani da so sɛ ɛnam mo mpaebɔ+ so no, wobeyi me+ ama mo.
23 Epafra,+ me yɔnko deduani wɔ Kristo Yesu mu kyia wo,
24 ɔne Marko, Aristarko,+ Dema,+ ne Luka, me mfɛfo adwumayɛfo.
25 Awurade Yesu Kristo adom nka honhom a moda no adi no.+
