Genesis 26:1-35
26 Afei ɔkɔm baa asase no so. Ɛsono ɔkɔm yi ne nea edii kan baa Abraham bere so no,+ na Isak kɔɔ Filistifo hene Abimelek nkyɛn wɔ Gerar.+
2 Ɛnna Yehowa yii ne ho adi kyerɛɛ no sɛ:+ “Nkɔ Egypt. Tena asase a mɛkyerɛ wo no so.+
3 Tena asase yi so sɛ ɔhɔho,+ na mɛka wo ho na mehyira wo, na mede nsase yi nyinaa bɛma wo ne w’asefo,+ na mɛma ntam a mekaa wo papa Abraham no aba mu,+
4 ‘Na mɛma w’asefo adɔɔso sɛ ɔsoro nsoromma na mede nsase yi nyinaa bɛma wɔn;+ na asase so aman nyinaa nam w’asefo so benya nhyira,’+
5 efisɛ Abraham tiee m’asɛm yɛɛ nea mehwehwɛ nyinaa, na odii m’ahyɛde ne m’atemmusɛm ne me mmara so.”+
6 Enti Isak kɔɔ so tenaa Gerar.+
7 Afei na mmarima a wɔwɔ hɔ no taa bisa ne yere ase, na ɛyɛ a ɔka sɛ: “Ɔyɛ me nuabea.”+ Na osuro sɛ ɔbɛka sɛ “Ɔyɛ me yere,” efisɛ, sɛnea ɔkae no, “anhwɛ a Rebeka nti mmarima a wɔwɔ ha yi bekum me,” efisɛ na ne ho yɛ fɛ+ paa.
8 Ɔtenaa hɔ kyɛe kakra, na da bi Filistifo hene Abimelek hwɛɛ ne mfɛnsere mu hui sɛ Isak ne ne yere Rebeka redi agoru.+
9 Ntɛm ara na Abimelek frɛɛ Isak kae sɛ: “Ɔbea yi nyɛ obiara sɛ wo yere! Dɛn nti na wokae sɛ, ‘Ɔyɛ me nuabea’?” Ɛnna Isak ka kyerɛɛ no sɛ: “Mekaa saa efisɛ na misuro sɛ anhwɛ a ne nti wobekum me.”+
10 Nanso Abimelek toaa so sɛ: “Dɛn na woayɛ yɛn yi?+ Anka worebɛyɛ ama nnipa yi mu bi ne wo yere ada, na wode asodi abɛto yɛn so!”+
11 Ɛnna Abimelek hyɛɛ mmara maa nkurɔfo no nyinaa sɛ: “Obiara a ɔde ne nsa bɛka ɔbarima yi ne ne yere no, wobekum no!”
12 Akyiri yi Isak yɛɛ afuw wɔ asase no so,+ na saa afe no onyaa nnɔbae mmɔho ɔha,+ efisɛ na Yehowa ahyira no.+
13 Enti ɔbarima no bɛyɛɛ kɛse na ɔkɔɔ so ara nyaa ne ho kosii sɛ ɔbɛyɛɛ ɔdefo kɛse.+
14 Obenyaa nguan ne anantwi ne nkoa pii,+ na ɛmaa Filistifo no ani beree no.+
15 Na nsubura a ne papa Abraham nkoa tui+ bere a ɔte ase no, Filistifo no de dɔte siw no.+
16 Afei Abimelek ka kyerɛɛ Isak sɛ: “Tu fi ha kɔ efisɛ woabenya tumi asen yɛn koraa.”+
17 Enti Isak tu fii hɔ kɔɔ Gerar+ bon mu kɔtenaa hɔ.
18 Afei Isak san tuu nsubura a ne papa Abraham nkoa tui bere a ɔte ase no mu bio. Nsubura yi na Filistifo no siw no wɔ Abraham wu akyi no.+ Na edin a ne papa de totoo nsubura no ara na ɔsan de totoe.+
19 Isak nkoa no tuu abura wɔ bon no mu na wonyaa nsu pa wɔ hɔ.
20 Afei akameakame baa Gerar nguanhwɛfo ne Isak nguanhwɛfo ntam,+ na wɔkae sɛ: “Nsu no yɛ yɛn dea!” Enti ɔtoo abura no din Esek, efisɛ wɔne no peree ho.
21 Afei wɔsan tuu abura foforo, na ɛno nso wɔne no peree ho. Enti ɔfrɛɛ no Sitna.
22 Akyiri yi wofii hɔ kotuu abura foforo,+ na ɛno de wɔne no ampere ho. Enti ɔfrɛɛ no Rehobot kae sɛ: “Afei de, Yehowa ama yɛanya yɛn ho atwaye+ na wama yɛadi yiye asase yi so.”+
23 Wofii hɔ kɔɔ Beer-Seba.+
24 Afei Yehowa yii ne ho adi kyerɛɛ no anadwo no, na ɔkae sɛ: “Mene wo papa Abraham Nyankopɔn.+ Nsuro,+ efisɛ meka wo ho, na m’akoa Abraham nti mehyira wo mama w’ase atrɛw.”+
25 Enti osii afɔremuka na ɔbɔɔ Yehowa din+ wɔ hɔ; afei Isak sii ne ntamadan+ wɔ hɔ na ne nkoa tuu abura wɔ hɔ.
26 Akyiri yi Abimelek ne n’adamfo fotufo Ahusat ne ne sahene Pikol+ fi Gerar baa ne nkyɛn.
27 Ɛnna Isak bisaa wɔn sɛ: “Moaba me nkyɛn rebɛyɛ dɛn? Ɛnyɛ mo ara na ɔtan nti mopam me fii mo mpɔtam hɔ no?”+
28 Afei wɔkae sɛ: “Yɛahu ampa ara sɛ Yehowa di w’akyi.+ Enti yedwen ho sɛ, ‘Yɛne wo bɛkeka yɛn ho ntam,+ na yɛne wo ayɛ apam+
29 sɛ worenyɛ yɛn bɔne biara sɛnea yɛmfaa yɛn nsa nkaa wo na yɛne wo adi no yiye na yɛagya wo kwan asomdwoe+ mu no. Yɛahu sɛ Yehowa ahyira wo ampa.’”+
30 Afei ɔtow wɔn pon, na wodidi nomee.+
31 Ade kyee no wɔsɔree ntɛm, na wɔkekaa wɔn ho ntam.+ Ɛno akyi no, Isak gyaa wɔn kwan na wɔde asomdwoe+ fii ne nkyɛn kɔe.
32 Saa da no, Isak nkoa no bɛkaa abura a wotui+ no ho asɛm kyerɛɛ no sɛ: “Yɛato nsu!”
33 Enti ɔfrɛɛ no Siba. Ɛno nti na kurow no din de Beer-Seba+ besi nnɛ no.
34 Afei Esau dii mfe aduanan no, ɔwaree Hitini Beeri ba Yudit ne Hitini+ Elon ba Basemat.
35 Na wɔmaa Isak ne Rebeka dii awerɛhow.+
