Genesis 28:1-22
28 Enti Isak frɛɛ Yakob na ohyiraa no ka kyerɛɛ no sɛ: “Nware Kanaanfo mmea no mu biara.+
2 Sɔre kɔ Padan-Aram, wo maame papa Betuel fie, na ware wo wɔfa Laban mmabea no mu biako.+
3 Ade nyinaa so Tumfoɔ Nyankopɔn behyira wo ama w’ase atrɛw ayɛ bebree, na woabɛyɛ aman asafodɔm.+
4 Na ɔde Abraham nhyira bɛma wo+ ne w’asefo a wɔka wo ho,+ na wobɛfa asase a wobɛsoɛ+ so a Onyankopɔn de ama Abraham no.”+
5 Enti Isak gyaa Yakob kwan na osiim kɔɔ Siriani Betuel+ ba Laban nkyɛn wɔ Padan-Aram. Ná ɔyɛ Yakob ne Esau maame+ Rebeka nuabarima.+
6 Esau hui sɛ Isak ahyira Yakob agya no kwan kɔ Padan-Aram sɛ ɔnkɔware wɔ hɔ, na waka akyerɛ no nso sɛ: “Nware Kanaanfo mmea+ no mu biara.”
7 Afei ohui sɛ Yakob atie ne papa ne ne maame asi kwan so rekɔ Padan-Aram.+
8 Na Esau hui sɛ ne papa Isak ani nnye Kanaanfo mmea no ho.+
9 Enti Esau kɔɔ Abraham ba Ismael nkyɛn kɔwaree ne babea Mahalat a ɔyɛ Nebaiot nuabea kaa ne yerenom ho.+
10 Yakob fii Beer-Seba de n’ani kyerɛɛ Haran.+
11 Afei okoduu beae bi na ɔyɛɛ n’adwene sɛ ɔbɛda hɔ efisɛ na onwini adwo. Enti ɔfaa ɔbo bi de yɛɛ sumii na ɔdaa hɔ.+
12 Na ɔsoo dae,+ na ohui sɛ antweri bi si asase so na n’atifi kɔpem soro; na ohui sɛ Onyankopɔn abɔfo redi aforosian wɔ so.+
13 Na hwɛ! Yehowa gyina atifi, na ɔkae sɛ:+
“Mene Yehowa, w’agya Abraham Nyankopɔn ne Isak Nyankopɔn.+ Mede asase a woda so yi bɛma wo ne w’asefo.+
14 W’asefo bɛyɛ sɛ asase so anhwea+ na w’ase bɛtrɛw akɔ baabiara, atɔe ne apuei,+ atifi ne anafo; na asase so mmusua nyinaa nam wo ne w’asefo so benya nhyira.+
15 Medi w’akyi na baabi a wobɛkɔ biara mɛhwɛ wo so, na mɛsan de wo aba asase yi so,+ na merennyaw wo gye sɛ mayɛ nea maka akyerɛ wo yi nyinaa.”+
16 Afei Yakob nyanee na ɔkae sɛ: “Ampa ara Yehowa wɔ ha na minnim yi.”
17 Ehu kaa no na ɔkae sɛ:+ “Ɛha yɛ hu papaapa!+ Ɛha nyɛ baabiara sɛ Onyankopɔn fie,+ na ɛha ne ɔsoro pon ano.”
18 Enti Yakob sɔree anɔpatutuutu faa ɔbo a ɔde yɛɛ sumii no de yɛɛ nkaedum, na ohwiee ngo guu so.+
19 Afei ɔtoo hɔ din Betel;+ nanso na kurow no din ankasa ne Lus.+
20 Na Yakob hyɛɛ bɔ+ sɛ: “Sɛ Onyankopɔn di m’akyi hwɛ me so m’akwantu yi mu, na ɔma me aduan di ma me atade hyɛ+
21 na mesan kɔ me papa fie asomdwoe mu a, ɛnde na Yehowa ada ne ho adi sɛ ɔyɛ me Nyankopɔn ampa.+
22 Na ɔbo a mede ayɛ nkaedum yi bɛyɛ Onyankopɔn fie,+ na biribiara a wobɛma me no nso mɛkyɛ mu du ama wo biako.”+
