Genesis 29:1-35
29 Afei Yakob toaa n’akwantu no so kɔɔ Apuei Famfo+ asase so.
2 Na ohui sɛ abura bi wɔ asase no so a nguankuw abiɛsa butubutuw ho, efisɛ saa abura no mu nsu na wɔsaw ma mmoa+ no nom; na na ɔbo kɛse bi da abura no ano.+
3 Sɛ wɔboaboa nguan no nyinaa ano wɔ hɔ a, woyi ɔbo no fi abura no ano, na wɔma nguan no nsu, afei wɔsan de ɔbo no to abura no ano.
4 Na Yakob bisaa wɔn sɛ: “Me nuanom, ɛhe na mufi?” na wobuae sɛ: “Yefi Haran.”+
5 Afei obisaa wɔn sɛ: “Munim Nahor+ banana Laban?”+ Na wɔkae sɛ: “Yenim no.”
6 Ɛnna obisaa wɔn sɛ: “Ne ho ye anaa?”+ Na wobuae sɛ: “Ne ho ye. Na ne babea Rahel+ mpo na ɔde nguan reba no!”+
7 Ɔtoaa so ka kyerɛɛ wɔn sɛ: “Sɛ́ ade nsae. Bere nsoe sɛ moboaboa mmoa no ano. Momma nguan no nsu na momma wonkodidi.”+
8 Ɛnna wobuae sɛ: “Yenni ho kwan sɛ yɛyɛ saa gye sɛ nguan no nyinaa ba ha na woyi ɔbo no fi abura no ano. Ɛno ansa na yebetumi ama nguan no nsu.”
9 Bere a ogu so ne wɔn rekasa no, Rahel+ de ne papa nguan bae, efisɛ na ɔyɛ oguanhwɛfo.+
10 Bere a Yakob huu ne wɔfa Laban ba Rahel ne Laban nguan no, ntɛm ara na Yakob kopiaa ɔbo no fii abura no ano, na ɔmaa ne wɔfa Laban nguan no nsu.+
11 Afei Yakob few+ Rahel ano na ɔmaa ne nne so sui.+
12 Yakob ka kyerɛɛ Rahel sɛ ne maame ne Rebeka ma enti ne busuani+ ne Rahel papa. Na Rahel de mmirika kɔka kyerɛɛ ne papa.+
13 Laban tee ne wɔfase Yakob ho asɛm ara pɛ na ɔde mmirika kohyiaa no.+ Afei ɔbam no few n’ano, na ɔde no baa ne fie.+ Na Yakob kaa nea asi nyinaa kyerɛɛ Laban.
14 Na Laban ka kyerɛɛ no sɛ: “Woyɛ me dompe ne me honam.”+ Enti ɔne no tenae ɔsram biako.
15 Afei Laban ka kyerɛɛ Yakob sɛ: “Woyɛ me nua+ nti wobɛsom me kwa anaa?+ Dɛn na wubegye?+ Ka kyerɛ me.”
16 Ná Laban wɔ mmabea baanu. Ɔpanyin no din de Lea+ na akumaa no de Rahel.
17 Nanso na Lea aniwa mma yɛ nketenkete, na Rahel+ de, na ne ho yɛ fɛ fi soro besi fam.+
18 Ná Yakob dɔ Rahel, enti ɔkae sɛ: “Mepɛ sɛ mesom wo mfe ason na wode wo babea kumaa Rahel ma me.”+
19 Ɛnna Laban kae sɛ: “Eye sɛ mede no bɛma wo sen sɛ mede no bɛma ɔbarima foforo.+ Tena me nkyɛn.”
20 Na Yakob somee mfe ason sɛ ɔde benya Rahel,+ nanso ɛyɛɛ n’ani so sɛ nna kakraa bi efisɛ na ɔdɔ no.+
21 Afei Yakob ka kyerɛɛ Laban sɛ: “Me bere adu, mesrɛ wo fa me yere ma me na menkɔ ne ho.”+
22 Ɛnna Laban frɛfrɛɛ nnipa a wɔwɔ hɔ nyinaa behyiae na ɔtow pon.+
23 Nanso ade sae no, ɔde ne babea Lea brɛɛ no na ama wakɔ ne ho.
24 Na Laban de n’afenaa Silpa+ maa ne babea Lea sɛ n’abaawa.
25 Ade kyee no ɔbɛhwɛ a, Lea ni! Enti obisaa Laban sɛ: “Dɛn na woayɛ me yi? Ɛnyɛ Rahel nti na mesom wo? Dɛn nti na woadaadaa me?”+
26 Ɛnna Laban buae sɛ: “Ɛha de, yɛnyɛ no saa. Yɛn de, yɛmfa akumaa no mma aware ansa na ɔpanyin no aware.
27 Wo ne ɔbea yi ntena nnawɔtwe nwie.+ Ɛno akyi no mede ɔbea biako no nso bɛma wo na woasom me mfe ason aka ho.”+
28 Enti Yakob penee so ne ɔbea no tenae maa nnawɔtwe no soe, na ɛno akyi no ɔde Rahel maa no aware.
29 Na Laban de n’afenaa Bilha+ maa Rahel sɛ n’abaawa.
30 Afei ɔkɔɔ Rahel nso ho, na na ɔdɔ Rahel sen Lea,+ na ofii ase som Laban mfe ason bio.+
31 Yehowa hui sɛ ɔnnɔ Lea no, obuee ne yam,+ na Rahel de, ɔbɛyɛɛ obonin.+
32 Afei Lea nyinsɛn woo ɔbabarima na ɔtoo ne din Ruben,+ na ɔkae sɛ: “Yehowa abɛhwɛ m’amanehunu,+ na afei me kunu bɛdɔ me.”
33 Na ɔsan nyinsɛn woo ɔbabarima, na ɔkae sɛ: “Yehowa ate+ sɛ wɔnnɔ me, enti na wama me oyi nso.” Na ɔtoo ne din Simeon.+
34 Na onyinsɛn bio woo ɔbabarima, na ɔkae sɛ: “Afei de, me kunu bɛka aba me ho, efisɛ mawo mmabarima baasa ama no.” Enti ɔtoo no din Lewi.+
35 Na ɔsan nyinsɛn woo ɔbabarima, na ɔkae sɛ: “Afei de, mɛkamfo Yehowa.” Enti ɔtoo ne din Yuda.+ Afei n’awo tew kɔe.
