Genesis 31:1-55
31 Akyiri yi Yakob tee sɛ Laban mma no rekeka sɛ: “Yakob afa yɛn papa nneɛma nyinaa; na yɛn papa agyapade na ɔde anya ne ho.”+
2 Afei Yakob hui sɛ Laban ntew n’anim mma no sɛ kan no.+
3 Na Yehowa ka kyerɛɛ Yakob sɛ: “San kɔ w’agyanom asase so ne w’abusuafo nkyɛn,+ na mɛkɔ so adi w’akyi.”+
4 Ɛnna Yakob frɛɛ Rahel ne Lea baa baabi a ne nguan didi no,
5 na ɔka kyerɛɛ wɔn sɛ:
“Mahu sɛ mo papa Laban ntew n’anim mma me sɛ kan no;+ nanso mahu sɛ Onyankopɔn a me papa som no no di m’akyi.+
6 Mo ara munim sɛ mede m’ahoɔden nyinaa asom mo papa.+
7 Na mo papa adaadaa me, na wasesa m’akatua mpɛn du, nanso Onyankopɔn amma kwan amma wanyɛ me bɔne.+
8 Sɛ ɔka sɛ, ‘Mede mmoa a wɔn ho yɛ adamadam no betua wo ka’ a, mmoa no nyinaa wo wɔn a wɔn ho yɛ adamadam; na sɛ ɔka sɛ, ‘Mede wɔn a wɔn ho yɛ nsensanee no betua wo ka’ a, wɔn nyinaa wo wɔn a wɔn ho yɛ nsensanee.+
9 Enti Onyankopɔn maa mo papa mmoa bedii me nsam.+
10 Afei eduu bere a ɛsɛ sɛ wɔforo mmoa no, mesoo dae+ hui sɛ mpapo a wɔn ho yɛ nsensanee ne adamadam ne nsisiinsisii no+ reforo abere no.
11 Ɛnna nokware Nyankopɔn no bɔfo frɛɛ me wɔ dae mu sɛ, ‘Yakob!’ na migyee so sɛ, ‘Mini.’+
12 Ɔtoaa so sɛ, ‘Ma w’ani so na hwɛ, mpapo a wɔn ho yɛ nsensanee ne adamadam ne nsisiinsisii no reforo abere no, efisɛ mahu nea Laban reyɛ wo no nyinaa.+
13 Mene nokware Nyankopɔn a oyii ne ho adi kyerɛɛ wo wɔ Betel,+ baabi a wosraa nkaedum+ bi na wohyɛɛ me bɔ no.+ Afei sɔre fi ha san kɔ asase a wɔwoo wo wɔ so no so.’”+
14 Na Rahel ne Lea buae sɛ: “Agyapade bɛn bio na yɛwɔ wɔ yɛn papa fie?+
15 Wantɔn yɛn sɛ ahɔho anaa? Ɛnyɛ yɛn ti sika na odi daa?+
16 Agyapade a Onyankopɔn agye afi yɛn papa hɔ nyinaa yɛ yɛne yɛn mma dea.+ Enti biribiara a Onyankopɔn aka akyerɛ wo no, yɛ.”+
17 Afei Yakob sɔre momaa ne mma ne ne yerenom so tenatenaa yoma so;+
18 na ɔde ne mmoa ne agyapade a wabenya+ wɔ Padan-Aram nyinaa siim sɛ ɔrekɔ ne papa Isak nkyɛn wɔ Kanaan asase so.+
19 Saa bere yi na Laban rekotwitwa ne nguan ho nhwi. Na Rahel wiaa ne papa terafim honi.+
20 Afei Yakob wiaa ne ho guanee, efisɛ wanka ne kɔ no ho asɛm ankyerɛ Siriani Laban.
21 Na ɔde nea ɔwɔ nyinaa guan kotwaa asubɔnten kɛse no.+ Akyiri yi ɔde n’ani kyerɛɛ Gilead+ bepɔw so.
22 Nnansa akyi no, Laban tee sɛ Yakob aguan.
23 Ntɛm ara na ɔfaa ne nuanom kaa ne ho tiw+ no nnanson, na wɔkɔtoo no Gilead bepɔw so.
24 Na Onyankopɔn yii ne ho adi kyerɛɛ Siriani+ Laban wɔ dae+ mu na ɔka kyerɛɛ no sɛ: “Hwɛ yiye wɔ asɛm biara a wobɛka akyerɛ Yakob+ no ho.”
25 Enti Laban kɔtoo Yakob sɛ wasi ne ntamadan wɔ bepɔw so, na Laban ne ne nuanom nso sii wɔn de wɔ Gilead bepɔw so.
26 Afei Laban ka kyerɛɛ Yakob sɛ: “Dɛn na woayɛ yi? Woawia wo ho de me mmabea aguan sɛ nnipa a wɔde nkrante afa wɔn nnommum!+
27 Dɛn nti na wuwiaa wo ho guanee a wanka ankyerɛ me amma mamfa osebɔ ne nnwom+ ne mpintin ne sanku+ annya wo kwan?
28 Woamma mamfew mmofra yi ne me mmabea no ano+ mpo. Woadi nkwaseasɛm.
29 Anka metumi ayɛ mo bɔne biara a mepɛ,+ nanso Onyankopɔn a mo papa som no no ne me kasae anadwo yi sɛ, ‘Hwɛ yiye wɔ asɛm biara a wobɛka akyerɛ Yakob no ho.’+
30 Sɛ w’ani agyina wo papa fie na wopɛ sɛ wokɔ a, dɛn nti na woawia m’anyame?”+
31 Ɛnna Yakob buaa Laban sɛ: “Na misuro+ sɛ wubegye wo mmabea no afi me nsam.
32 Obiara a wubehu w’anyame no wɔ ne nkyɛn no, ɛnsɛ sɛ onya ne ti didi mu.+ Yɛn nuanom na wɔwɔ ha yi; hwehwɛ biribiara mu na sɛ wuhu a, fa kɔ.”+ Nanso na Yakob nnim sɛ Rahel na wawia.+
33 Enti Laban kɔɔ Yakob ne Lea ne mmaawa baanu+ no nyinaa ntamadan mu, nanso wanhu. Afei ofi Lea hɔ kɔɔ Rahel ntamadan mu.
34 Ná Rahel afa terafim honi no de ahyɛ mmea kotoku a wɔde to yoma so no mu, na saa bere no nyinaa na ɔte so. Enti Laban hwehwɛɛ ntamadan no mu baabiara nanso wanhu.
35 Afei Rahel ka kyerɛɛ ne papa sɛ: “Papa, mesrɛ wo mma wo bo mmfuw me,+ merentumi nsɔre efisɛ mmea ade no bi ayɛ me.”+ Enti ɔtɔɔ ne bo ase hwehwɛɛ baabiara nanso wanhu terafim honi+ no.
36 Yakob bo fuwii+ na ɔne Laban hamee, na obisaa Laban sɛ: “Bɔne bɛn na mayɛ na mmara bɛn na matõ+ a wudi m’akyi kirididi saa?+
37 Wohwehwɛɛ me nneɛma mu yi, wo fie agyapade bɛn na woahu?+ Sɛ woahu biribi a fa bra me nuanom ne wo nuanom nyinaa anim+ na wommu yɛn baanu ntam atɛn.+
38 Me ne wo atena mfe aduonu. Wo nguan anaa mmirekyi no mu biara ampɔn,+ na manwe mu biara nso.
39 Sɛ aboa bi kum wo mmoa no bi a, m’ankasa mitua ka; memfa no mmrɛ wo.+ Na sɛ obi wia bi anadwo oo, awia oo, wugye wɔ me nsam.+
40 Ahohuru ba awia a, menam mu, awɔw ba anadwo nso a, menam mu, m’ani nkum na mada.+
41 Mfe aduonu ni a matena wo fie. Wo mmabea nti, masom wo mfe dunan, na mede mfe asia nso ahwɛ wo mmoa, na woasesa m’akatua mpɛn du.+
42 Sɛ me papa ne Abraham Nyankopɔn,+ nea Isak suro no+ no, nni m’akyi a, anka nsapan na wode begya me kwan. Nanso Onyankopɔn ahu m’ahohia ne me brɛ, enti na ɔkaa w’anim nnɛra anadwo no.”+
43 Afei Laban buaa Yakob sɛ: “Hwɛ, mmea yi yɛ me mmabea, mmofra yi nso yɛ me dea, na mmoa yi nso wɔ me; biribiara a w’ani tua yi yɛ me ne me mmabea dea. Bɔne bɛn na nnɛ metumi ayɛ wɔn anaa mmofra a wɔawo wɔn yi?
44 Mesrɛ wo, bra na me ne wo nyɛ apam+ na ɛnyɛ adanse wɔ me ne wo ntam.”+
45 Enti Yakob faa ɔbo na ɔde yɛɛ nkaedum.+
46 Na Yakob ka kyerɛɛ ne nuanom sɛ: “Montase abo mmra!” Ɛnna wɔkɔtasee abo bae na wɔboaboaa ano+ yɛɛ no kuw. Afei wodidii wɔ abokuw no so.
47 Laban frɛɛ hɔ Yega-Sahaduta, na Yakob de ɔfrɛɛ hɔ Galeed.
48 Afei Laban kae sɛ: “Abokuw yi yɛ me ne wo ntam adanse nnɛ.” Enti na ɔfrɛɛ no Galeed,+
49 ne Ɔwɛn Aban, efisɛ ɔkae sɛ: “Sɛ wokɔ na me nso mekɔ a, Yehowa nhwɛ me ne wo ntam.+
50 Sɛ woteetee me mmabea+ yi anaa wokɔfa mmea foforo ka me mma yi ho a, onipa biara nni yɛn ntam. Hwɛ, Onyankopɔn na ɔyɛ me ne wo ntam dansefo.”+
51 Laban toaa so kae sɛ: “Mahyehyɛ abokuw yi na mede nkaedum yi asi me ne wo ntam.
52 Abokuw ne nkaedum yi yɛ adanse+ sɛ merentra abo yi mma wo so na wo nso worentra abo ne nkaedum yi mma me so mmɛyɛ me bɔne.+
53 Abraham nyame+ ne Nahor nyame,+ wɔn agya nyame, nni me ne wo ntam asɛm.” Nanso Yakob de Onyankopɔn a ne papa Isak suro no+ no din kaa ntam.
54 Ɛno akyi no, Yakob bɔɔ afɔre wɔ bepɔw no so, na ɔfrɛɛ ne nuanom ma wobedidii.+ Enti wodidii na wɔdaa bepɔw no so anadwo no.
55 Na Laban sɔree anɔpahema na ofew mmofra no ne ne mmabea no ano+ na ohyiraa wɔn.+ Afei Laban sii kwan so san kɔɔ ne kurom.+
