Genesis 38:1-30
38 Akyiri yi Yuda fii ne nuanom nkyɛn kosii ne ntamadan wɔ Adulamni+ barima bi a ɔde Hira nkyɛn.
2 Ɛhɔ na Yuda huu Kanaanni+ bi a wɔfrɛ no Sua babea bi, na ɔfaa no, na ɔne no dae.
3 Ɔbea no nyinsɛn woo ɔbabarima, na ɔtoo no din Er.+
4 Onyinsɛnee bio woo ɔbabarima, na ɔtoo no din Onan.
5 Akyiri yi ɔsan woo ɔbabarima, na ɔtoo no din Sela. Ɔwoe no, na Yuda wɔ Aksib.+
6 Bere bi akyi no, Yuda waree ɔbea bi a wɔfrɛ no Tamar+ maa ne ba panyin Er.
7 Nanso Yuda ba panyin Er bɛyɛɛ onipa bɔnefo wɔ Yehowa anim,+ enti Yehowa kum no.+
8 Afei Yuda ka kyerɛɛ Onan sɛ: “Kɔ wo nua yere no ho na ware no na wo ma wo nua no.”+
9 Nanso na Onan nim sɛ mma a ɔbɛwo wɔn no renyɛ ne dea,+ enti sɛ ɔne ne nua yere no da a, na wama ne ho nsu asen agu fam asɛe, na wamma ne nua no annya mma.+
10 Nea ɔyɛe no, na ɛyɛ bɔne wɔ Yehowa ani so,+ enti okum ɔno nso.+
11 Afei Yuda ka kyerɛɛ n’ase Tamar sɛ: “Kodi kuna wɔ wo papa fie kosi sɛ me ba Sela benyin.”+ Nanso ɔkae wɔ ne tirim sɛ: “Anhwɛ a ɔno nso bewu sɛ ne nuanom.”+ Enti Tamar kɔtenaa ne papa fie.+
12 Bere bi akyi no, Sua babea a ɔyɛ Yuda yere+ no wui, na Yuda yɛɛ n’ayi.+ Na ɛno akyi no, ɔne n’adamfo Hira a ɔyɛ Adulamni+ no kɔɔ wɔn a wotwitwa ne nguan ho nhwi no hɔ wɔ Timna.+
13 Afei obi bɛka kyerɛɛ Tamar sɛ: “Hwɛ, w’ase barima no rekɔ Timna akotwitwa ne nguan ho nhwi.”+
14 Ɔtee saa no, oyii ne kuna atade no guu hɔ, na ɔde ntama kataa ne kɔn mu de nkataanim kataa n’anim, na ɔkɔtenaa Enaim kurotia wɔ Timna kwan so, efisɛ na wahu sɛ Sela anyin nso wɔmfaa no mmaa no aware.+
15 Bere a Yuda ani bɔɔ no so no, osusuwii sɛ ɔyɛ aguaman,+ efisɛ na wakata n’anim.+
16 Enti ɔman kɔɔ ne nkyɛn kae sɛ: “Mesrɛ wo, ma menkɔ wo ho.”+ Na onnim sɛ ɛyɛ n’ase no.+ Ɛnna ɔbea no kae sɛ: “Dɛn na wode bɛma me na woaba me ho?”+
17 Yuda kae sɛ: “Mɛsoma ma wɔde abirekyi ba abrɛ wo.” Na obisaa no sɛ: “Ɛdɛn na wode bedi agyinam ansa na wode aba?”+
18 Na Yuda bisaa no sɛ: “Dɛn na memfa nni agyinam?” Obuae sɛ: “Wo nsɔanokaa+ ne wo hama ne wo poma.” Ɔde maa no, na ɔkɔɔ ne ho, na ɔne no nyinsɛnee.
19 Afei ɔsɔre koyii ne nkataanim no guu hɔ, na ɔhyɛɛ ne kuna atade no.+
20 Afei Yuda somaa n’adamfo Adulamni+ no sɛ ɔmfa abirekyi ba no nkɔ na onkogye nea ɔde dii agyinam no mfi ɔbea no hɔ mmra, nanso wanhu no.
21 Na obisabisaa nnipa a wɔwɔ kurom hɔ no sɛ: “Ɔbea aguaman* a ɔtaa tena Enaim kwankyɛn no wɔ he?” Ɛnna wɔkae sɛ: “Yenhuu aguaman+ biara wɔ ha da.”
22 Afei ɔsan n’akyi kɔbɔɔ Yuda amanneɛ sɛ: “Manhu ɔbea no, na kurom hɔfo se aguaman biara mmaa hɔ da.”
23 Ɛnna Yuda kae sɛ: “Ma ɔmfa na yɛn anim angu ase.+ Me de, mede aboa no asoma, hu na woanhu no.”
24 Afei bɛyɛ asram abiɛsa akyi no, obi ka kyerɛɛ Yuda sɛ: “W’ase Tamar adan aguaman+ na ɛnam so ma wanyinsɛn.”+ Ɛnna Yuda kae sɛ: “Momfa no mmra na wɔnhyew no.”+
25 Bere a wɔde no bae no, ɔsoma kɔɔ n’ase barima no hɔ kɔkae sɛ: “Ɔbarima a nneɛma yi yɛ ne dea no, ɔno na ɔne me nyinsɛnee.”+ Ɔtoaa so sɛ: “Mesrɛ wo, hwɛ+ sɛ nsɔanokaa ne hama ne poma yi yɛ hena dea.”+
26 Yuda hui no, ɔkae sɛ:+ “Ɔbea no teɛ sen me,+ efisɛ mamfa no amma me ba Sela.”+ Na efi saa bere no wankɔ ne ho bio.+
27 Afei n’awo duu so no, na nta na ɛwɔ ne yam.
28 Awo no mu no, abofra biako yii ne nsa puei, na nea ogye awo no de hama kɔkɔɔ kyekyeree ne nsa, na ɔkae sɛ: “Oyi na ɔbaa kan.”
29 Afei ɔtwee ne nsa kɔɔ mu, na ɛhɔ ara ne nua no fii adi; enti nea ɔregye awo no kae sɛ: “Ɛdɛn na woayɛ yi? Adɛn na woapae awotwaa no?” Enti wɔtoo no din Peres.+
30 Afei ne nua a hama kɔkɔɔ kyekyere ne nsa no dii akyi bae, na wɔtoo no din Sera.+
Ase Hɔ Nsɛm
^ Nea ɛkyerɛ ankasa ne “asɔrefie aguaman.”
