Genesis 4:1-26
4 Afei Adam ne ne yere Hawa dae na onyinsɛn+ woo Kain.+ Na ɔkae sɛ: “Yehowa aboa me ma mawo ɔbarima.”+
2 Akyiri yi ɔwoo ne nua Habel.+
Habel bɛyɛɛ oguanhwɛfo,+ na Kain nso bɛyɛɛ okuafo.+
3 Na bere bi akyi no, Kain de asase so nnɔbae+ bɔɔ afɔre maa Yehowa.+
4 Na Habel nso de ne nguan mu mmakan+ no bi ne wɔn srade+ bae. Yehowa ani sɔɔ Habel ne n’afɔre no,+
5 nanso Kain ne n’afɔre no de, n’ani ansɔ.+ Afei Kain bo fuwii+ denneennen na okunkum n’anim.
6 Ɛnna Yehowa bisaa Kain sɛ: “Dɛn na ama wo bo afuw saa, na dɛn nti na woakunkum w’anim yi?
7 Sɛ wosakra yɛ papa a, w’anim remma nyam anaa? Na sɛ woansakra anyɛ papa a, ɛnde bɔne butuw w’abobow ano, na ɛrehwehwɛ wo;+ adɛn na wunni no so?”+
8 Eyi akyi no, Kain ka kyerɛɛ ne nua Habel sɛ: “Ma yɛnkɔ wuram.” Na wɔwɔ hɔ no, Kain tow hyɛɛ ne nua Habel so kum no.+
9 Ɛnna Yehowa bisaa Kain sɛ: “Wo nua Habel wɔ he?”+ Na obuae sɛ: “Minnim baabi a ɔwɔ. Adɛn, me na mehwɛ me nua no so anaa?”+
10 Ɛnna ɔkae sɛ: “Hwɛ, dɛn na woayɛ yi? Tie! Wo nua no mogya fi asase so reteɛm frɛ me.+
11 Enti wɔadome wo atwa wo asu+ asase a ebuee n’anom gyee wo nua mogya fii wo nsam+ no so.
12 Sɛ wodɔw asase a, ɛremma wo n’ahoɔden.+ Wobɛyɛ ɔkobɔfo abɔ asesa wɔ asase so.”+
13 Ɛnna Kain ka kyerɛɛ Yehowa sɛ: “Me bɔne ho asotwe sõ ma me sɛ mɛsoa.
14 Hwɛ, woretwa me asu nnɛ da yi afi asase so, na worepam me afi w’anim;+ mɛyɛ ɔkobɔfo+ abɔ asesa wɔ asase so, na obiara a obehu me no bekum me.”+
15 Afei Yehowa ka kyerɛɛ no sɛ: “Ɛno nti obiara a obekum Kain no benya so akatua mpɛn ason.”+
Na Yehowa yɛɛ sɛnkyerɛnne bi maa Kain na obiara a obehu no no ankum no.+
16 Afei Kain fii Yehowa anim+ kɔtenaa “Ɔkobɔfo asase” so wɔ Eden apuei.
17 Akyiri yi, Kain ne ne yere+ dae na onyinsɛn woo Enok. Na ɔkyekyee kurow bi de ne ba Enok din too so.+
18 Afei Enok woo Irad, na Irad woo Mehuyael, na Mehuyael woo Metusael, na Metusael woo Lamek.
19 Na Lamek waree mmea baanu. Nea odi kan no din de Ada, na nea ɔto so abien no din de Sila.
20 Akyiri yi Ada woo Yabal. Na ɔbɛyɛɛ wɔn a wɔte ntamadan mu+ ne mmoayɛnfo+ agya.
21 Na ne nua din de Yubal. Ɔbɛyɛɛ asankubɔfo+ ne mmɛnhyɛnfo+ nyinaa agya.
22 Sila nso woo Tubal-Kain a na ɔyɛ ɔtomfo a ɔde kɔbere ne nnade+ yɛ nneɛma. Na Tubal-Kain nuabea din de Naama.
23 Afei Lamek nwenee nsɛm yi maa ne yerenom Ada ne Sila sɛ:
“Muntie me, Lamek yerenom;Monwɛn mo aso ntie me nsɛm:Makum nea opiraa me no,Yiw, aberante a ɔbɔɔ me no.
24 Sɛ wotua Kain wu so ka mpɛn ason+ a,Ɛnde wobetua Lamek wu so ka mpɛn aduɔson ason.”
25 Na Adam san ne ne yere dae na ɔwoo ɔbabarima too ne din Set,+ na ɔkae sɛ: “Onyankopɔn ama me ɔba foforo de asi Habel a Kain kum+ no no ananmu.”
26 Na Set nso woo ɔbabarima na ɔtoo ne din Enos.+ Saa bere no na wofii ase bɔɔ Yehowa din.+
