Genesis 46:1-34
46 Afei Israel ne nea ɔwɔ nyinaa siim baa Beer-Seba,+ na ɔbɔɔ afɔre maa ne papa Isak Nyankopɔn.+
2 Na Onyankopɔn ne Israel kasae anadwo wɔ anisoadehu mu sɛ:+ “Yakob, Yakob!” na ogyee so sɛ: “Mini!”+
3 Na ɔtoaa so kae sɛ: “Mene nokware Nyankopɔn+ no, Onyankopɔn a wo papa som no no.+ Nsuro sɛ wobɛkɔ Egypt na mɛyɛ wo ɔman kɛse wɔ hɔ.+
4 Me ne wo bɛkɔ Egypt na me ara masan de wo aba;+ Yosef na ɔde ne nsa bɛka w’ani agu so.”+
5 Afei Yakob sɔre fii Beer-Seba, na Israel mma no de wɔn papa Yakob ne wɔn mma nketewa ne wɔn yerenom tenatenaa nteaseɛnam a Farao de somae sɛ wɔmfa nkɔfa no mmra no mu.+
6 Wɔfaa wɔn mmoa ne wɔn agyapade a wonyae wɔ Kanaan+ asase so nyinaa. Na Yakob ne n’asefo nyinaa koduu Egypt.
7 Ɔde ne mmabarima ne ne mmabarima mma, ne ne mmabea ne ne mmabarima mmabea, n’asefo nyinaa, kaa ne ho kɔɔ Egypt.+
8 Israel mma a wɔkɔɔ Egypt+ ni: Yakob ne ne mmabarima: Yakob ba panyin ne Ruben.+
9 Ruben mma ne Hanok, Palu, Hesron, ne Karmi.+
10 Simeon+ mma ne Yemuel, Yamin, Ohad, Yakin,+ Sohar, ne Saul+ a ɔne Kanaanni bea woo no no.
11 Lewi+ mma ne Gerson,+ Kohat,+ ne Merari.+
12 Yuda+ mma ne Er,+ Onan,+ Sela,+ Peres,+ ne Sera.+ Er ne Onan wui wɔ Kanaan+ asase so.
Na Peres woo Hesron+ ne Hamul.+
13 Isakar+ mma ne Tola,+ Puwa,+ Yob, ne Simron.+
14 Sebulon+ mma ne Sered, Elon, ne Yaleel.+
15 Eyinom ne Yakob mmabarima ne ne babea Dina+ a ɔne Lea+ woo wɔn wɔ Padan-Aram no. Wɔn nyinaa dodow si akra aduasa abiɛsa.
16 Gad+ mma ne Sifion, Hagi, Suni, Esbon, Eri, Arod, ne Areli.+
17 Aser+ mma ne Yimnah, Yiswa, Yiswi, Beria,+ ne wɔn nuabea Serah. Beria mma ne Heber ne Malkiel.+
18 Eyinom ne Silpa+ a Laban de no maa ne babea Lea no mma a ɔwo maa Yakob: wɔn nyinaa yɛ akra dunsia.
19 Yakob yere Rahel+ mma ne Yosef+ ne Benyamin.+
20 Mma a Yosef ne On sɔfo Potifera babea Asenat+ woe wɔ Egypt no ne Manase+ ne Efraim.+
21 Benyamin mma ne Bela,+ Beker,+ Asbel, Gera,+ Naaman,+ Ehi, Ros, Mupim,+ Hupim,+ ne Ard.
22 Eyinom ne mma a Rahel wo maa Yakob. Wɔn nyinaa yɛ akra dunan.
23 Dan+ mma ne Husim.+
24 Naftali+ mma ne Yaseel, Guni,+ Yeser, ne Silem.+
25 Eyinom ne Bilha+ a Laban de no maa ne babea Rahel no asefo a ɔwo maa Yakob no; wɔn nyinaa yɛ akra baason.
26 Akra a wofi Yakob asen mu+ a wodii n’akyi kɔɔ Egypt nyinaa yɛ akra aduosia asia. Yakob mma yerenom nka ho.
27 Yosef mma a ɔwoo wɔn wɔ Egypt yɛ akra baanu. Akra a wofi Yakob fie baa Egypt no nyinaa si aduɔson.+
28 Ɔsomaa Yuda+ dii n’anim kɔɔ Gosen kɔbɔɔ Yosef amanneɛ. Afei wokoduu Gosen+ asase so.
29 Ɛnna Yosef siesiee ne nteaseɛnam siim kohyiaa ne papa Israel wɔ Gosen.+ Bere a oduu ne nkyɛn no ɔbam no de ne ti too ne kɔn ho sui ara wɔ ne kɔn ho.+
30 Na Israel ka kyerɛɛ Yosef sɛ: “Afei a mahu w’anim sɛ wote ase yi de, miwu a mepɛ.”+
31 Yosef ka kyerɛɛ ne nuanom ne ne papa fiefo sɛ: “Momma menkɔbɔ Farao amanneɛ+ sɛ, ‘Me nuanom ne me papa fiefo a wɔwɔ Kanaan asase so no aba me nkyɛn.+
32 Nnipa no yɛ nguanhwɛfo,+ na wɔwɔ mmoa pii;+ na wɔde wɔn nguan ne wɔn anantwi ne nea wɔwɔ nyinaa aba.’+
33 Sɛ Farao bisa mo sɛ, ‘Adwuma bɛn na moyɛ?’ a,
34 monka sɛ, ‘Wo nkoa ne yɛn agyanom+ ayɛn mmoa afi yɛn mmofraase.’ Eyi bɛma moatena Gosen+ asase so, efisɛ Egyptfo kyi nguanhwɛfo.”+
