Genesis 48:1-22
48 Bere bi akyi no, wɔka kyerɛɛ Yosef sɛ: “Hwɛ, wo papa agurow.” Ɔtee saa no ɔfaa ne mma baanu no, Manase ne Efraim,+ kaa ne ho.
2 Afei wɔka kyerɛɛ Yakob sɛ: “Wo ba Yosef aba wo nkyɛn.” Enti Israel miaa n’ani sɔre tenaa ne mpa so.
3 Ɛnna Yakob ka kyerɛɛ Yosef sɛ:
“Ade nyinaa so Tumfoɔ Nyankopɔn yii ne ho adi kyerɛɛ me wɔ Lus+ wɔ Kanaan asase so, na ohyiraa me.+
4 Na ɔtoaa so sɛ, ‘Mɛma w’ase atrɛw+ ayɛ bebree, na mɛma woabɛyɛ aman asafodɔm,+ na mede asase yi bɛma w’asefo a wobedi w’akyi aba na ayɛ wɔn agyapade daa.’+
5 Hwɛ, wo mma baanu a wowoo wɔn Egypt ha ansa na mereba wo nkyɛn no yɛ me dea.+ Efraim ne Manase bɛyɛ m’ankasa me mma te sɛ Ruben ne Simeon.+
6 Na wo mma a wubenya wɔn wɔ wɔn akyi no na wɔbɛyɛ wo dea. Na agyapade a wɔn nuanom din da so no bi na wobenya.+
7 Mifi Padan+ reba no, Rahel wu+ too me so wɔ kwan so wɔ Kanaan asase so. Ná baabi a yɛadu no ne Efrata+ ntam twe kakra, enti misiee no Efrata, anaa Betlehem,+ kwan so.”
8 Afei Israel huu Yosef mma no na obisae sɛ: “Henanom ni?”+
9 Yosef buaa ne papa sɛ: “Mma a Onyankopɔn ama manya wɔ ha ni.”+ Ɛnna ɔkae sɛ: “Mesrɛ wo, fa wɔn brɛ me na minhyira wɔn.”+
10 Onyin nti na Israel ani so ayɛ no kusukusu na onhu ade.+ Enti ɔde wɔn bɛn no na ofew wɔn ano bam wɔn.+
11 Na Israel ka kyerɛɛ Yosef sɛ: “Na minnim da sɛ mehu w’anim,+ nanso hwɛ sɛ Onyankopɔn ama mahu wo mma mpo aka wo ho.”
12 Afei Yosef yii wɔn fii ne nantam, na obuu nkotodwe de n’anim butuw fam.+
13 Yosef de ne nsa nifa soo Efraim mu gyinaa Israel benkum,+ na ɔde ne nsa benkum soo Manase mu gyinaa Israel nifa,+ na ɔde wɔn bɛn no.
14 Nanso Israel de ne nsa nifa too Efraim+ a ɔyɛ akumaa no ti so,+ na ɔde ne nsa benkum too Manase ti so.+ Ɔhyɛɛ da na ɔyɛɛ ne nsa saa, efisɛ na Manase ne panyin.+
15 Afei ohyiraa Yosef kae sɛ:+
“Nokware Nyankopɔn a m’agyanom Abraham ne Isak nantew n’anim,+Nokware Nyankopɔn a wahwɛ me so me nkwa nna nyinaa abesi nnɛ,+
16 Ɔbɔfo a oyii me fii m’ahohia nyinaa mu no+ nhyira mmofra yi.+
Ma wɔmfa me din ne m’agyanom Abraham ne Isak din nto wɔn so,+Na ma wɔnnɔ nyɛ bebree asase so.”+
17 Yosef hui sɛ ne papa de ne nsa nifa ato Efraim ti so no, n’ani annye ho,+ na ɔyɛe sɛ ɔreyi ne papa nsa afi Efraim ti so de ato Manase ti so.+
18 Afei Yosef ka kyerɛɛ ne papa sɛ: “Papa, nyɛ no saa, efisɛ oyi ne panyin.+ Fa wo nsa nifa to ne ti so.”
19 Na ne papa antie na ɔkae sɛ: “Minim saa, me ba, minim saa. Ɔno nso bɛyɛ ɔman na ɔbɛyɛ kɛse.+ Nanso ne nua kumaa no bɛyɛ kɛse asen no,+ na n’asefo bɛyɛ aman pii.”+
20 Na da no ohyiraa wɔn+ sɛ:
“Daa Israel de wo din behyira aka sɛ,‘Onyankopɔn nyɛ wo sɛ Efraim ne Manase.’”+
Enti ne nyinaa mu no, na ɔde Efraim di Manase anim.+
21 Afei Israel ka kyerɛɛ Yosef sɛ: “Hwɛ, merebewu,+ nanso Onyankopɔn bɛka mo ho, na ɔde mo bɛsan akɔ mo agyanom asase so.+
22 Na mede asase a menam nkrante ne agyan so gye fii Amorifo hɔ no bɛka wo de no ho ma ayɛ kɛse asen wo nuanom de no.”+
