Genesis 7:1-24
7 Ɛno akyi no, Yehowa ka kyerɛɛ Noa sɛ: “Wo ne wo fiefo+ nyinaa nkɔ adaka no mu, efisɛ meto m’ani a wo na woyɛ ɔtreneeni wɔ m’anim wɔ awo ntoatoaso yi mu.+
2 Mmoa a wɔn ho tew nyinaa, fa ason ason, anini ne abere;+ na mmoa a wɔn ho ntew no fa abien abien pɛ, onini ne ɔbere;
3 na wim ntuboa nso, fa ason ason, anini ne abere,+ na wɔanya nkwa ma wɔn ase atrɛw asase nyinaa so.+
4 Na aka nnanson pɛ na mama osu atɔ+ agu asase so adaduanan, awia ne anadwo;+ na mɛpopa nea mayɛ a ɛte ase biara afi asase so.”+
5 Noa yɛɛ nea Yehowa hyɛɛ no nyinaa.
6 Bere a nsuyiri baa asase so no na Noa adi mfe ahansia.+
7 Afei Noa ne ne mma ne ne yere ne ne mma yerenom kɔɔ adaka no mu ansa na osu no refi ase atɔ.+
8 Na mmoa a wɔn ho tew ne wɔn a wɔn ho ntew ne ntuboa ne biribiara a ɛwea asase so,+
9 ebiara abien abien, onini ne ɔbere, kɔɔ adaka no mu kaa Noa ho sɛnea Onyankopɔn hyɛɛ Noa no.
10 Na ɛbae sɛ nnanson akyi no osu tɔe wɔ asase so.
11 Noa asetena mu afe a ɛto so ahansia, ɔsram a ɛto so abien no da a ɛto so dunson no, subun kɛse no ano paapaee na ɔsoro mfɛnsere buebuei.+
12 Na osu tɔɔ asase so adaduanan, awia ne anadwo.+
13 Saa da no ara Noa ne ne mma Sem, Ham, Yafet,+ ne ne yere, ne ne mma yerenom kɔɔ adaka no mu;+
14 wɔne wuram mmoa nyinaa, sɛnea wɔn su te;+ ne nyɛmmoa nyinaa, sɛnea wɔn su te; ne mmoa a wɔwea asase so nyinaa, sɛnea wɔn su te;+ ne ntuboa nyinaa, sɛnea wɔn su te;+ ne nnomaa ne ntakraboa nyinaa.+
15 Wɔkaa Noa ho kɔɔ adaka no mu, aboa biara a nkwa wɔ ne mu na ɔhome,+ abien abien.
16 Ɔhonam nyinaa mu anini ne abere na wɔkɔɔ mu sɛnea Onyankopɔn hyɛɛ no no. Afei Yehowa too ɔpon no mu.+
17 Osu no tɔɔ asase so adaduanan, na eyiri pagyaw adaka no fii asase so ma ɛtɛn nsu no ani.
18 Afei nsu no yirii faa asase so baabiara, nanso na adaka no tɛn nsu no ani.+
19 Na nsu no yirii wɔ asase so araa ma ɛkataa mmepɔw atenten a ɛwɔ ɔsoro ase nyinaa so.+
20 Eyirii kɔɔ soro koduu basafa dunum na mmepɔw no so katae.+
21 Afei ɔhonam a ɛwɔ asase so nyinaa wuwui,+ ntuboa, nyɛmmoa, wuram mmoa ne mmoa a wɔnenam asase so manyamanya ne nnipa nyinaa.+
22 Biribiara a nkwa wom na ɛhome fa ne hwenem, kyerɛ sɛ biribiara a ɛwɔ asase kesee so no, wui.+
23 Enti ɔpopaa biribiara a ɛte ase fii asase so,+ fi nnipa so kosi mmoa so, mmoa a wɔwea so kosi wim ntuboa so, ɔpopaa wɔn fii asase so; na ɛkaa Noa ne wɔn a wɔka ne ho wɔ adaka no mu nkutoo.+
24 Na nsu kɔɔ so yirii asase no so nna ɔha aduonum.
