Genesis 9:1-29
9 Na Onyankopɔn hyiraa Noa ne ne mma na ɔka kyerɛɛ wɔn sɛ: “Monwo na monnɔɔso na monhyɛ asase so mã.+
2 Na mo ho hu ne mo ho suro nkɔ so nka asase so mmoa nyinaa, wim ntuboa nyinaa, mmoa a wɔwea fam nyinaa, ne ɛpo mu mpataa nyinaa, na wonsuro mo. Mede wɔn nyinaa ahyɛ mo nsa.+
3 Mmoa a wɔte ase nyinaa nyɛ aduan mma mo.+ Mede ne nyinaa ama mo sɛnea mede nhaban momono maa mo no.+
4 Ɔhonam ne ne kra,+ kyerɛ sɛ, ne mogya,+ nkutoo na munnni.+
5 Na mo kra mogya nso, mebisa. Mebisa wɔ aboa biara nsam, na mebisa wɔ onipa nso nsam; obi nua mpo mebisa ne kra ne nsam.+
6 Obiara a ɔka onipa mogya gu no, onipa so na wɔnam bɛka ne mogya agu,+ efisɛ Onyankopɔn bɔɔ onipa wɔ ne suban so.
7 Na mo de, monwo nyɛ bebree, na monyɛ manyamanya asase so+ baabiara.”
8 Na Onyankopɔn ka kyerɛɛ Noa ne ne mma a wɔka ne ho no sɛ:
9 “Afei me ne mo reyɛ apam,+ mo ne mo asefo a wobedi mo akyi aba,+
10 ne ɔkra biara a ɔka mo ho, nnomaa, wuram mmoa, ne asase so mmoa nyinaa, efi wɔn a wofi adaka no mu nyinaa so kosi asase so mmoa nyinaa so.+
11 Yiw, me ne mo reyɛ apam yi: Meremma nsu nyiri mfa ɔhonam nyinaa bio, na meremma nsu nyiri nsɛe asase bio.”+
12 Onyankopɔn de kaa ho sɛ: “Eyi na ɛbɛyɛ me ne mo ne ɔkra biara a ɔka mo ho no ntam apam no ho sɛnkyerɛnne+ de kosi awo ntoatoaso nyinaa so.
13 Mede me nyankontɔn+ besi omununkum mu na ayɛ apam a me ne asase ayɛ no ho sɛnkyerɛnne.
14 Na sɛ mede omununkum ba asase so a, nyankontɔn bepue wɔ omununkum no mu.
15 Na mɛkae m’apam+ a ɛda me ne mo ne ɔkra a ɔte ase+ biara ntam no, na nsu renyiri nsɛe ɔhonam nyinaa bio.+
16 Nyankontɔn no bɛba omununkum no mu,+ na mɛhwɛ akae daa apam+ a Onyankopɔn ne ɔkra biara a ɔte asase so ayɛ no.”+
17 Na Onyankopɔn tĩĩ mu kyerɛɛ Noa sɛ: “Eyi na ɛbɛyɛ apam a me ne ɔhonam a ɛwɔ asase so nyinaa ayɛ no ho sɛnkyerɛnne.”+
18 Noa mma+ a wofi adaka no mu puei ne Sem, Ham ne Yafet. Akyiri yi Ham woo Kanaan.+
19 Eyinom ne Noa mma baasa no, na wɔn mu na asase so nnipa nyinaa fi hwetee.+
20 Afei Noa bɛyɛɛ okuafo+ na ɔyɛɛ bobeturo.+
21 Na ɔnom bobesa no bi, na ɔbowee,+ enti bere a ɔda ne ntamadan mu no, na ne ho apa.
22 Ɛnna Kanaan papa Ham+ kohui sɛ ne papa ho da hɔ,+ na ofii adi kɔbɔɔ ne nuanom baanu no amanneɛ.+
23 Enti Sem ne Yafet faa ntama+ de guu wɔn kɔn ho de wɔn akyi kɔe. Na wɔde wɔn ani hwɛɛ nkyɛn kɔkataa wɔn papa ho a wɔanhu ne ho.+
24 Afei nsa no tetew Noa ani so, na ɔtee nea ne ba kumaa no ayɛ.
25 Enti ɔkae sɛ:
“Nnome nka Kanaan.+
Ma ɔnyɛ nkoa mu akoa mma ne nuanom.”+
26 Ɔde kaa ho sɛ:“Nhyira nka Yehowa,+ Sem Nyankopɔn,Na Kanaan nyɛ n’akoa.*+
27 Onyankopɔn mma Yafet atenae ntrɛw,Na ɔntena Sem ntamadan mu.+Ma Kanaan nyɛ akoa mma ɔno nso.”
28 Nsuyiri no akyi no, Noa kɔɔ so tenaa ase mfe ahasa aduonum.+
29 Enti mfe a Noa dii nyinaa yɛ ahankron aduonum, na owui.+
Ase Hɔ Nsɛm
^ Ɛkyerɛ sɛ ɔbɛyɛ Sem akoa.
